ថៃ​ជំរុញ​ឱ្យ​មានកិច្ចព្រមព្រៀង​ពាណិជ្ជកម្ម​សេរី​ជាមួយ EU ត្រឹម​​ឆ្នាំ​​នេះ

រដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បាន​ឱ្យដឹងនៅ​ថ្ងៃសុក្រ​នេះ​ថា លោកបានជួបពិភាក្សាជាមួយ​ស្នងការអឺរ៉ុបស្តីពីពាណិជ្ជកម្ម សន្តិសុខសេដ្ឋកិច្ច ទំនាក់ទំនងអន្តរស្ថាប័ន និងតម្លាភាព ​លោក Maroš Šefčovič ​កាលពីដើមសប្ដាហ៍ អំពីការជំរុញការចរចាពាណិជ្ជកម្មសេរីថៃ-សហភាពអឺរ៉ុប (FTA) ធ្វើយ៉ាងណាឱ្យសម្រេចវា​បាន​នៅឆ្នាំ ២០២៥។ នេះបើតាម​ការចុះផ្សាយរបស់​កាសែត The Nation ។

ក្រសួងពាណិជ្ជកម្មថៃ កំពុងធ្វើការដើម្បីបញ្ចប់ការចរចានៅឆ្នាំនេះ ដើម្បីជំរុញកិច្ចព្រមព្រៀងសម្រាប់ការពង្រីកទីផ្សារ ការកាត់បន្ថយការចំណាយ ពង្រឹងសមត្ថភាពអាជីវកម្ម និងការទាក់ទាញវិនិយោគិនពី​អឺរ៉ុបកាន់តែច្រើន។

លោក Pichai បាននិយាយ​យ៉ាងដូច្នេះថា៖ «សហភាពអឺរ៉ុបតំណាងឱ្យទីផ្សារសេដ្ឋកិច្ចដ៏សំខាន់ និងជាដៃគូពាណិជ្ជកម្មដ៏សំខាន់សម្រាប់ប្រទេសថៃ​។ ការបញ្ចប់ការចរចា FTA ដោយជោគជ័យ នឹង​ធ្វើ​ឱ្យ​ផលិតផលថៃ​មាន​ការ​ប្រកួតប្រជែងក្នុងទីផ្សារពិភពលោក កាត់បន្ថយថ្លៃដើមផលិតកម្ម ទាក់ទាញការវិនិយោគ និងជំរុញកំណើនសេដ្ឋកិច្ចសម្រាប់ភាគីទាំង​២»។

ការចរចា FTA រវាង​ថៃ-សហភាពអឺរ៉ុប បានឆ្លងកាត់ ៤ ជុំរួចមកហើយ ​ហើយពេលនេះភាគីទាំង​២ កំពុង​ពិភាក្សាស្តីពីការចូលទៅកាន់ទីផ្សារសម្រាប់ទំនិញ និងសេវាកម្ម​ និងកំណត់គោលដៅឈានដល់កិច្ចព្រមព្រៀង​មួយ​ឱ្យ​បាន​នៅត្រឹម​ថ្ងៃទី ២៥ ខែធ្នូ។ ​

គួរគូស​បញ្ជាក់ថា​ សហភាពអឺរ៉ុបជាប់ចំណាត់ថ្នាក់ជាដៃគូពាណិជ្ជកម្មធំជាងគេទី ៤ របស់ប្រទេសថៃ (បន្ទាប់ពីចិន អាមេរិក និងជប៉ុន) ជាមួយ​នឹង​តម្លៃពាណិជ្ជកម្មសរុប ២៥,១៩ ប៊ីលាន​អឺរ៉ូ ក្នុងឆ្នាំ ២០២៣​៕