ព័ត៌មានអន្ដរជាតិ

មន្រ្តីជាន់ខ្ពស់សិង្ហបុរី ព្រមានពីហានិភ័យពន្ធលើកំណើនសេដ្ឋកិច្ចសកល

បានផុស

៣ សប្តាហ៍ មុន

នៅ

ថ្ងៃពុធ ១២ មីនា ២០២៥

ដោយ

មន្ត្រីពាណិជ្ជកម្មកំពូលរបស់សិង្ហបុរី បានព្រមានថា ចំណាត់ការផ្សេងៗ ជាពិសេសវិធានការពន្ធពីសហរដ្ឋអាមេរិក និងប្រទេសផ្សេងទៀត កំពុងបង្កហានិភ័យដែលអាចបង្ខូចដល់កំណើនសេដ្ឋកិច្ចពិភពលោក។ នេះបើតាមការចុះផ្សាយរបស់សារព័ត៌មាន Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបនាយករដ្ឋមន្ត្រីសិង្ហបុរី លោក Gan Kim Yong បាននិយាយនៅថ្ងៃពុធនេះ ក្នុងកម្មវិធី Converge Live របស់បណ្ដាញទូរទស្សន៍ CNBC ថា៖ «ពួកយើងជាច្រើននាក់នៅទីនេះ ពោលគឺនៅអាស៊ី ឃ្លាំមើលដោយក្តីបារម្ភអំពីពន្ធរបស់ប្រធានាធិបតី[សហរដ្ឋអាមេរិក] ដូណាល់ ត្រាំ លើដៃគូពាណិជ្ជកម្មធំបំផុតទាំង ៣ របស់សហរដ្ឋអាមេរិក និងផែនការបន្តបន្ទាប់របស់លោកផ្សេងៗទៀត»។

លោក Gan ដែលជារដ្ឋមន្ត្រីក្រសួងពាណិជ្ជកម្ម និងឧស្សាហកម្មផងដែរនោះ បាននិយាយថា ទោះបីជាប្រទេសនៅអាស៊ី មិនរងផលប៉ះពាល់ដោយផ្ទាល់ទាំងអស់គ្នាក៏ដោយ ប៉ុន្តែផលប៉ះពាល់នៃកំណើនភាពតានតឹងពីពន្ធគយ និងសង្គ្រាមពាណិជ្ជកម្ម អាចបណ្តាលឱ្យមានការរំខានយ៉ាងធ្ងន់ធ្ងរដល់ខ្សែច្រវ៉ាក់ផ្គត់ផ្គង់ និងធ្វើឱ្យលំហូរពាណិជ្ជកម្ម និងការវិនិយោគថយចុះ។ លោកបន្តថា បញ្ហានេះនឹង «ប៉ះពាល់ធ្ងន់ធ្ងរដល់កំណើនសេដ្ឋកិច្ចពិភពលោក»។

សិង្ហបុរី ដែលជាប្រទេសមានសេដ្ឋកិច្ចដ៏ធំបំផុតមួយនៅអាស៊ី បានកសាងភាពរីកចម្រើនរបស់ខ្លួនតាមរយៈកំពង់ផែដ៏មមាញឹក និងជាយុទ្ធសាស្រ្តនៅអាស៊ីប៉ាស៊ីហ្វិក ខណៈជាប្រទេសនាំចេញគ្រឿងអេឡិចត្រូនិក និងឱសថដ៏សំខាន់។ ប៉ុន្តែដូចប្រទេសពឹងផ្អែកខ្លាំងលើពាណិជ្ជកម្មផ្សេងទៀតដែរ បុរីរដ្ឋមួយនេះបានតាមដានយ៉ាងដិតលើវិធានការពន្ធរបស់ ត្រាំ ដែលបានដាក់ពន្ធ ២៥ ភាគរយ លើកាណាដា ម៉ិកស៊ិក និងចិន ដែលបង្កជាការសងសឹកពីកាណាដា និងចិន។

ពន្ធលើកាណាដា និងម៉ិកស៊ិក ត្រូវបានពន្យាពេលអនុវត្តរហូតដល់ខែក្រោយ ខណៈពន្ធ ២០ ភាគរយ លើទំនិញចិនត្រូវបានបន្ត។ យ៉ាងណាមិញ ពន្ធរបស់លោក ត្រាំ លើដែកថែប និងអាលុយមីញ៉ូមនាំចូលទាំងអស់ រំពឹងថានឹងចូលជាធរមាននៅថ្ងៃពុធនេះ៕