សេដ្ឋកិច្ច

កសិករវៀតណាមបារម្ភពីតម្លៃទុរេន ខណៈជិតដល់រដូវប្រមូលផលធំ

បានផុស

៣ សប្តាហ៍ មុន

នៅ

ថ្ងៃចន្ទ ១០ មីនា ២០២៥

ដោយ

កសិករវៀតណាមកំពុងព្រួយបារម្ភពីការធ្លាក់ចុះនៃតម្លៃទុរេនកាន់តែខ្លាំង ខណៈរដូវនៃការប្រមូលផលធំកាន់តែខិតជិតមកដល់ ចំពេលមានការរឹតត្បឹតការនាំចូលពីចិន ដែលជាទីផ្សារលក់ទុរេនដ៏ធំបំផុត។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរឹតត្បឹតរបស់ចិន បានធ្វើឱ្យការនាំចេញ និងតម្លៃទុរេនវៀតណាមធ្លាក់ចុះខ្លាំង ដោយតម្លៃទុរេនចេញពីចម្ការនៅតំបន់ដីសណ្តទន្លេមេគង្គ ប្រភេទ Ri 6 ធ្លាក់ចុះមកនៅត្រឹម ៤៧ ០០០-៦២ ០០០ ដុង (១,៨៤-២,៤២ ដុល្លារ)/គីឡូក្រាម ខណៈតម្លៃទុរេន Monthong ធ្លាក់ចុះត្រឹម ៨០ ០០០- ១០០ ០០០ ដុង (៣,១២-៣,៩ ដុល្លារ)/គីឡូក្រាម។

កសិករវៀតណាមព្រួយបារម្ភថា តម្លៃនេះអាចនឹងបន្តធ្លាក់ចុះទៀត ចំពេលដែលពួកគេកំពុងត្រៀមប្រមូលផលនៅខែមេសាខាងមុខ ដែលជារដូវសំខាន់។

កសិករម្នាក់មកពីក្រុង Can Tho នៃតំបន់ដីសណ្តមេគង្គ បានថ្លែងប្រាក់កាសែត Lao Dong ថា៖ «តម្លៃទុរេនក្រៅរដូវ បានធ្លាក់ចុះទាបរួចហើយ។ យើងព្រួយបារម្ភថា វានឹងធ្លាក់ចុះទៀតរហូតដល់ ៣០ ០០០ ដុង/គីឡូក្រាម ឬក៏ ២៥ ០០០ ដុង/គីឡូក្រាម។

ក្នុងអំឡុងពេលនេះ កាលពីឆ្នាំមុន ទុរេនប្រភេទ Ri 6 ត្រូវបានលក់ក្នុងតម្លៃ ១២០ ០០០-១២៦ ០០០ ដុង/គីឡូក្រាម ខណៈទុរេន Monthong លក់នៅតម្លៃ ១៧៥ ០០០-២០០ ០០០ ដុង។

គួររំឭកថា កាលពីដើមខែមករា ចិនបានចាប់ផ្តើមតម្រូវឱ្យមានលិខិតបញ្ជាក់ដែលថា ទុរេននាំទៅចិនមានមានផ្ទុកសារធាតុគីមី Auramine O ឬ Basic Yellow 2 ដែលអាចបង្កជំងឺមហារីក។ តាំងពីពេលនោះមក ចិនត្រួតពិនិត្យរាល់ការដឹកជញ្ជូនទុរេនពីប្រទេសវៀតណាម ដែលធ្វើឱ្យមានការជាប់គាំងនៅព្រំដែន ដោយទុរេនខ្លះត្រូវបានបដិសេធមិនឱ្យនាំចូល និងបកក្បាលយកមកលក់ក្នុងស្រុកវិញ។

ជាលទ្ធផល ការនាំចេញទុរេនទៅកាន់ទីផ្សារចិន ចាប់ពីខែមករា ដល់ពាក់កណ្តាលខែកុម្ភៈ បានធ្លាក់ចុះ ៨០ ភាគរយ។ នេះបើយោងតាមក្រសួងកសិកម្ម និងបរិស្ថានវៀតណាម។

ការនាំចេញទុរេនវៀតណាម បានឈានដល់កម្រិតខ្ពស់បំផុតប្រមាណ ៣,៣ ប៊ីលានដុល្លារកាលពីឆ្នាំមុន ដោយកើនឡើង ៥០ ភាគរយ នៅឆ្នាំ ២០២៣ ដោយ ៩៧ ភាគរយ ក្នុងនោះត្រូវបាននាំចេញទៅចិន។ ខណៈមានការផ្គត់ផ្គង់ច្រើន ឧស្សាហកម្មទុរេនត្រូវបានប្រឈមនឹងហានិភ័យ នៅពេលដែលពឹងផ្អែកខ្លាំងលើទីផ្សារលក់តែមួយ៕