ព័ត៌មានអន្ដរជាតិ

ចិន វ៉ាដាច់សហរដ្ឋអាមេរិក លើការស្រាវជ្រាវបន្ទះឈីបជំនាន់ក្រោយ

បានផុស

៣ សប្តាហ៍ មុន

នៅ

ថ្ងៃសុក្រ ៧ មីនា ២០២៥

ដោយ

ការសិក្សាថ្មីមួយដែលចេញផ្សាយកាលពីពេលថ្មីៗនេះ បង្ហាញថា ប្រទេសចិនបានវ៉ាដាច់សហរដ្ឋអាមេរិកលើការស្រាវជ្រាវអំពីបច្ចេកវិទ្យាបន្ទះឈីបជំនាន់ថ្មីរហូតដល់ទៅជាងទ្វេដង។ នេះបើតាមការចុះផ្សាយរបស់ទិនានុប្បវត្តិវិទ្យាសាស្ត្រ Nature។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសិក្សាដែលធ្វើឡើងដោយវិទ្យាស្ថានសង្កេតបច្ចេកវិទ្យាកំពុងរីកចម្រើន (ETO) នៅសាកលវិទ្យាល័យ Georgetown ក្នុងក្រុង វ៉ាស៊ីនតោន ឌីស៊ី DC បានរកឃើញថា ឯកសារស្រាវជ្រាវចំនួន ៤៧៥ ០០០ សំណុំស្តីពីការរចនា និងការផលិតបន្ទះឈីប ត្រូវបានបោះពុម្ពជាសកលនៅចន្លោះឆ្នាំ ២០១៨ និង ២០២៣។

ក្នុងការឯកសារទាំងនោះ ចិនបានរួមចំណែកប្រមាណ ៣៤ ភាគរយ ខណៈសហរដ្ឋអាមេរិកមាន ១៥ ភាគរយ និងអឺរ៉ុប ១៨ ភាគរយ។ ខណៈបញ្ញាសិប្បនិម្មិត (AI) និងគំរូភាសាធំ (LLM) គ្របដណ្តប់លើវិស័យបច្ចេកវិទ្យា ប្រទេសចិនកំពុងផ្តល់អាទិភាពលើការផលិតបន្ទះឈីបទំនើបក្នុងស្រុក។

ជាមួយគ្នានោះ ការសិក្សាដដែលក៏បានរកឃើញផងដែរ ពាក់កណ្តាលនៃឯកសារស្រាវជ្រាវដែលគេបានដកស្រង់សម្រាប់អំណះអំណាងច្រើនបំផុត គឺមកពីចិន ហើយ ២២ ភាគរយ មកពីសហរដ្ឋអាមេរិក និង ១៧ ភាគរយ មកពីអឺរ៉ុប។

លោក Zachary Arnold អ្នកវិភាគជាន់ខ្ពស់នៅ ETO បាននិយាយថា ទោះបីជាការរកឃើញរបស់ការសិក្សា មិនមានន័យថាចិនកំពុងនាំមុខគេក្នុងវិស័យបន្ទះឈីបក៏ដោយ ប៉ុន្តែអាចនិយាយបានថា ចិនកំពុងឆ្ពោះទៅរកមុខបែបនេះ។

អ្នកស្រាវជ្រាវនៃការសិក្សា ETO បាននិយាយថា ប្រសិនបើការស្រាវជ្រាវរបស់ចិន ក្លាយជាការប្រើប្រាស់ជាក់ស្តែងនៅក្នុងអាជីវកម្មនោះ នោះសហរដ្ឋអាមេរិកអាចនឹងជួបការលំបាកនាពេលឆាប់ៗខាងមុខ ក្នុងការរក្សាការប្រកួតប្រជែងលើការរចនា និងការផលិតបន្ទះឈីប តាមរយៈការរឹតត្បឹតការនាំចេញរបស់ខ្លួន៕