ព័ត៌មានជាតិ

លោក ហ៊ូ វណ្ឌី៖ ការអភិរក្សតំបន់អន្ទង់អាំង មិនត្រឹមជួយពលរដ្ឋឱ្យទទួលបានចំណូល ថែមអាចទាញទេសចរកាន់តែច្រើនមកកម្ពុជា

បានផុស

៧ វិនាទី មុន

នៅ

ថ្ងៃចន្ទ ១៧ មីនា ២០២៥

ដោយ

លោក ហ៊ូ វណ្ឌី ទីប្រឹក្សាសមាគមទេសចរណ៍កម្ពុជា បានមើលឃើញថា តាមរយៈការអភិរក្សតំបន់ភ្នំ១៥០០ ឬភាគច្រើនត្រូវគេហៅថាជាតំបន់អន្ទង់អាំង មិនត្រឹមតែជួយពលរដ្ឋឱ្យទទួលបានចំណូលប៉ុណ្ណោះទេ ប៉ុន្តែថែមទាំងអាចទាក់ទាញភ្ញៀវទេសចរកាន់តែច្រើនបន្ថែមទៀតឱ្យចូលមកទស្សនានៅក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ូ វណ្ឌី បានប្រាប់ «កម្ពុជាថ្មី» ថា ចំពោះការអភិរក្ស អន្ទង់អាំងជើងភ្នំ១៥០០ ត្រូវអភិរក្សជាតំបន់អភិរក្សឧទ្យានជាតិដូចពីមុន នេះ គឺពិតមានភាពល្អប្រសើរ និងផ្តល់ផលប្រយោជន៍ជាច្រើនដល់ពលរដ្ឋដែលរស់នៅទីនោះ និងថែមអាចទាញចំណូលចូលរដ្ឋ ព្រោះផ្លូវនៅទីនោះមានលក្ខណៈអំណោយផលបែបទេសចរណ៍ពីធម្មជាតិ។

ប៉ុន្តែបើទោះបីជាតំបន់ភ្នំ១៥០០ មានការអំណោយផលពីធម្មជាតិក្តី តែក៏ទាមទារឱ្យមានការកែច្នៃតិចតួចបន្ថែមដើម្បីអភិរក្ស និងការអភិវឌ្ឍន៍ ព្រោះប្រសិនបើមានការអភិវឌ្ឍន៍តិចតួច ក៏បង្កការលំបាកដល់ទេសចរទៅដល់។

លោកថា៖« យើងបានឃើញហើយថា តំបន់អន្ទង់អាំងនេះ គឺពិតជាទទួលបានការទាក់ទាញខ្លាំងពីសំណាក់ភ្ញៀវទេសចរជាតិ និងអន្តរជាតិ ទី១ គឺកត្តាអាកាសធាតុអំណោយផល ទី២ តំបន់ព្រៃឈើ និងទី៣ ទេសភាព ពេលមើលពីលើភ្នំមកផ្លូវនេះ មានរូបរាងដូចជាអន្ទង់អាំងពិតមែន»។

«ដូច្នេះ ការសម្រេចអភិរក្សតំបន់អន្ទង់អាំងនេះ នឹងបន្តជួយអូសទាញទេសចរទាំងក្នុងស្រុក និងក្រៅស្រុក ឱ្យទៅលេងកម្សាន្តតំបន់មួយនេះកាន់តែច្រើនកុះករបន្ថែម ហើយនៅថ្ងៃអនាគតប្រសិនជាមានការអភិវឌ្ឍន៍ល្អ ដែលនាំឱ្យតំបន់នោះកាន់តែមានការទាក់ទាញខ្លាំងនោះនឹងមានភ្ញៀវទេសចរកាន់តែច្រើន ដែលអាចជួយឱ្យប្រជាពលរដ្ឋអាចទទួលបានចំណូលសម្រាប់ផ្គត់ផ្គង់នៅក្នុងជីវភាពគ្រួសារ ហើយថែមទាំងអាចឱ្យរដ្ឋទទួលបានចំណូលតាមរយៈការទាក់ទាញនេះបន្ថែមដែរ»។ នេះបើយោងតាមការលើកឡើងរបស់លោក ហ៊ូ វណ្ឌី។

ស្របពេលជាមួយគ្នានេះ លោក ហ៊ូ វណ្ឌី ក៏បានបន្ថែមដែរថា បើទោះបីជាតំបន់នោះជាតំបន់ដែលមានការទាក់ទាញស្រាប់ក៏ដោយ ប៉ុន្តែយើងក៏ត្រូវតែផ្តល់ឱកាសទៅឱ្យអ្នកវិនិយោគទាំងក្នុងស្រុក និងក្រៅស្រុក ព្រោះការវិនិយោគដោយមានតម្លាភាព វាជួយផ្តល់នូវការអភិវឌ្ឍន៍ទៅដល់សេដ្ឋកិច្ចទាំងមូល នេះក៏ជារឿងមួយដែលយើងគិត ហើយរំពឹងថានឹងទទួលបាននៅថ្ងៃក្រោយ។

ទីប្រឹក្សាសមាគមទេសចរណ៍កម្ពុជារូបនេះ ក៏បានសំណូមពរទៅដល់ប្រជាពលរដ្ឋ និងភ្ញៀវទេសចរ មេត្តារួមគ្នាពង្រឹងនូវអនាម័យតាមដងផ្លូវ និងការធ្វើចរាចរណ៍ឱ្យមានរបៀបរៀបរយ ព្រោះនេះគឺជាការចង់បានរបស់ភ្ញៀវទេសចរទាំងក្នុងស្រុក និងក្រៅស្រុកផងដែរ។

តំបន់អន្ទង់អាំងជើងភ្នំ១៥០០ នេះ គឺត្រូវអភិរក្សជាតំបន់អភិរក្សឧទ្យានជាតិដូចពីមុន ហើយការអភិរក្សជាតំបន់អភិរក្សឧទ្យានជាតិនេះទៀតសោធ គឺដើម្បីជាផលប្រយោជន៍សាធារណៈ ក្រោយទទួលបានសំណូមពរយ៉ាងទទូច ពីសំណាក់ប្រជាជនទូទាំងប្រទេស ក៏ដូចជាពលរដ្ឋក្នុងភូមិសាស្ត្រខេត្តពោធិ៍សាត់ទាំងមូល ដែលស្នើដល់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អភិរក្សតំបន់នេះជាដាច់ខាត៕