ព័ត៌មានអន្ដរជាតិ

ពន្ធ ត្រាំ នឹងប៉ះពាល់ដល់ក្រុមហ៊ុនផលិតរថយន្តអាស៊ី ជាពិសេស Toyota

បានផុស

៣៥ វិនាទី មុន

នៅ

ថ្ងៃអង្គារ ១ មេសា ២០២៥

ដោយ

ក្រុមហ៊ុនផលិតរថយន្តនៅអាស៊ីធំៗ រំពឹងពីផលប៉ះពាល់ដែលកើតចេញពីវិធានការពន្ធ ២៥ ភាគរយ លើរថយន្តនាំចូលសហរដ្ឋអាមេរិក ដែលលោកប្រធានាធិបតី ដូណាល់ ត្រាំ បានប្រកាសកាលពីសប្ដាហ៍មុន។ នេះបើតាមការចុះផ្សាយរបស់បណ្ដាញព័ត៌មាន CNBC កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីទទួលបន្ទុកលើកិច្ចការអតិថិជនសកលនៅក្រុមហ៊ុនស្រាវជ្រាវ Frost & Sullivan លោក Vivek Vaidya បានថ្លែងថា ក្រុមហ៊ុនផលិតរថយន្តជប៉ុនស្ថិតក្នុងហានិភ័យខ្លាំងជាងគេ ដោយក្រុមហ៊ុនផលិតរថយន្ត Toyota ទំនងនឹងរងផលប៉ះពាល់ធ្ងន់បំផុត ដោយសារក្រុមហ៊ុននេះមានទីផ្សារធំនៅសហរដ្ឋអាមេរិក។

យោងតាមក្រុមហ៊ុនទីផ្សាររថយន្តអាមេរិក Carpro ក្រុមហ៊ុនផលិតរថយន្តនៅអាស៊ីមានប្រមាណចំនួន ៦ ក្នុងចំណោមក្រុមហ៊ុនផលិតរថយន្តកំពូលៗទាំង ៨ នៅសហរដ្ឋអាមេរិក បើគិតពីបរិមាណនៃការលក់កាលពីឆ្នាំមុន។ ក្រុមហ៊ុន Toyota បានឈរនៅលំដាប់កំពូល ដោយលក់រថយន្តបានប្រមាណ ១,៩៨ លានគ្រឿង វ៉ាដាច់ក្រុមហ៊ុនផលិតរថយន្តអាមេរិក Ford និង Chevrolet ។

ក្រុមហ៊ុនផលិតរថយន្ត Honda និង Nissan របស់ជប៉ុន ស្ថិតនៅលេខរៀងទី ៤ និងទី ៥ ខណៈក្រុមហ៊ុនកូរ៉េខាងត្បូងរួមមាន Hyundai និង Kia ឈរនៅលេខរៀងបន្ទាប់ និងក្រុមហ៊ុន Subaru ជាប់ចំណាត់ថ្នាក់កំពូលទី៨។

របាយការណ៍ហិរញ្ញវត្ថុថ្មីៗបំផុតរបស់បណ្ដាក្រុមហ៊ុនទាំងនេះ បានបង្ហាញឱ្យឃើញថា ពួកគេរកប្រាក់ចំណូលច្រើនពីអាមេរិកខាងជើង។ ការណ៍នេះ អាចធ្វើឱ្យពួកគេងាយរងគ្រោះពីវិធានការពន្ធគយ។

ទីភ្នាក់ងារសារព័ត៌មានរ៉យទ័រ បានរាយការណ៍ថា សហរដ្ឋអាមេរិកបាននាំចូលផលិតផលរថយន្តតម្លៃ ៤៧៤ ប៊ីលានដុល្លារក្នុងឆ្នាំ ២០២៤ រួមទាំងរថយន្តដឹកអ្នកដំណើរ សរុបតម្លៃ ២២០ ប៊ីលានដុល្លារ។

ចំណែកឯរបាយការណ៍របស់ក្រុមហ៊ុនស្រាវជ្រាវទីផ្សារ S&P Global ដែលចេញផ្សាយកាលពីសប្ដាហ៍មុនវិញ បានបង្ហាញថា កូរ៉េខាងត្បូងគឺជាប្រទេសនាំចេញរថយន្តធំទី ២ ទៅកាន់សហរដ្ឋអាមេរិក ក្នុងឆ្នាំ ២០២៤ ជាមួយនឹងរថយន្តចំនួន ១,៤ លានគ្រឿង។ ម៉ិកស៊ិក ឈរនៅលេខរៀងកំពូលជាមួយនឹងការនាំចេញទៅអាមេរិកប្រមាណ ២,៥ លានគ្រឿង ខណៈជប៉ុន ១,៣ លានគ្រឿង។

Vaidya បាននិយាយថា៖ «និយាយឱ្យខ្លី សហរដ្ឋអាមេរិក គឺជាទីផ្សារដែលមិនអាចជំនួសបានសម្រាប់ក្រុមហ៊ុនផលិតរថយន្តនៅអាស៊ី។ អ្នកដឹកនាំទីផ្សារមកពីប្រទេសជប៉ុន និងកូរ៉េខាងត្បូង នឹងរងផលប៉ះពាល់យ៉ាងខ្លាំងដោយសេចក្តីប្រកាស [ពន្ធ] នេះ»។

លើសពីនេះ ប្រធាន និងនាយកប្រតិបត្តិនៃក្រុមហ៊ុនប្រឹក្សាយោបល់ AutoForecast Solutions លោក Joe McCabe បាននិយាយថា ទោះបីជាក្រុមហ៊ុនផលិតរថយន្តបរទេស ចង់ផ្លាស់ប្តូរផលិតកម្មទៅសហរដ្ឋអាមេរិកដើម្បីបញ្ចៀសពន្ធក៏ដោយ ការរើរោងចក្រមិនអាចធ្វើឡើងតែ ១ យប់បានទេ ដោយវាត្រូវការវិនិយោគជាទឹកប្រាក់រាប់ពាន់លានដុល្លារ។

អ្នកជំនាញខ្លះទៀតមើលឃើញថា ក្រុមហ៊ុនផ្សេងៗដូចជា Toyota និង Nissan មានរោងចក្រផលិតកម្មដ៏ធំរួចហើយនៅសហរដ្ឋអាមេរិក ដែលធ្វើឱ្យពួកគេពិបាកបង្កើនបន្ថែមទៀត ដើម្បីប៉ះប៉ូវផលប៉ះពាល់ពីពន្ធគយ។

គួរគូសបញ្ជាក់ថា ក្រោយការដាក់ពន្ធ ២៥ ភាគរយ លើរថយន្តនាំចូល មានការព្រមានថា តម្លៃរថយន្តលើទីផ្សារសហរដ្ឋអាមេរិក និងកើនឡើង ដោយនឹងប៉ះពាល់ជាពិសេសដល់អ្នកប្រើប្រាស់អាមេរិក៕