ក្រុមហ៊ុនអាល្លឺម៉ង់ ចុះហត្ថលេខាទិញម្រេចខ្មៅ ១០០ តោន ពីសហគមន៍​កសិកម្មទំនើប​ម្រេច​មេមត់ត្បូងឃ្មុំ

ក្រុមហ៊ុន FUCHS របស់អាល្លឺម៉ង់ នៅថ្ងៃទី ២៦ ខែមីនា ឆ្នាំ ២០២៥ បានចុះកិច្ចសន្យា​ទិញម្រេច​ខ្មៅ​ទំហំ ៧០ ម៉ឺនដុល្លារ ពីសហគមន៍កសិកម្មទំនើបរបស់យើងនឹងផ្គត់ផ្គង់​ម្រេចខ្មៅ​ចំនួន​១០០​តោន ក្នុងតម្លៃថេរ ៧ដុល្លារ ក្នុងមួយគីឡូក្រាម សម្រាប់ម្រេចស្តង់ដាសុវត្ថិភាព ដែលជាតម្លៃ​ល្អលើសពីតម្លៃមធ្យម នៅលើទីផ្សារប្រមាណ១០%។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានគូសបញ្ជាក់អំពីសារៈសំខាន់នៃការធ្វើផលិតកម្មកសិកម្មតាមកិច្ចសន្យាសម្រាប់សហគមន៍ ដើម្បីការពារសមាជិកទាំងអស់ពីការ ប្រែប្រួលថ្លៃ ព្រមទាំងបានណែនាំឱ្យនាយកដ្ឋានកសិឧស្សាហកម្ម បន្តសម្របសម្រួលកិច្ចសន្យា ទិញ-លក់ ម្រេច បន្ថែមទៀត។

នៅក្នុងឆ្នាំ ២០២៤ ផលិតកម្មម្រេចនៅកម្ពុជាសម្រេចបានប្រមាណ ៩ ០០០ តោន ធ្លាក់ចុះពី ៤០-៥០ ភាគរយ បើធៀបនឹងឆ្នាំ ២០២៣ ប៉ុន្តែតម្លៃម្រេចបែរជាមានភាពល្អប្រសើរ​ពោលគឺកើន​ឡើង​ទ្វេ​ដងដែលមានតម្លៃ ២ ម៉ឺន ៤ ពាន់រៀល​ក្នុង​មួយគីឡូក្រាម។

លោក ម៉ាក់ នី ប្រធានសមាគមសហព័ន្ធម្រេច និងគ្រឿងទេសកម្ពុជា (CPSF) ប្រាប់កម្ពុជាថ្មីថា​ អនុវិស័យម្រេច​បាន​ជួ​ប​ប្រទះនឹងបញ្ហាប្រឈមមួយចំនួននៅក្នុងរយៈពេល ២ ឆ្នាំកន្លងមកនេះ ដូចជាបញ្ហា​​អា​កាស​​​ធាតុក្តៅ និងមានរយៈពេលវែង, តម្លៃជីថ្នាំថ្លៃ ការបន្លំគុណភាពជីថ្នាំ និងបច្ចេកទេសដាំដុះថែទាំរបស់កសិករភាគច្រើននៅមានកំរិត ខណៈទីផ្សារនាំចេញភាគ​ច្រើន​​ពឹង​លើ​​​​វៀតណាម មានក្រុមហ៊ុនប្រមូលទិញតិចតួច។

លោក ម៉ាក់ នី សង្ឃឹមថា នៅឆ្នាំ ២០២៥ ទិន្នផលម្រេចនឹងមានការកើនឡើង ប៉ុន្តែមាន​ម្រេច​មួយ​​​ចំនួនបាន​ងាប់ដោយសារអាកាសធាតុក្ដៅ។

តម្លៃម្រេចធម្មតានៅ​កម្ពុជា​​បានហក់ឡើងទ្វេដងរហូតដល់ជិត ៣ ម៉ឺនរៀលក្នុងមួយគីឡូក្រាម បើធៀបនឹង​តម្លៃ​ក្នុង​ឆ្នាំ ២០២៣ ដែលលក់បានត្រឹមជាង ១ ម៉ឺនរៀលក្នុងមួយគីឡូក្រាម។ ជាទូរទៅនៅក្នុងមួយឆ្នាំកម្ពុជាប្រមូលផលម្រេច​បានក្នុងរង្វង់ ១,៧​-២ ម៉ឺនតោន​លើផ្ទៃ​ដី​ជាង ៦ ពាន់​ហិកតា​។

ទីផ្សារម្រេចកម្ពុជា ត្រូវបាននាំទៅកាន់ប្រទេសវៀតណាមប្រមាណ ៨០ ភាគរយ និងប្រទេស​បន្ទាប់បន្សំដូចជា ចិន តៃវ៉ាន់ ថៃ ជប៉ុន កូរ៉េ និងសហគមនអឺរ៉ុបជាដើម៕

អត្ថបទ៖ ឡេង ដេត