ព័ត៌មានអន្ដរជាតិ

វៀតណាមគ្រោងបន្ថយពន្ធលើទំនិញអាមេរិកមួយចំនួន ដើម្បីបញ្ចៀសពន្ធ ត្រាំ

បានផុស

៣ ថ្ងៃ មុន

នៅ

ថ្ងៃពុធ ២៦ មីនា ២០២៥

ដោយ

ប្រធាននាយកដ្ឋានគោលនយោបាយពន្ធរបស់ក្រសួងហិរញ្ញវត្ថុវៀតណាម បានឱ្យដឹងថា ប្រទេសវៀតណាមនឹងកាត់បន្ថយពន្ធលើផលិតផលរបស់សហរដ្ឋអាមេរិកមួយចំនួន រួមទាំងឧស្ម័នធម្មជាតិ និងរថយន្ត ចំពេលដែលប្រទេសនេះព្យាយាមបញ្ចៀសពន្ធរបស់ប្រធានាធិបតី ដូណាល់ ត្រាំ ដោយសារតែអតិរេកពាណិជ្ជកម្មទ្វេភាគីខ្ពស់ខ្លាំងពេក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមការផ្លាស់ប្ដូរថ្មី ពន្ធលើប្រភេទរថយន្តមួយចំនួន នឹងបន្ថយមកត្រឹម ៣២ ភាគរយ ពីអត្រាចាស់ចន្លោះពី ៤៥-៦៤ ភាគរយ ខណៈពន្ធលើឧស្ម័នធម្មជាតិ នឹងបន្ថយមកត្រឹម ២ ភាគរយ ពីអត្រាចាស់ ៥ ភាគរយ។ ចំណែកឯពន្ធលើអេតាណុលវិញ ក៏នឹងកាត់បន្ថយមកត្រឹម ៥ ភាគរយ ពី ១០ ភាគរយ ផងដែរ។ ពន្ធលើទំនិញកសិកម្មមួយចំនួន រួមមានផ្លែប៉ោម សាច់មាន់កក គ្រាប់អាល់ម៉ុន និងផ្លែស្ត្របឺរីផ្អែម ក៏នឹងត្រូវបន្ថយផងដែរ។ នេះបើតាមសេចក្តីថ្លែងការណ៍នៅលើគេហទំព័រក្រសួងហិរញ្ញវត្ថុ ដែលស្រង់សម្ដីប្រធានអង្គភាពគ្រប់គ្រង និងត្រួតពិនិត្យពន្ធ លោក Nguyen Quoc Hung។

លោក Hung បាននិយាយទៀតថា ការកាត់បន្ថយពន្ធមានគោលបំណង «ធ្វើឲ្យប្រសើរឡើងនូវសមតុល្យពាណិជ្ជកម្មជាមួយដៃគូពាណិជ្ជកម្មរបស់វៀតណាម» ដោយបន្ថែមថា ខណៈសហរដ្ឋអាមេរិក និងវៀតណាមមានទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ ប្រទេសទាំង២ មិនទាន់បានចុះហត្ថលេខាលើកិច្ចព្រមព្រៀងពាណិជ្ជកម្មសេរីនៅឡើយទេ។

សេចក្តីថ្លែងការណ៍ដដែលរបស់ក្រសួង បានបន្ថែមថា សេចក្តីព្រាងនៃការផ្លាស់ប្តូរបទប្បញ្ញត្តិនេះ គឺដើម្បីសំដៅដោះស្រាយស្ថានការណ៍នយោបាយ និងសេដ្ឋកិច្ចពិភពលោកដ៏ស្មុគស្មាញ និងមិនអាចទាយទុកជាមុនបាន ខណៈគោលនយោបាយពន្ធគយ មានឥទ្ធិពលយ៉ាងខ្លាំងលើសេដ្ឋកិច្ចទូទាំងពិភពលោក រួមទាំងវៀតណាមផងដែរ។

គួរគូសបញ្ជាក់ថា អ្នកវិភាគចាត់ទុកវៀតណាមថាជាប្រទេសងាយរងគ្រោះដោយគោលនយោបាយពន្ធគយរបស់លោក ត្រាំ ជាងគេ ដោយប្រទេសនាំចេញទៅសហរដ្ឋអាមេរិកច្រើន ដែលបង្កើតបានជាអតិរេកពាណិជ្ជកម្មប្រមាណ ១២៣,៥ ប៊ីលានដុល្លារ កាលពីឆ្នាំមុន។ ដើម្បីស្ដារនូវស្ថានការណ៍នេះ មន្រ្តីវៀតណាមនាពេលកន្លងមក បានព្យាយាមផ្សះផ្សារជាមួយមន្រ្តីរដ្ឋបាល ត្រាំ និងសន្យាបង្កើនការនាំចូលទំនិញរបស់សហរដ្ឋអាមេរិក ជាពិសេសឧស្ម័នធម្មជាតិ។

ដាច់ដោយឡែងពីការបន្ថយពន្ធ រដ្ឋាភិបាលវៀតណាមនៅថ្ងៃពុធនេះផងដែរ បានប្រកាសសម្រេចចិត្តអនុញ្ញាតឱ្យក្រុមហ៊ុនអវកាស SpaceX របស់លោក អេឡុន ម៉ាសក៍ បើកដំណើរការសេវាអ៊ីនធឺណិតតាមផ្កាយរណប Starlink របស់ខ្លួននៅក្នុងប្រទេសវៀតណាម។ ចំណាត់ការនេះ ត្រូវបានអ្នកវិភាគមួយចំនួនមើលឃើញថាជាមធ្យោបាយមួយសម្រាប់ប្រទេសវៀតណាម ក្នុងការបញ្ចៀសពន្ធរបស់សហរដ្ឋអាមេរិក៕