ព័ត៌មានអន្ដរជាតិ

រដ្ឋមន្រ្តីថៃថា ប្រទេសខ្លួនកំពុងទទួលប្រយោជន៍ពីសង្រ្គាមពាណិជ្ជកម្ម

បានផុស

១ នាទីute មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បាននិយាយកាលពីថ្ងៃពុធថា ប្រទេសថៃកំពុងទទួលបានអត្ថប្រយោជន៍ពីសង្គ្រាមពាណិជ្ជកម្មពិភពលោក ដោយលំហូរចូលកាន់តែច្រើននៃការវិនិយោគពីបរទេស ទោះបីជាមានការព្រួយបារម្ភខ្លាំងពីភាគីផ្សេងៗពីហានិភ័យជុំវិញគោលនយោបាយពន្ធរបស់អាមេរិកក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈមិនបញ្ជាក់ជាលម្អិតនៃតួលេខណាមួយស្ដីពីទិដ្ឋភាពនៃលំហូរវិនិយោគបរទេសនាដើមឆ្នាំ ២០២៥ លោក Pichai បានមានប្រសាសន៍ថា ការវិនិយោគបរទេសចូលថៃ នឹងជួយធ្វើឱ្យកំណើនសេដ្ឋកិច្ចខិតទៅកាន់តែខិតនឹងកំណើនគោលដៅ ៣-៣,៥ ភាគរយ។ លោកបានបន្ថែមថា សេដ្ឋកិច្ចថៃមានស្ថិរភាពសារពើពន្ធ ជាមួយនឹងសាច់ប្រាក់ងាយស្រួលច្រើន ដែលជាការទាក់ទាញសម្រាប់អ្នកវិនិយោគ។

ខណៈថៃជួបនឹងបញ្ហាសេដ្ឋកិច្ចក្នុងស្រុក ដូចជាកម្សោយតម្រូវការ និងបំណុលគ្រួសារខ្ពស់ ប្រទេសនេះត្រូវពឹងផ្អែកខ្លាំងលើវិស័យទេសចរណ៍ និងការនាំចេញ ដើម្បីជំរុញកំណើនសេដ្ឋកិច្ច។ លោក Pichai បានឱ្យដឹងថា រដ្ឋាភិបាលរំពឹងពីកំណើន ៤ ភាគរយ សម្រាប់ការនាំចេញនៅឆ្នាំនេះ។

ការលើកឡើងរបស់មន្រ្តីដដែល ធ្វើឡើងចំពេលមានការព្រួយបារម្ភពីផលប៉ះពាល់លើការនាំចេញរបស់ថៃ ជាពិសេសទៅកាន់សហរដ្ឋអាមេរិក ក្រោមលទ្ធភាពពន្ធរបស់ប្រធានាធិបតី ដូណាល់ ត្រាំ។ យោងតាមគណៈកម្មាធិការអចិន្ត្រៃយ៍រួមស្តីពីពាណិជ្ជកម្ម ឧស្សាហកម្ម និងធនាគារ (JSCCIB) ការចំណាយប្រតិបត្តិការសម្រាប់ការនាំចេញរបស់ថៃ ទំនងជាកើនឡើងពី ៦-៨ ភាគរយ ជាមធ្យម ដោយសារគោលនយោបាយពន្ធដ៏គឃ្លើនរបស់លោក ត្រាំ លើទំនិញនាំចូល។

ចំណែកឯសហព័ន្ធឧស្សាហកម្មថៃ (FTI) វិញ បានរាយការណ៍ថា ឧស្សាហកម្មរថយន្តថៃដែលធ្លាក់ចុះរួចស្រាប់ហើយនោះ អាចនឹងកាន់តែអាក្រក់ទៅៗ ប្រសិនបើលោក ត្រាំ ជំរុញផែនការដំឡើងពន្ធលើការនាំចូលរថយន្ត ដែលលោកបានបានប្រកាសនាពេលកន្លងមក។ ទន្ទឹមនឹងនេះ សភាពាណិជ្ជកម្មថៃឯណោះវិញ ក៏កំពុងអំពាវនាវឱ្យរដ្ឋាភិបាលថៃបង្កើតក្រុមការងារ ដើម្បីដោះស្រាយការគំរាមកំហែងពន្ធពីសំណាក់រដ្ឋបាល ត្រាំ ផងដែរ៕