AmCham៖ ​ទំនាក់ទំនងសេដ្ឋកិច្ចរវាងកម្ពុជា- អាមេរិក ​កំពុងរីកចម្រើនខ្លាំង

​សភាពាណិជ្ជកម្មអាមេរិកនៅកម្ពុជា (AmCham) សង្កត់ធ្ងន់ថា ភាពជាដៃគូសេដ្ឋកិច្ចដែលកំពុងពង្រឹងរវាងសហរដ្ឋ អាមេរិក និងកម្ពុជា ​បានបង្ហាញពីទស្សនវិស័យវិជ្ជមានជាទូទៅសម្រាប់អាជីវកម្មជាសមាជិករបស់ខ្លួននៅកម្ពុជា ជាពិសេសការពង្រីកអាជីវកម្មរបស់ពួកគេ។

ថ្លែងនៅក្នុង​កិច្ចប្រជុំសាមញ្ញប្រចាំឆ្នាំ (AGM) ឆ្នាំ២០២៥ របស់ខ្លួននៅថ្ងៃទី២៦ ខែមីនា ​លោក Casey Barnett ប្រធាន AmCham ថា ដោយបាន​ល់ការគាំទ្រ និងការណែនាំដ៏​ពីស្ថានទូតអាមេរិកក្នុងការបង្កើតទំនាក់ទំនងល្អជាមួយរាជរដ្ឋាភិបាលកម្ពុជា ដើម្បីលើកកម្ពស់បរិយាកាសធុរកិច្ចដែលប្រសើរឡើង។ លោកបានបញ្ជាក់អំពីរចនាសម្ព័ន្ធហិរញ្ញវត្ថុឯករាជ្យរបស់ AmCham ដោយថ្លែងថា៖«ការផ្តល់មូលនិធិរបស់យើងបានមកពីអ្នកទាំងអស់គ្នា ដែលជាសមាជិករបស់យើង» ដោយសង្កត់ធ្ងន់ថាអង្គការនេះមិនទទួលបានមូលនិធិខាងក្រៅពី រដ្ឋាភិបាល ឬអង្គការផ្សេងទៀតឡើយ។

លោក Barnett បានចែករំលែកលទ្ធផល​ពីការស្ទង់មតិសមាជិករបស់ AmCham ដោយបង្ហាញថាប្រហែល ៥០% នៃសមាជិកកំពុងព្យាករណ៍ពីកំណើនប្រាក់ចំណេញសរុបសម្រាប់ឆ្នាំ ២០២៥ ខណៈដែល ៣០% រំពឹងថាមិនមានការផ្លាស់ប្តូរទេ និងមានតែ ២០% ប៉ុណ្ណោះដែលកំពុងព្យាករណ៍ពីការធ្លាក់ចុះនៃប្រាក់ចំណេញ ប៉ុន្តែជារួមបង្ហាញពីភាពវិជ្ជមាន​ក្នុងចំណោមអាជីវកម្មអាមេរិកដែលកំពុងប្រតិបត្តិការនៅកម្ពុជា។

លោកបានបន្តគូសបញ្ជាក់​ថារដ្ឋាភិបាលសហរដ្ឋអាមេរិកបានផ្តល់ភាពអនុគ្រោះពន្ធដល់កម្ពុចាប់តាំងពីឆ្នាំ ១៩៩៦ ដែលក្រោយមកបានវិវត្តទៅជាប្រព័ន្ធអនុគ្រោះទូទៅ ដោយផ្តល់លទ្ធភាព​នាំចូលដោយឥតគិតពន្ធសម្រាប់ទំនិញនាំចេញជាច្រើនរបស់កម្ពុជា។ លោក Barnett បានថ្លែងថា៖«ចាប់តាំងពីពេលនោះមក កម្ពុជាបាននាំចេញពី ៤០% ទៅ ៤៦% នៃការនាំចេញរបស់ខ្លួនទៅកាន់សហរដ្ឋអាមេរិក​ ។​ស្ថិតិដែលយើងឃើញនៅទីនេះបង្ហាញថាការនាំចេញពីកម្ពុជាទៅសហរដ្ឋអាមេរិកបន្តកើនឡើង និងកំពុងកើនឡើង ២៥%ក្នុង១ឆ្នាំៗ» ។

លោកស្រី Bridgette L. Walker ធារៈធារីនៃស្ថានទូតអាមេរិកប្រចាំនៅកម្ពុជាបានគាំទ្រនូវទស្សនៈនៃទំនាក់ទំនងទ្វេភាគីដែលកំពុងរីកចម្រើន។ លោកស្រីបានគូសបញ្ជាក់អំពីការបើកដំណើរការវេទិកាសាធារណៈ និងឯកជនរវាងសហរដ្ឋអាមេរិក និងកម្ពុជា ដែលជាកិច្ចសន្ទនាសហការគ្នារវាងវិស័យសាធារណៈ និងឯកជន ក្នុងគោលបំណងកំណត់វិធានការជាក់ស្តែងដើម្បីលើកកម្ពស់បរិយាកាសធុរកិច្ច និងការវិនិយោគនៅកម្ពុជា។

