ព័ត៌មានអន្ដរជាតិ

តម្លៃមាសអន្តរជាតិ បំបែកកំណត់ត្រាថ្មី ខ្ពស់ជាង ៣ ០០០ ដុល្លារ/អោន

បានផុស

២ សប្តាហ៍ មុន

នៅ

ថ្ងៃអង្គារ ១៨ មីនា ២០២៥

ដោយ

តម្លៃមាសអន្តរជាតិសម្រាប់ការជួញដូរនៅថ្ងៃអង្គារនេះ បានបំបែកកំណត់ត្រាខ្ពស់បំផុតជាថ្មី និងជាលើកទី២ក្នុងប្រវត្តិសាស្រ្តដែលវាថ្លៃលើស ៣ ០០០ ដុល្លារ/អោន ដោយសារតែកង្វល់សេដ្ឋកិច្ចជុំវិញគោលនយោបាយពន្ធរបស់ប្រធានាធិបតីអាមេរិក លោក ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើទីផ្សារអាស៊ីនាព្រឹកថ្ងៃអង្គារនេះ មាសជួញដូរដោយផ្ទាល់ មានតម្លៃ ៣ ០០៥,០៩ ដុល្លារ/អោន។ កម្រិតខ្ពស់បំផុតជាលើកដំបូងគឺ ៣ ០០៤,៨៦ ដុល្លារ/អោន សម្រាប់ការជួញដូរកាលពីថ្ងៃសុក្រ សប្ដាហ៍មុន។

រាប់តាំងពីដើមឆ្នាំ ២០២៥ មក តម្លៃមាសបានកើនឡើង ១៤ ភាគរយ រួចទៅហើយ ដោយសារតែការព្រួយបារម្ភសេដ្ឋកិច្ច និងបញ្ហាភូមិសាស្រ្តនយោបាយ។ រាប់តាំងពីលោក ត្រាំ ឡើងកាន់អំណាចនៅខែមករាមក តម្លៃមាសបានបំបែកកំណត់ត្រាខ្ពស់បំផុត ប្រមាណ ១៤ ដង ដោយសង្រ្គាមពាណិជ្ជកម្មក្រោមគោលនយោបាយពន្ធគយរបស់លោក ធ្វើឱ្យវិនិយោគិនងាកទៅទិញទ្រព្យសម្បត្តិសុវត្ថិភាពមួយនេះ។

គេមើលឃើញថា កំណើនតម្លៃ ៣ ០០០ ដុល្លារ/អោននេះ កើតឡើងតាមការព្យាករទុករបស់ធនាគារអន្តរជាតិធំៗជាច្រើន។ ក្រោមការវិវត្តចុងក្រោយ ធនាគារវិនិយោគ UBS បានបង្កើនការព្យាករតម្លៃមាសរបស់ខ្លួនដល់ ៣ ២០០ ដុល្លារ/អោន ពីត្រឹម ៣ ០០០ ដុល្លារ/អោន ក្នុងការព្យាករកាលពីលើកមុនដោយលើកឡើងពីហានិភ័យគោលនយោបាយផ្សេងៗដែលកំពុងបន្ត និងជម្លោះពាណិជ្ជកម្មដែលកាន់តែអាក្រក់ទៅៗ៕