ព័ត៌មានជាតិ

រដ្ឋមន្ត្រីឧស្សាហកម្ម លើកទឹកចិត្តឱ្យអតីតនិស្សិតខ្មែរពីជប៉ុន ដើរតួជាស្ពានសម្រាប់សហគ្រាសធុនតូច និងមធ្យមជប៉ុន នៅកម្ពុជា

បានផុស

៣ ថ្ងៃ មុន

នៅ

ថ្ងៃសុក្រ ២៨ មីនា ២០២៥

ដោយ

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកទឹកចិត្តឱ្យសមាគមអតីតនិស្សិតខ្មែរពីប្រទេសជប៉ុន ពង្រីកតួនាទីរបស់ខ្លួនជា “ស្ពាន” រវាងសហគ្រាសធុនតូច និងមធ្យមជប៉ុន ជាមួយដៃគូនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយតំណាងសមាគម នៅថ្ងៃទី២៧ ខែមីនា ឆ្នាំ២០២៥ លោក ហែម វណ្ណឌី បានកោតសរសើរចំពោះសមិទ្ធផលការងារចាប់តាំងពីសមាគមចាប់ផ្តើមដំណើរការក្នុងឆ្នាំ២០០២។ បច្ចុប្បន្ន សមាគមអតីតនិស្សិតខ្មែរពីប្រទេសជប៉ុនមានសមាជិកប្រមាណ ១.០០០នាក់ និងអនុវត្តសកម្មភាពនានា ដូចជា JAC Japan Desk ដែលផ្តល់សេវាប្រឹក្សាយោបល់ ការជ្រើសរើសបុគ្គលិក និងការកសាងបណ្តាញធុរកិច្ច សម្រាប់សហគ្រាសធុនតូច និងមធ្យមជប៉ុន ដែលកំពុងប្រតិបត្តិការ ឬចាប់អារម្មណ៍ឈានចូលក្នុងទីផ្សារកម្ពុជា។

លោករដ្ឋមន្ត្រី បានលើកឡើងថា ដោយសារប្រទេសជប៉ុនជាសង្គមដែលមានប្រជាជនវ័យចំណាស់ច្រើន និងការថមថយកំណើនសេដ្ឋកិច្ច សហគ្រាសធុនតូច និងមធ្យមរបស់ជប៉ុនមួយចំនួ នកំពុងស្វែងរកឱកាសធុរកិច្ចនៅក្រៅប្រទេស ហើយពួកគេអាចនឹងពិបាកចូលទៅក្នុងទីផ្សារថ្មី។ លោករដ្ឋមន្ត្រី បានជំរុញឱ្យសមាគមបន្តគាំទ្រសហគ្រាសទាំងនេះ តាមរយៈការភ្ជាប់ទំនាក់ទំនង និងការផ្តល់ប្រឹក្សាយោបល់ច្បាស់លាស់ ក៏ដូចជាជួយសហគ្រាសក្នុងស្រុកស្វែងរកឱកាសធុរកិច្ចនៅជប៉ុនផងដែរ។

ជាចុងក្រោយលោករដ្ឋមន្ត្រី ហែម វណ្ណឌី ក៏បានណែនាំឱ្យសមាគមផ្តោតលើការពង្រឹងស្ថាប័ន កសាងមូលដ្ឋានទិន្នន័យសមាជិកជាបណ្តុំធនធានមនុស្សសម្រាប់តម្រូវការផ្សេងៗ និងពង្រីកប្រភពចំណូលរបស់ខ្លួន ប៉ុន្តែត្រូវរក្សាគុណតម្លៃ និងបេសកកម្មជាស្ថាប័នមិនរកប្រាក់ចំណេញ៕