ព័ត៌មានអន្ដរជាតិ

Bangkok Airways គ្រោងទិញយន្តហោះថ្មី ៣០ គ្រឿង ខណៈទេសចរណ៍ស្ទុះឡើង

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

ក្រុមហ៊ុនអាកាសចរណ៍ថៃ Bangkok Airways គ្រោងនឹងបញ្ជាទិញយន្តហោះថ្មីរហូតដល់ ៣០ គ្រឿង ដើម្បីបន្ថែមជើងហោះហើររបស់ក្រុមហ៊ុន ក៏ដូចជាត្រៀមខ្លួនសម្រាប់កំណើនទេសចរ ដែលជំរុញដោយភាពល្បីល្បាញនៃរឿងភាគអាមេរិកដែលថតនៅថៃ «The White Lotus»។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកប្រតិបត្តិក្រុមហ៊ុន លោក Puttipong Prasarttong-Osoth បានឱ្យដឹងថា Bangkok Airways គ្រោងនឹងទិញយន្តហោះច្រកដើរតែមួយ យ៉ាងហោចណាស់ ២០ គ្រឿង ពីក្រុមហ៊ុនផលិតយន្តហោះ Airbus, Boeing និង Embraer ក្នុងឆមាសទី ១ នៃឆ្នាំនេះ ហើយអាចនឹងទិញ ១០ គ្រឿងបន្ថែមទៀតនៅពេលក្រោយ។

ក្រុមហ៊ុនអាកាសចរណ៍ដដែល មានគោលបំណងពង្រីកកងហោះហើររបស់ខ្លួនដល់យ៉ាងហោចណាស់ ៣០ យន្តហោះក្នុងរយៈពេល ៤ ទៅ ៥ ឆ្នាំខាងមុខ រួមទាំងយន្តហោះជួលផងដែរ។ លោក Puttipong បាននិយាយថា កងហោះហើរថ្មីគឺចាំបាច់សម្រាប់កំណើនប្រតិបត្តិការរបស់ក្រុមហ៊ុន ដែលបច្ចុប្បន្នដំណើរការយន្តហោះចំនួន ២៥ គ្រឿង ដែលយន្តហោះខ្លះមានអាយុ ២០ ឆ្នាំរួចទៅហើយ។

គួរគូសបញ្ជាក់ថា Bangkok Airways ដំណើរការជើងហោះហើររវាងទីក្រុងបាងកក និងទិសដៅទេសចរណ៍ល្បីៗ រួមទាំងកោះសាមុយ ដែលជាទីតាំងថតរឿង The White Lotus និងជាកន្លែងដែលក្រុមហ៊ុនអាកាសចរណ៍នេះគ្រប់គ្រងព្រលានយន្តហោះ។

The White Lotus ដែលជារឿងភាគរបស់អាមេរិក រំពឹងថានឹងទាក់ទាញភ្ញៀវទេសចរកាន់តែច្រើនទៅកាន់ប្រទេសថៃ ខណៈរដ្ឋាភិបាលកំណត់គោលដៅទាក់ទាញភ្ញៀវទេសចរឱ្យបាន ៤០ លាននាក់ឆ្នាំនេះ។

លោក Puttipong បាននិយាយថា Bangkok Airways បានឃើញការកើនឡើងចំនួន ១៤ ភាគរយ នៃការកក់ជើងហោះហើរសម្រាប់ត្រីមាសទី២រួចហើយ បើទោះបីជាជាធម្មតា វាជារដូវកាលទាបសម្រាប់ទេសចរណ៍ក្នុងប្រទេសថៃក៏ដោយ៕