ព័ត៌មានអន្ដរជាតិ

ការនាំចេញទំនិញកសិកម្មវៀតណាម កើនខ្ពស់បំផុតក្នុងរយៈពេល៥ឆ្នាំ

បានផុស

៣ សប្តាហ៍ មុន

នៅ

ថ្ងៃពុធ ១២ មីនា ២០២៥

ដោយ

ទិន្នន័យពីក្រសួងកសិកម្ម និងបរិស្ថានវៀតណាម ដែលចេញផ្សាយកាលពីថ្ងៃអង្គារ បានឱ្យដឹងថា ការនាំចេញផលិតផលកសិកម្ម រុក្ខាប្រមាញ់ និងនេសាទរបស់វៀតណាម បានកើនឡើងដល់កម្រិតខ្ពស់ក្នុងរយៈពេល ៥ ឆ្នាំ នៅខែមករា-កុម្ភៈ ឆ្នាំនេះ។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណូលនៃការនាំចេញ បានកើនឡើងដល់ ៩,៣៨ ប៊ីលានដុល្លារ ក្នុងកំណើនប្រមាណ ៨,៣ ភាគរយ ឆ្នាំលើឆ្នាំ ខណៈគិតតែក្នុងខែកុម្ភៈ ការនាំចេញសម្រាប់វិស័យដដែល បានហក់ឡើងខ្ពស់ខ្លាំងដល់ប្រមាណ ៤,៤ ប៊ីលានដុល្លារ ឬ ៣២,៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។

លើសពីនេះ ទិន្នន័យបង្ហាញផងដែរថា អតិរេកពាណិជ្ជកម្មពីវិស័យកសិកម្ម បានឈានដល់ ២,០៥ ប៊ីលានដុល្លារ ក្នុងរយៈពេល២ខែដើមឆ្នាំដដែល។

អ្នកជំនាញមើលឃើញថា ការកើនឡើងនៃការនាំចេញរបស់វៀតណាម កើតចេញពីកំណើននៃផលិតកម្មក្នុងស្រុក ក៏ដូចជាកំណើននៃតម្រូវការសកល ទោះបីជាសេដ្ឋកិច្ចពិភពលោកកំពុងធ្លាក់ចូលទៅក្នុងភាពស្រពិចស្រពិលក៏ដោយ។

រដ្ឋមន្ត្រីក្រសួងកសិកម្ម និងបរិស្ថានវៀតណាម លោក Đỗ Đức Duy បានគូសបញ្ជាក់អំពីតួនាទីសំខាន់នៃវិស័យនេះ ក្នុងការទ្រទ្រង់កំណើនការនាំចេញរបស់ប្រទេស។ លោកបានជំរុញឲ្យមានការខិតខំប្រឹងប្រែងក្នុងការទាញយកសន្ទុះនេះ ខណៈធានាថា ការរៀបចំរចនាសម្ព័ន្ធរបស់ក្រសួងមិនរំខានដល់ផលិតកម្ម ឬជីវភាពរស់នៅឡើយ៕