អាកាសធាតុចុះត្រជាក់ និងភ្លៀងកក់ខែ ទាញ​ទម្លាក់​ទិន្នផលស្វាយចន្ទីប្រមាណ ២០%

លោក អួន ស៊ីឡុត ប្រធានសមាគមស្វាយចន្ទីកម្ពុជាបានឱ្យដឹងថា ការអូសបន្លាយ​នៃអា​កាស​ធាតុ​ចុះត្រជាក់ និងមានភ្លៀងកក់ខែ បានធ្វើឱ្យទិន្នផលគ្រាប់ស្វាយចន្ទីធ្លាក់ចុះប្រមាណ ២៣% នៅដើមឆ្នាំ ២០២៥ នេះ។

ក្រសួងធនធានទឹក និងឧតុនិយមបានព្យាករណ៍កាលពីដើមឆ្នាំថា ទឹកភ្លៀងនឹងអូស​បន្លាយក្នុង​រដូវ​ប្រាំង​ឆ្នាំ ២០២៥ ហើយបរិមាណទឹកភ្លៀងលើសកម្រិតមធ្យមប្រចាំឆ្នាំក្នុងរយៈពេល ៥ ឆ្នាំ​កន្លង​មក។

លោក អួន ស៊ីឡុតបញ្ជាក់ថា ទិន្នផលស្វាយចន្ទីធ្លាក់ចុះប្រមាណ ២៣%​បណ្ដាលមក​ពី​បញ្ហា​អាកាសធាតុត្រជាក់អូសបន្លាយ និងមានភ្លៀងកក់ខែ ដែលធ្វើ​ឱ្យចន្ទី​គាំង​ក្ដឹប​នៅ​ចន្លោះពេល​ផ្កា​ពីខែមករា ដល់ខែកុម្ភៈដើមឆ្នាំនេះ។ លោកបញ្ជាក់ថានៅពេលចូលខែមីនានេះ ក៏ស្រាប់​តែ​មាន​ភ្លៀងធ្លាក់ ធ្វើឱ្យខូចផ្កា ខូចក្ដឹបច្រើនជាច្រើន។

លោក អួន ស៊ីឡុតបញ្ជាក់ថា៖«ស្វាយចន្ទីគឺជាដំណាំត្រូពិកត្រូវការក្ដៅ មិនត្រូវការភ្លៀងទេ នៅរដូវផ្កា ព្រោះតែកាលណាត្រូវភ្លៀង ផ្កាខូច ក្ដឹបខូច និងគ្រាប់មិនមានគុណភាព។ នៅឆ្នាំ ២០២៥ យើងជួបប្រទះបញ្ហាអាកាសធាតុផ្ទួនៗគ្នាពីរ ទី១ ការអូសបន្លាយរដូវត្រជាក់ ទី២ បញ្ហាភ្លៀងកក់ខែ នៅពេលដែលចន្ទីកំពុងផ្ដល់ផល»។

លោក អួន ស៊ីឡុត អះអាងថា ទោះបីជាទិន្នផលធ្លាក់ចុះ ប៉ុន្តែស្ថានភាព​តម្លៃស្វាយ​ចន្ទី​មាន​ស្ថិរ​ភាព​​ល្អ ដោយសារមានការបញ្ជាទិញច្រើនគឺគ្រាប់ស្វាយចន្ទីស្រស់អាចលក់បានប្រមាណ ៥​ ៦០០ រៀល ក្នុងមួយគីឡូក្រាម។

យោងតាមសមាគមស្វាយចន្ទីកម្ពុជា នៅឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់​ស្វាយចន្ទីចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើន​ឡើង ២១ ភាគរយ គិត​ជា​ទឹក​ប្រាក់​​ ១,១៥០ ពាន់លាន​ដុល្លារ កើន ២៦,១៥ ភាគរយ។ ក្នុងនោះនាំចេញទៅវៀតណាម មានចំនួន ៧៩ ម៉ឺន ៥ ពាន់​តោន៕

អត្ថបទ៖ ឡេង ដេត