លោកស្រី Walker បានបញ្ជាក់ថា៖«យើងទន្ទឹងរង់ចាំបន្តធ្វើការជាមួយ AmCham និងរាជរដ្ឋាភិបាលកម្ពុជា ដើម្បីដោះស្រាយបញ្ហាសំខាន់ៗ កង្វល់ និងបង្កើតឱកាសកាន់តែច្រើនសម្រាប់ក្រុមហ៊ុនអាមេរិក» ។ លោកស្រីក៏បានកត់សម្គាល់ផងដែរថា ប្រធានបទនៃកិច្ចប្រជុំ AGM ឆ្នាំនេះគឺ «ការប្រារព្ធខួប ៧៥ ឆ្នាំនៃទំនាក់ទំនងកម្ពុជា-សហរដ្ឋអាមេរិក» ។

លោក សុខ ចិន្តាសោភា ឧបនាយករដ្ឋមន្ត្រី បានសង្កត់ធ្ងន់លើកំណើន និងការពង្រឹងភាពជាដៃគូសេដ្ឋកិច្ចរវាងសហរដ្ឋអាមេរិក និងកម្ពុជានារយៈពេល ៧៥ ឆ្នាំកន្លងមកនេះ ដោយបានថ្លែងថា សហរដ្ឋអាមេរិកគឺជាប្រភពភ្ញៀវទេសចរអន្តរជាតិធំជាងគេទីប្រាំមកកាន់កម្ពុជានៅឆ្នាំ ២០២៤ ហើយបានជាប់ចំណាត់ថ្នាក់លេខមួយក្នុងចំណោមភ្ញៀវទេសចរអន្តរជាតិដែលមកទស្សនាក្រុងអង្គរ។

លោកក៏បានគូសបញ្ជាក់ផងដែរអំពីវត្តមានដ៏ជោគជ័យនៃម៉ាកយីហោ និងអាជីវកម្មល្បីឈ្មោះ ​របស់អាមេរិកនៅក្នុងវិស័យសំខាន់ៗជាច្រើននៅកម្ពុជា រួមមានបដិសណ្ឋារកិច្ច យានយន្ត ការអប់រំ សុខាភិបាល ផលិតកម្ម អាហារ និងភេសជ្ជៈ សេវាកម្មហិរញ្ញវត្ថុ និងក្រុមហ៊ុនបច្ចេកវិទ្យាទំនើប។ ​

ថ្លែងអំពីស្ថានភាពសេដ្ឋកិច្ចពិភពលោកនាពេលបច្ចុប្បន្ន លោក សុខ ចិន្តាសោភា បានទទួលស្គាល់ការកើនឡើងនៃលទ្ធិគាំពារនិយម និងការបែកបាក់សេដ្ឋកិច្ចដែលអាចកើតមាន។ លោកបានសង្កត់ធ្ងន់លើការប្តេជ្ញាចិត្តរបស់កម្ពុជាចំពោះពហុវប្បធម៌ និងការបើកចំហក្នុងពាណិជ្ជកម្មអន្តរជាតិ ខណៈពេលដែលទទួលស្គាល់ភាពងាយរងគ្រោះរបស់ប្រទេសចំពោះការវិវត្តន៍នៃកត្តាខាងក្រៅ ដោយសារតែការពឹងផ្អែកលើឧស្សាហកម្មដែលប្រើប្រាស់កម្លាំងពលកម្មច្រើន និងមូលដ្ឋានសម្ព័ន្ធមិត្តតូចចង្អៀត។

លោក​ថា៖« ការពង្រឹងទំនាក់ទំនងជាមួយដៃគូសំខាន់ៗនឹងបើកឱកាសថ្មីៗសម្រាប់ការធ្វើពាណិជ្ជកម្ម ការវិនិយោគ ការធ្វើពិពិធកម្មសេដ្ឋកិច្ច និងការផ្ទេរបច្ចេកវិទ្យាសម្រាប់កម្ពុជា»។

លោកក៏បានបន្តសង្កត់ធ្ងន់លើ​ភាពអំណោយផលរបស់កម្ពុជា និងឱកាសដ៏សំខាន់ដែលកើតចេញពីការផ្លាស់ប្តូរការរីកចម្រើនសេដ្ឋកិច្ចពិភពលោកឆ្ពោះទៅទ្វីបអាស៊ី ដោយបានជំរុញឱ្យកម្ពុជាចាប់យក «ឱកាសប្រវត្តិសាស្ត្រនេះដើម្បីកសាងគំរូកំណើនថ្មីមួយដែលផ្អែកលើជំនាញ បច្ចេកវិទ្យា និងនវានុវត្តន៍»​នៃការធ្វើពិពិធកម្មសេដ្ឋកិច្ច និងការកែលម្អភាពស្មុគស្មាញរបស់ខ្លួន ដើម្បីសម្រេចបាននូវគោលដៅក្លាយជាប្រទេសដែលមានប្រាក់ចំណូលខ្ពស់នៅឆ្នាំ ២០៥០៕

​