ព័ត៌មានអន្ដរជាតិ

តម្លៃប្រេងកើនឡើង ជុំវិញភាពតានតឹងជាថ្មីនៅមជ្ឈិមបូព៌ា

បានផុស

២៨ វិនាទី មុន

នៅ

ថ្ងៃចន្ទ ១៧ មីនា ២០២៥

ដោយ

តម្លៃប្រេងអន្តរជាតិបានកើនឡើងប្រមាណ ១ ភាគរយ នៅពេលបើកការជួញដូរនៅថ្ងៃចន្ទនេះ បន្ទាប់ពីសហរដ្ឋអាមេរិកប្ដេជ្ញាបន្តការវាយប្រហារលើក្រុមឧទ្ទាមហ៊ូធីរបស់យ៉េមែន ទាល់តែក្រុមគាំទ្រដោយអ៊ីរ៉ង់មួយនេះ ឈប់វាយប្រហារលើនាវាអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានកើនឡើង ៧២ សេន ឬ ១,០២ ភាគរយ ដោយបើកការជួញដូរនៅតម្លៃ ៧១,៣០ ដុល្លារ/បារ៉ែល នាព្រឹកថ្ងៃចន្ទនេះ ខណៈតម្លៃប្រេងឆៅអាមេរិក ម៉ាក West Texas Intermediate (WTI) បានកើនឡើង ៧២ សេន ឬ ១,១ ភាគរយ ដោយជួញដូរនៅតម្លៃ ៦៧,៩០ ដុល្លារ/បារ៉ែល។

ភាពតានតឹងនៅមជ្ឈិមបូព៌ា ជាធម្មតាធ្វើឱ្យតម្លៃប្រេងកើនឡើង ដោយសារតែតំបន់នេះគឺជាប្រភពផ្គត់ផ្គង់ប្រេងសំខាន់ ហើយក៏ជាច្រកដឹកជញ្ជូនទំនិញផងដែរ។ ភាពតានតឹងជាថ្មី កើនឡើងបន្ទាប់ពីក្រុមហ៊ូធីបើកការវាយប្រហារលើនាវារបស់សហរដ្ឋអាមេរិកនៅសមុទ្រក្រហមកាលពីថ្ងៃអាទិត្យ ហើយជាការឆ្លើយតប សហរដ្ឋអាមេរិកបានវាយប្រហារទម្លាក់គ្រាប់បែកនៅទីក្រុងសាណា និងខេត្ត Saada ដោយសម្លាប់មនុស្ស ៥៣ នាក់ រួមទាំងជនស៊ីវិល។

ក្នុងអត្រាប្រចាំសប្ដាហ៍សម្រាប់ការជួញដូរកាលសប្ដាហ៍មុន តម្លៃប្រេងបានកើនឡើងតិចតួចមកវិញ ក្រោយធ្លាក់ចុះ ៣ សប្ដាហ៍ជាប់ៗគ្នា ជុំវិញក្ដីបារម្ភពីភាពយឺតយ៉ាវនៃកំណើនសេដ្ឋកិច្ចសកល ដោយសារតែគោលនយោបាយពន្ធរបស់ប្រធានាធិបតីអាមេរិក លោក ដូណាល់ ត្រាំ។

បញ្ហាសេដ្ឋកិច្ចអាចធ្វើឱ្យតម្រូវការប្រេងខ្សោយ ខណៈគេក៏រំពឹងផងដែរថា ការផ្គត់ផ្គង់ពីអង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) នឹងកើនឡើង ដែលឱ្យតម្លៃធ្លាក់ចុះមកវិញ។

យ៉ាងណាមិញ ការកើនឡើង ឬការធ្លាក់ចុះ មានភាពប្រទាញប្រទង់គ្នាជុំវិញបញ្ហាភូមិសាស្រ្តនយោបាយ រួមទាំងជម្លោះអ៊ុយក្រែន-រុស្ស៊ី និងជម្លោះមជ្ឈិមបូព៌ា៕