ព័ត៌មានអន្ដរជាតិ

ធនាគារកណ្ដាលអឺរ៉ុប៖ ពន្ធពាណិជ្ជកម្មនឹងជំរុញអតិផរណាតំបន់ចាយប្រាក់អឺរ៉ូ

បានផុស

១ សប្តាហ៍ មុន

នៅ

ថ្ងៃសុក្រ ២១ មីនា ២០២៥

ដោយ

ប្រធានធនាគារកណ្តាលអឺរ៉ុប (ECB) លោកស្រី Christine Lagarde បានព្រមានកាលពីថ្ងៃព្រហស្បតិ៍ថា ភាពមិនប្រាកដប្រជានៃពាណិជ្ជកម្ម បង្កការគំរាមកំហែងយ៉ាងធ្ងន់ធ្ងរដល់កំណើនសេដ្ឋកិច្ច និងអតិផរណានៃតំបន់ចាយប្រាក់អឺរ៉ូ ហើយសម្ពាធតម្លៃដែលជំរុញដោយពន្ធរំពឹងថានឹងកើនឡើង។ នេះបើតាមការចុះផ្សាយរបស់បណ្ដាញទូរទស្សន៍ Euronews។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសវនាការសភាអ៊ឺរ៉ុប លោកស្រី Lagarde បានទទួលស្គាល់ថា ខណៈអតិផរណានៅតែស្ថិតក្នុងគន្លងតាមការរំពឹងទុក ភាពមិនប្រាកដប្រជានៃពាណិជ្ជកម្មកើនឡើង ជាពិសេសបណ្តាលមកពីការផ្លាស់ប្ដូរគោលនយោបាយរបស់សហរដ្ឋអាមេរិក ដែលអាចរំខានដល់ការស្ទុះងើបឡើងវិញនៃសេដ្ឋកិច្ចតំបន់ចាយប្រាក់អឺរ៉ូ និងបញ្ឆេះកំណើនតម្លៃ។

លោកស្រីបាននិយាយថា៖ «ជម្លោះពាណិជ្ជកម្មធ្វើឱ្យប៉ះពាល់ដល់កំណើន និងសុខុមាលភាពសកល» ដោយបន្តព្រមានថា ពន្ធសងសឹក និងការរំខានដល់ខ្សែច្រវ៉ាក់ផ្គត់ផ្គង់ អាចនាំឱ្យមានការចំណាយខ្ពស់សម្រាប់អាជីវកម្ម និងអ្នកប្រើប្រាស់អឺរ៉ុប។

មន្រ្តីអឺរ៉ុបរូបនេះ បានបន្ថែមថា រលកពន្ធថ្មីអាចជំរុញឱ្យអតិផរណាកើនឡើងដល់ទៅ ០,៥ ភាគរយ ដែលនេះនឹងធ្វើឱ្យមានការស្មុគស្មាញដល់កិច្ចខិតខំប្រឹងប្រែងរបស់ ECB ក្នុងការរក្សាស្ថិរភាពតម្លៃ ខណៈធ្វើឱ្យប៉ះពាល់ដល់កំណើនសេដ្ឋកិច្ចផងដែរ។

លោកស្រី Lagarde បានកត់សម្គាល់ថា រដ្ឋបាលរបស់ប្រធានាធិបតីអាមេរិក ដូណាល់ ត្រាំ បានចេញគោលនយោបាយផ្សេងៗ ដែលបង្កជាភាពមិនប្រាកដប្រជាដល់ពាណិជ្ជកម្មសកល។

ហានិភ័យដ៏ធំបំផុតមួយនោះ គឺលទ្ធភាពនៃពន្ធខ្ពស់របស់សហរដ្ឋអាមេរិកលើការនាំចេញរបស់អឺរ៉ុប។ ការវិភាគរបស់ ECB បានបង្ហាញថា ពន្ធ ២៥ ភាគរយ លើទំនិញអឺរ៉ុបនឹងកាត់បន្ថយកំណើន GDP របស់តំបន់ចាយប្រាក់អឺរ៉ូប្រហែល ០,៣ ភាគរយ ក្នុងឆ្នាំដំបូង។ ប្រសិនបើ សហភាពអឺរ៉ុបសងសឹកនោះ តួលេខនេះអាចកើនឡើងដល់ ០,៥ ភាគរយ។

សេដ្ឋកិច្ចតំបន់ចាយប្រាក់អឺរ៉ូ បានកើនឡើង ០,៩ ភាគរយ ក្នុងឆ្នាំ ២០២៤ ធៀបនឹងកំណើន ០,៤ ភាគរយ នៅឆ្នាំ ២០២៣៕