សេដ្ឋកិច្ច

មន្ត្រី និងកសិករអះអាង ផ្ទុយគ្នាជុំវិញការប្រែប្រួលតម្លៃទីផ្សារគ្រាប់ស្វាយចន្ទី

បានផុស

១ ខែ មុន

នៅ

ថ្ងៃចន្ទ ១០ មីនា ២០២៥

ដោយ

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ០៩ ខែមីនា ឆ្នាំ ២០២៥ បានថ្លែងបដិសេធ ចំពោះការផ្សព្វផ្សាយថា តម្លៃទីផ្សារគ្រាប់ស្វាយចន្ទីបានធ្លាក់ចុះនៅដើមរដូវប្រមូលផលឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ បានអះអាង បន្ទាប់ពីសារព័ត៌មានមួយចំនួនបានដកស្រង់យកពាក្យសម្ដីរបស់លោក អួន ស៊ីឡុត ប្រធានសមាគមស្វាយចន្ទីកម្ពុជាអំពីការប្រែប្រួលថ្លៃគ្រាប់ស្វាយចន្ទី នៅក្នុងរយៈកាលថ្មីៗ។

លោក ឃឹម ហ្វីណង់ បានលើកឡើងថា ការសន្និដ្ឋានថា គ្រាប់ស្វាយចន្ទីឆៅបានធ្លាក់ចុះយ៉ាងគំហុកនោះ មិនបានឆ្លុះបញ្ចាំងពីស្ថានភាពពិតប្រាកដនៃទីផ្សារគ្រាប់ស្វាយចន្ទីឡើយ ជាក់ស្ដែងតម្លៃគ្រាប់ស្វាយចន្ទី តែងតែមានភាពខុសគ្នារវាងថ្លៃនៅដើមរដូវ និងពេលរដូវប្រមូលផលធំឈានមកដល់ អ្នកដែលស្ថិតនៅក្នុងវិស័យនេះ ប្រាកដជាដឹងច្បាស់ណាស់ថា វាគ្រាន់តែជាការប្រែប្រួលថ្លៃតាមនិន្នាការធម្មតាដែលតែងតែកើតមានឡើងរាល់ឆ្នាំ។

បើតាមអ្នកនាំពាក្យរូបនេះ៖ «បើយើងប្រៀបធៀបទៅនឹងខែមីនា ឆ្នាំ ២០២៤ តម្លៃនៅឆ្នាំនេះ ក៏នៅតែល្អជាងឆ្នាំមុន និងស្ថិតនៅក្នុងកម្រិតមួយផ្ដល់ប្រាក់ចំណេញដល់កសិករ ហើយមិនមានការក្រឡុកតម្លៃគ្រាប់ស្វាយចន្ទី ដោយឈ្មួញណាមួយនោះទេ»។

លោក អួន ស៊ីឡុត ប្រធានសមាគមស្វាយប្រាប់កម្ពុជាថ្មីថា តម្លៃគ្រាប់ស្វាយចន្ទីបានធ្លាក់ចុះកាលពីសប្ដាហ៍មុន នៅចំពេលដែលកសិករចាប់ផ្ដើមប្រមូលផលគ្រាប់ស្វាយចន្ទីនារដូវកាលថ្មី។

លោកថា តម្លៃគ្រាប់ស្វាយចន្ទីបានធ្លាក់ចុះពី ៦០០០ រៀល ក្នុងមួយគីឡូក្រាម មកត្រឹម ៤ ៨០០ ខណៈកំពង់ធំ មានស្ថិរភាពជាងគេនៅត្រឹម ៥ ២០០ រៀល ក្នុងមួយគីឡូក្រាម។

លោក អួន ស៊ីឡុត បានឱ្យដឹងថា បច្ចុប្បន្នសហគ្រាសក្នុងស្រុកមិនមានថវិកាទិញគ្រាប់ស្វាយចន្ទីនោះទេ ពោលគឺមានតែក្រុមហ៊ុនមួយចំនួនប៉ុណ្ណោះ ដែលទទួលបានកម្ចីពីធនាគារ ដូច្នេះតម្លៃគ្រាប់ស្វាយចន្ទីរបស់កម្ពុជា ត្រូវពឹងផ្អែកទាំងស្រុងលើទីផ្សារវៀតណាម ដែលធ្វើឱ្យវៀតណាមទម្លាក់តម្លៃដែរ។

បើតាមលោក អួន ស៊ីឡុត សមាគមស្វាយន្ទីបានឱ្យសមាជិកដែលគាត់មានលទ្ធភាពឱ្យគាត់ហាលទុក ប៉ុន្តែយើងពិបាកហាលដោយសារតែអាកាសធាតុធ្លាក់ភ្លៀង។

ម្យ៉ាងទៀត មានក្រុមហ៊ុន Santana និងក្រុមហ៊ុន Kampu រង់ចាំកាក់ទិញនៅខេត្តព្រះវិហារ ហើយក្រុមហ៊ុន CSNC, GC, Mirarth, ជ័យសំបូរ កាក់ទិញនៅខេត្តកំពង់ធំ ដើម្បីកុំឱ្យលំហូរគ្រាប់នាំចេញទៅព្រំដែនច្រើនពេក ដើម្បីជួយឱ្យស្វាយចន្ទីនៅខេត្តក្រចេះ ស្ទឹងត្រែង និងខេត្តកំពង់ចាម អាចមានលំហូរប្រក្រតី។

សម្រាប់ខេត្តកំពង់ធំ ល្អជាងគេ តម្លៃចន្លោះពី ៥០០០-៥២០០ រៀល ក្នុងមួយគីឡូក្រាម ប៉ុន្តែដ៏ទៃទៀតធ្លាក់នៅ ៤៦០០-៤៨០០ ទាបជាងគេខេត្តរតនគិរីធ្លាក់ដល់ ៤៤០០ រៀលក្នុងមួយគីឡូក្រាម។

យោងតាមសមាគមស្វាយចន្ទីកម្ពុជា នៅឆ្នាំ ២០២៤ កម្ពុជាសម្រេចបានការប្រមូលទិន្នផលគ្រាប់ស្វាយចន្ទីចំនួន ៨៥ ម៉ឺនតោន ក្នុងនោះនាំចេញគ្រាប់ឆៅបានចំនួន ៨១ ម៉ឺន ៥ ពាន់តោន កើនឡើង ២១ ភាគរយ គិតជាទឹកប្រាក់ ១,១៥០ ពាន់លានដុល្លារ កើន ២៦,១៥ ភាគរយ។ ក្នុងនោះនាំចេញទៅវៀតណាម មានចំនួន ៧៩ ម៉ឺន ៥ ពាន់តោន៕

អត្ថបទ៖ ឡេង ដេត