កម្ពុជា-កូរ៉េសហការគ្នាដើម្បីចូលរួមអភិវ​ឌ្ឍន៍វិស័យធានារ៉ាប់រង

និយ័តករធានារ៉ាប់រងកម្ពុជា (RIC) និងវិទ្យាស្ថានអភិវឌ្ឍន៍ធានារ៉ាប់រងកូរ៉េ (KIDI) បានចាប់ដៃគ្នាក្នុងការពង្រឹងកិច្ចសហប្រតិបត្តិការ តាមរយៈ ការចែករំលែកបទពិសោធន៍ ព្រមទាំងជំនាញបច្ចេកទេសដើម្បីបង្កើនប្រសិទ្ធភាពនៃការគ្រប់គ្រង និងអភិវឌ្ឍវិស័យ ធានារ៉ាប់រងនៃប្រទេសទាំងពីរ។

ការសម្រេចបាននៃកិច្ចសហការនេះធ្វើឡើងតាមរយៈការចុះហត្ថលេខាលើអនុស្សរណៈនៃការយោគយល់គ្នា(MoU) រវាងលោកប៊ូ ច័ន្ទភីរូ អគ្គនាយក នៃ RIC និង លោក Chang-Eon Heo ប្រធាន និងជានាយក ប្រតិបត្តិនៃ KIDI កាលពីថ្ងៃទី៤ខែមីនានៅរាជធានីភ្នំពេញ។

«អនុស្សរណៈនៃការយោគយល់គ្នានេះ រៀបចំឡើងក្នុងគោលបំណងពង្រឹងកិច្ចសហប្រតិបត្តិការ តាមរយៈ ការចែករំលែកបទពិសោធន៍ ព្រមទាំងជំនាញបច្ចេកទេសដើម្បីបង្កើនប្រសិទ្ធភាពនៃការគ្រប់គ្រង និងអភិវឌ្ឍវិស័យ ធានារ៉ាប់រងទាំងក្នុងប្រទេសកូរ៉េ និងព្រះរាជាណាចក្រកម្ពុជា» នេះបើយោងតាម RIC។

តាមរយៈ MoU នេះភាគីទាំងពីរនឹងធ្វើការបំពេញទស្សនកិច្ចសិក្សារវាងទៅវិញទៅមក; ការរៀបចំកម្មវិធីផ្សេងៗ រួមមាន សិក្ខាសាលា វេទិកា និងកម្មវិធីបណ្តុះបណ្តាលក្នុងវិស័យ; ការចែករំលែកព័ត៌មានពាក់ព័ន្ធនឹងវិស័យធានារ៉ាប់រង ជាពិសេសលើការគ្រប់គ្រងស្ថិតិធានារ៉ាប់រង និង ការអភិវឌ្ឍប្រព័ន្ធបច្ចេកវិទ្យាធានារ៉ាប់រង; និង ការបំពេញកិច្ចការផ្សេងទៀតតាមការព្រមព្រៀងរបស់ភាគីទាំងសងខាង។

ឧស្សាហកម្ម​ធានារ៉ាប់រង​របស់​កម្ពុជា បាន​កត់ត្រា​កំណើន​បុព្វលាភ​រ៉ាប់រង​(ប្រាក់ចំណូល) ក្នុងឆ្នាំ២០២៤កន្លងទៅនេះ​​​សម្រេចបាន​ក្នុង​ទឹកប្រាក់​ចំនួន ៣៥៦,៤៥ លាន​ដុល្លារ កើនឡើង ៣,៥ ភាគរយ​ធៀប​ទៅនឹង​រយៈពេល​ដូចគ្នា​កាលពីឆ្នាំ២០២៣​។ ​កំណើនយឺតនេះ ដោយសារតែ​ការធ្លាក់ចុះ​សេដ្ឋកិច្ចពិភពលោក និង​ក្នុង​តំបន់​។​

យោងតាម​របាយការណ៍​បាន​ពី​និយ័ត​ករ​ធានារ៉ាប់រង​កម្ពុជា (IRC) ​នៅក្នុងឆ្នាំ២០២៤កន្លងទៅនេះ បុព្វលាភ​សរុប​រកបាន​ពី​ក្រុមហ៊ុន​ធានារ៉ាប់រង​ទាំង ៤១ របស់​កម្ពុជា ក្នុងនោះ​ក្រុមហ៊ុន​ធានារ៉ាប់រង​ទូទៅ​ចំនួន ១៨ ក្រុមហ៊ុន​ធានារ៉ាប់រង​អាយុជីវិត​ចំនួន ១៤ ក្រុមហ៊ុន​ធានារ៉ាប់រង​ខ្នាតតូច​ចំនួន​៧​។ និង​ក្រុមហ៊ុន​ធានារ៉ាប់រង​បន្ត​ចំនួន ១​។ បច្ចុប្បន្ន ឧស្សាហ​កម្មនេះ​មានទ្រព្យ​សកម្ម​សរុប​ចំនួន ១,១ ពាន់​លាន​ដុល្លារ​។​

ជាមួយគ្នានេះដែរ វិស័យនេះក៏បានធ្វើការទូទាត់សណងដែល​មានទឹកប្រាក់រហូតដល់ ៧៩,៧ ​លាន​ដុល្លារផងដែរ កើនឡើងជិត ២០ ​ភាគរយពី៦៧ ​លាន​ដុល្លារក្នុង​ឆ្នាំ២០២៣៕

​