កម្ពុជាស្វាគមន៍ទេសចរអន្តរជាតិជាង ៦០ ម៉ឺននាក់ នៅខែដំបូងដើមឆ្នាំនេះ

គិតត្រឹមរយៈពេលមួយខែមករា ដើមឆ្នាំ ២០២៥ មានភ្ញៀវទេសចរអន្តរជាតិប្រមាណជាង ៦០ ម៉ឺននាក់ (៦១១ ៨៩៤) បានមកទស្សនាកម្ពុជា មានការកើនឡើង ១៣,៣ ភាគរយ បើប្រៀបធៀបនឹងរយៈពេលដូចគ្នានៅឆ្នាំ ២០២៤។ នេះបើយោងតាមរបាយការណ៍របស់ក្រសួងទេសចរណ៍ចេញផ្សាយនៅថ្ងៃទី ១០ ខែមីនា ឆ្នាំ ២០២៥។

យោងតាមក្រសួងទេសចរណ៍ ក្នុងចំណោមភ្ញៀវទេសចរជាង ៦០ ម៉ឺននាក់ ទេសចរណ៍ថៃឈរនៅ​លំដាប់​លេខរៀងទី ១ មានចំនួនជិត ១៩ ម៉ឺននាក់ កើន ១៥,៧% វៀតណាមជាង ៨ ម៉ឺន ៥ ពាន់នាក់ កើន ០,១% ចិនជិត ៧ ម៉ឺននាក់ កើន ៤៥,៤% កូរ៉េ ២ ម៉ឺន ៧ ពាន់នាក់ ធ្លាក់ចុះ ៥,៩% ឡាវចំនួន ២ ម៉ឺន ៦ ពាន់នាក់ ធ្លាក់ចុះ ២៥,៨%។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ថា ចាប់​តាំង​ពីដើមឆ្នាំ​ ២០២៥ លំហូរភ្ញៀវទេសចរគឺចូលជាលំដាប់ ការកើនឡើងទាំងអស់នេះ មាន​កត្តា​ជា​ច្រើន ដូចជាសុខសន្តិភាព កន្លែងណាមានសុខសន្តិភាព មានស្ថិរភាពនយោបាយ ទើប​ភ្ញៀវ​ទេសចរ​មានទំនុកចិត្តក្នុងការធ្វើដំណើរចូលមក។

លោកស្រីបានបន្ថែមថា ការរៀបចំហេដ្ឋារចនាសម្ព័ន្ធមានផ្លូវថ្នល់ ផ្លូវល្បឿនលឿន​ទៅ​កាន់ទីតាំងតំបន់ទេសចរណ៍​ក៏ជាកត្តាទាក់ទាញភ្ញៀវទេសចរផងដែរ។

លោក ខៀវ ធី ប្រធាន​សមាគមន៍​មគ្គុទ្ទេសក៏​ទេសចរ​អង្គរ ប្រាប់កម្ពុជាថ្មីថា ជាទូទៅកម្ពុជាមាន​កំណើន​ទេសចរខ្លាំងនៅរដូវ High Season ចាប់ពីខែ ១១ ដល់ខែ ០២ ដោយសារស្រុក​គេចុះ​ត្រជាក់​ទឹក​កកច្រើនគេមកលេងស្រុកក្ដៅ ខណៈកម្ពុជាទទួលទេសចរណ៍មួយចំនួនតភ្ជាប់ជើង​ហោះ​ហើរពី​វៀត​​​​​ណាម។

លោក ខៀវ ធីបានបញ្ជាក់ថា ភ្ញៀវបរទេសចាប់ផ្ដើមស្គាល់កម្ពុជា និងបានណែនាំបងប្អូនសាច់​ញាតិ​​គេ​ឱ្យ​មកលេង ខណៈកម្ពុជាមានសុវត្ថិភាព សន្តិសុខ អនាម័យ ដែលទេសចរ​មកលេង​ជា​បន្ត​​បន្ទាប់​។

នៅក្នុងឆ្នាំ ២០២៤ កម្ពុជាទទួលបាន​ទេស​ចរណ៍​​​អន្តរជាតិជាង ៦,៧ លាននាក់ កើនឡើង ២៣% ធៀបនឹងឆ្នាំ ២០២៣ ក្នុងនោះ​ទទួល​បាន​ចំណូលសរុបជាង ៣,៦៣ ពាន់លានដុល្លារ កើនជាង ១៧%។ នេះបើតាមក្រសួងទេស​ចរណ៍៕

អត្ថបទ៖ ឡេង ដេត