ព័ត៌មានជាតិ

ការវាស់វែងដីធ្លីក្នុងខេត្តកំពង់ស្ពឺ សម្រចបានប្រមាណ ៩៩% ជំរុញបញ្ចប់ត្រឹមឆ្នាំ ២០២៥

បានផុស

៣ សប្តាហ៍ មុន

នៅ

ថ្ងៃសុក្រ ២៨ មីនា ២០២៥

ដោយ

ខេត្តកំពង់ស្ពឺសម្រេចបានការវាស់វែងដីធ្លីជូនប្រជាពលរដ្ឋបានប្រមាណ ៩៩% ហើយកំពុងជំរុញឲ្យបញ្ចប់ត្រឹមឆ្នាំ ២០២៥។

ក្នុងឱកាសចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន ២ ឃុំ គឺឃុំពាំងល្វា និងឃុំជើងរាស់ ក្នុងស្រុកសាមគ្គីមុនីជ័យ ខេត្តកំពង់ស្ពឺ កាលពីថ្ងៃទី២៤ ខែមីនា ឆ្នាំ២០២៥ លោក ជាម ច័ន្ទសោភ័ណ អភិបាលខេត្តកំពង់ស្ពឺបានថ្លែងថា ទូទាំងខេត្តកំពង់ស្ពឺមានក្បាលដីប៉ាន់ស្មានប្រមាណជា ១ ១០៧ ២៧២ ក្បាលដី ក្នុងនោះក្រុមការងារបានវាស់វែងក្បាលដីបានចំនួន ១ ០៨៨ ០៩៥ ក្បាលដីស្មើនឹង ៩៩.៦%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្តបានបន្តថា នៅសល់ក្បាលដីប្រមាណ ១៩ ៤៧៧ ទៀត នៅមិនទាន់វាស់វែងដែលស្ថិតក្នុងស្រុកចំនួន ៤ គឺស្រុកឱរ៉ាល់ ស្រុកបសេដ្ឋ ស្រុកភ្នំស្រួច និងស្រុកថ្ពង ដោយសារនៅជាប់ពាក់ព័ន្ធនិងការបែងចែកដែនរដ្ឋបាលខេត្តនិងខេត្ត ដែនជម្រកសត្វព្រៃ និងក្រុមហ៊ុនសម្បទានមិនទាន់ដាច់ស្រេច។

ក្នុងដំណើរការវាស់វែងដីធ្លីជូនប្រជាពលរដ្ឋ អាជ្ញាធរខេត្តបានចេញបណ្ណកម្មសិទ្ធិដីធ្លីជូនពលរដ្ឋបានចំនួន ៨៧៣ ១០២ បណ្ណ ស្មើ ៧៩.៩% និងចែកបណ្ណដល់ដៃប្រជាពលរដ្ឋបានចំនួន ៧១៤ ៧៥៧ បណ្ណ ស្មើ ៦៥.៤%។

ជាមួយលទ្ធផលសម្រេចបាននេះ អភិបាលខេត្តកំពង់ស្ពឺក៏ជំរុញដល់មន្ត្រីជំនាញឲ្យបញ្ចប់ការវាស់វែង និងផ្តល់បណ្ណកម្មសិទ្ធិដីធ្លីជូនប្រជាពលរដ្ឋក្នុងខេត្តឱ្យបានចប់រួចរាល់ក្នុងឆ្នាំ ២០២៥៕