ព័ត៌មានអន្ដរជាតិ

DayOne គ្រោងវិនិយោគ ១ ប៊ីលានដុល្លារលើមជ្ឈមណ្ឌលទិន្នន័យនៅថៃ

បានផុស

១ សប្តាហ៍ មុន

នៅ

ថ្ងៃពុធ ១៩ មីនា ២០២៥

ដោយ

ក្រុមហ៊ុនមជ្ឈមណ្ឌលទិន្នន័យសិង្ហបុរី DayOne បានប្ដេជ្ញាបណ្ដាក់ទុនប្រមាណ ១ ប៊ីលានដុល្លារសហរដ្ឋអាមេរិកក្នុងរយៈពេល ៣ ឆ្នាំ សម្រាប់ការអភិវឌ្ឍមជ្ឈមណ្ឌលទិន្នន័យនៅក្នុងប្រទេសថៃ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនបាននិយាយថា ប្រសិនបើថៃអាចកាត់បន្ថយតម្លៃអគ្គិសនីមកត្រឹម ២,៥០ បាត/គីឡូវ៉ាត់ម៉ោង ដែលជាអត្រាទាបបំផុតនៅអាស៊ីអាគ្នេយ៍នោះ នោះទស្សនវិស័យសម្រាប់អាជីវកម្មមជ្ឈមណ្ឌលទិន្នន័យថៃ នឹងកាន់តែប្រសើរឡើង។

ការវិនិយោគរបស់ DayOne នៅ ថៃ គឺជាគម្រោងមជ្ឈមណ្ឌលទិន្នន័យធំជាងគេទី២របស់ក្រុមហ៊ុន បន្ទាប់ពីគម្រោងនៅម៉ាឡេស៊ី។ នាយកប្រតិបត្តិ Jamie Khoo បាននិយាយថា ក្រុមហ៊ុនបានជ្រើសរើសថៃ ដោយសារគោលនយោបាយគាំទ្ររបស់រដ្ឋាភិបាល កំណើនសេដ្ឋកិច្ចឌីជីថល ការតភ្ជាប់ដ៏រឹងមាំនៅក្នុងឥណ្ឌូចិន។

បើតាមបាងកកប៉ុស្តិ៍ ក្រុមហ៊ុន DayOne បានទទួលការយល់ព្រមសម្រាប់ការវិនិយោគ ១ ប៊ីលានដុល្លាររបស់ខ្លួនពីក្រុមប្រឹក្សាវិនិយោគថៃ ដោយនឹងអភិវឌ្ឍមជ្ឈមណ្ឌលទិន្នន័យមានសមត្ថភាពសរុប ១៨០ មេហ្គាវ៉ាត់។

ដំណាក់កាលដំបូងនៃការអភិវឌ្ឍ គ្រោងនឹងបញ្ចប់នៅត្រីមាសទី ២ នៃឆ្នាំ ២០២៦ ខណៈដំណាក់កាលទី ២ កំពុងស្ថិតក្រោមការត្រួតពិនិត្យ ប៉ុន្តែអាចនឹងចាប់ផ្តើមនៅដើមឆ្នាំ ២០២៧។

គួរគូសបញ្ជាក់ថា ក្រុមហ៊ុន DayOne មានមជ្ឈមណ្ឌលទិន្នន័យក្នុងទីផ្សារអាស៊ីសំខាន់ៗ រួមមានសិង្ហបុរី ម៉ាឡេស៊ី ឥណ្ឌូណេស៊ី ថៃ ហុងកុង និងជប៉ុន។ ការប្ដេជ្ញាបោះទុននៅថៃចុងក្រោយ ធ្វើឡើងខណៈថៃក្លាយជាទីតាំងដ៏ទាក់ទាញសម្រាប់អ្នកវិនិយោគិនលើវិស័យមជ្ឈមណ្ឌលទិន្នន័យ ដោយគេឃើញមានក្រុមហ៊ុនយក្សផ្សេងៗបានវិនិយោគដូចជា Google, Amazon Web Services, Microsoft និង TikTok ជាដើម៕