អាមេរិកហាមឃាត់ការប្រើប្រាស់ DeepSeek លើឧបករណ៍រដ្ឋាភិបាល

​ការិយាល័យក្រសួង​ពាណិជ្ជកម្ម​សហរដ្ឋអាមេរិក បានជូនដំណឹងដល់បុគ្គលិករបស់​ខ្លួន​កាលពីពេល​ថ្មីៗនេះ​ថា​ ការប្រើ​ប្រាស់​បញ្ញាសិប្បនិ​ម្មិតចិន​ ​DeepSeek ត្រូវបានហាមឃាត់នៅលើឧបករណ៍រដ្ឋាភិបាល​។ នេះបើតាម​ការចុះផ្សាយរបស់​ទីភ្នាក់ងារសារព័ត៌មាន​រ៉យទ័រ​។

ក្រសួងបាននិយាយ​ក្នុងអ៊ីម៉ែល​ទៅកាន់បុគ្គិលថា​៖ «ដើម្បីជួយរក្សាប្រព័ន្ធព័ត៌មានរបស់ក្រសួងពាណិជ្ជកម្មឱ្យមានសុវត្ថិភាព ការ​ប្រើប្រាស់ ​DeepSeek ដែលមានមូលដ្ឋាននៅចិន​ ត្រូវបានហាមឃាត់នៅគ្រប់ឧបករណ៍រដ្ឋាភិបាល​ទាំងអស់»។ ​

ក្រសួងបន្តថា​៖ «សូម​កុំទាញយក ចូលមើល ចូលប្រើកម្មវិធីណាមួយ កម្មវិធីកុំព្យូទ័រ ឬគេហទំព័រដែលទាក់ទងនឹង DeepSeek»។

សមាជិកសភាអាមេរិក លោក​ Josh Gottheimer និងលោក​ Darin LaHood បានដាក់សំណើរ​ច្បាប់មួយកាលពីខែកុម្ភៈ ដើម្បីហាមឃាត់ DeepSeek លើឧបករណ៍រដ្ឋាភិបាល។ កាលពីដើមខែនេះ ​អ្នកទាំង ២ បានជំរុញឱ្យអភិបាលសហរដ្ឋអាមេរិកធ្វើដូចគ្នា។ នៅក្នុងលិខិតមួយ​ចុះថ្ងៃទី ៣ ខែមីនា ពួកគេបានព្រមានថា ការប្រើប្រាស់ DeepSeek អាចចែករំលែកព័ត៌មានរសើបដោយមិនដឹងខ្លួនជាមួយបក្សកុម្មុយនិស្តចិន (CCP) ដែលអាចជាទ្រព្យសម្បត្តិដ៏មានតម្លៃដល់សត្រូវបរទេស។

ប្រតិកម្មទៅនឹង​ព័ត៌មាន​ចុង​ក្រោយ ​អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ប្រទេសចិនប្រឆាំងនឹងការប្រើប្រាស់ហួសហេតុនៃកង្វល់សន្តិសុខជាតិ និង​ការយក​បញ្ហាសេដ្ឋកិច្ច ពាណិជ្ជកម្ម និងបច្ចេកវិទ្យា ធ្វើនយោបាយ​។ លោក​ស្រី​ក៏​បាន​សង្កត់​ធ្ងន់​ផងដែរ​ថា ចិន​នឹង​ការពារ​យ៉ាង​ខ្លាំង​នូវ​សិទ្ធិ និង​ផល​ប្រយោជន៍​របស់​ក្រុមហ៊ុន​ចិន៕