ព័ត៌មានអន្ដរជាតិ

ប្រទេសអាស៊ីអាគ្នេយ៍ ៤ ប្រឈមហានិភ័យខ្ពស់នៃពន្ធឱ្យស្មើគ្នារបស់ ត្រាំ

បានផុស

១ ថ្ងៃ មុន

នៅ

ថ្ងៃពុធ ២ មេសា ២០២៥

ដោយ

ពន្ធឆ្លើយតបឱ្យស្មើគ្នា ឬ Reciprocal Tariff របស់ប្រធានាធិបតីអាមេរិក លោក ដូណាល់ ត្រាំ ត្រូវបានកំណត់ថានឹងចូលជាធរមាននាថ្ងៃពុធ ទី ២ មេសា នេះ ដោយអាចបញ្ឆេះកម្ដៅនៃសង្រ្គាមពាណិជ្ជកម្មពិភពលោកឱ្យកាន់តែខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិធានការនេះ សំដៅលើការយកពន្ធលើទំនិញនៃប្រទេសដទៃ ក្នុងអត្រាដែលប្រទេសដទៃយកពន្ធលើទំនិញរបស់សហរដ្ឋអាមេរិក។ តាំងពីដើមរៀងមក លោក ត្រាំ តែងតែទទូចថា សហរដ្ឋអាមេរិកគឺជាប្រទេសរងគ្រោះនៃពាណិជ្ជកម្មមិនស្មើភាពគ្នា ដែលបង្កជាឱនភាពពាណិជ្ជកម្មធ្ងន់ធ្ងរសម្រាប់ប្រទេសរបស់ខ្លួន។ ស្ថានភាពបច្ចុប្បន្ន បានផ្ដល់ជាការព្រួយបារម្ភជាច្រើនសម្រាប់ប្រទេសមានទំនាក់ទំនងពាណិជ្ជកម្មសំខាន់ជាមួយសហរដ្ឋអាមេរិកជុំវិញពិភពលោក រួមទាំងប្រទេសមួយចំនួននៅអាស៊ីអាគ្នេយ៍ផងដែរ។

លោក ត្រាំ ប្រើយន្តការពន្ធរបស់លោកបែបនេះ គឺដើម្បីកាត់បន្ថយឱនភាពពាណិជ្ជកម្ម ដែលនេះនឹងកំណត់គោលដៅលើប្រទេសដែលមានអតិរេកពាណិជ្ជកម្មជាមួយអាមេរិកច្រើន ពោលគឺប្រទេសដែលនាំចេញទៅអាមេរិកច្រើនលើសលុប ធៀបនឹងការនាំចូលទំនិញអាមេរិកមកក្នុងប្រទេសរបស់ខ្លួន។

ថ្មីៗនេះ រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បានកំណត់អត្តសញ្ញាណក្រុមប្រទេសចំនួន ១៥ ដែលមានអតិរេកពាណិជ្ជកម្មខ្ពស់ ដោយឱ្យឈ្មោះពួកគេថា «ប្រទេសកខ្វក់ទាំង១៥» ហើយរំពឹងថានឹងរងផលប៉ះពាល់ខ្លាំងបំផុតដោយពន្ធថ្មី ប៉ុន្តែមិនបានបញ្ចេញឈ្មោះប្រទេសទាំងនោះទេ។ ការលើកឡើងបែបនេះ ក៏មានការបន្ទរពីមន្រ្តីរដ្ឋបាល ត្រាំ ផ្សេងទៀតដែរ។

ទោះបីជាមន្រ្តីទាំងនោះមិនទាន់រាយបញ្ជីឈ្មោះប្រទេសក្ដី ប៉ុន្តែទិន្នន័យពីរដ្ឋាភិបាលសហព័ន្ធអាមេរិកបានបង្ហាញថា វៀតណាម ថៃ ម៉ាឡេស៊ី និងឥណ្ឌូណេស៊ី គឺជាប្រទេសអាស៊ីអាគ្នេយ៍ទាំង ៤ ដែលជាប់ក្នុងបញ្ជី «ប្រទេសកខ្វក់ទាំង១៥»។

វៀតណាមនាំមុខគេ ដោយមានអតិរេកពាណិជ្ជកម្មជាមួយអាមេរិក ប្រមាណ ១២៣,៥ ប៊ីលានដុល្លារ ហើយបន្ទាប់មកគឺថៃ (៤៥,៦ ប៊ីលានដុល្លារ) ម៉ាឡេស៊ី (២៤,៨ ប៊ីលានដុល្លារ) និងឥណ្ឌូណេស៊ី (១៧,៩ ប៊ីលានដុល្លារ)។

នេះ គឺជាបញ្ជីសម្រាប់ប្រទេស និងតំបន់មានអតិរេកពាណិជ្ជកម្មខ្ពស់ជាមួយសហរដ្ឋអាមេរិក នៅជុំវិញពិភពលោក៖

ចិន (២៩៥,៤ ប៊ីលានដុល្លារ)
សហភាពអឺរ៉ុប (២៣៥,៦ ប៊ីលានដុល្លារ)
ម៉ិកស៊ិក (១៧១,៨ ប៊ីលានដុល្លារ)
វៀតណាម (១២៣,៥ ប៊ីលានដុល្លារ)
អៀរឡង់ (៨៦,៧ ប៊ីលានដុល្លារ)
អាល្លឺម៉ង់ (៨៤,៨ ប៊ីលានដុល្លារ)
តៃវ៉ាន់ (៧៣,៩ ប៊ីលានដុល្លារ)
ជប៉ុន (៦៨,៥ ប៊ីលានដុល្លារ)
កូរ៉េខាងត្បូង (៦៦ ប៊ីលានដុល្លារ)
កាណាដា (៦៣,៣ ប៊ីលានដុល្លារ)
ឥណ្ឌា (៤៥,៧ ប៊ីលានដុល្លារ)
ថៃ (៤៥,៦ ប៊ីលានដុល្លារ)
អ៊ីតាលី (៤៤ ប៊ីលានដុល្លារ)
ស្វីស (៣៨,៥ ប៊ីលានដុល្លារ)
ម៉ាឡេស៊ី (២៤,៨ ប៊ីលានដុល្លារ)
ឥណ្ឌូណេស៊ី (១៧,៩ ប៊ីលានដុល្លារ)
បារាំង (១៦,៤ ប៊ីលានដុល្លារ)
អូទ្រីស (១៣,១ ប៊ីលានដុល្លារ)
ស៊ុយអែត (៩,៨ ប៊ីលានដុល្លារ)

កន្លងអ្នកជំនាញព្រមានថា វិធានការពន្ធឱ្យស្មើគ្នារបស់ ត្រាំ នឹងបង្កើនកម្ដៅនៃសង្រ្គាមពាណិជ្ជកម្មពិភពលោក ដែលផ្ទុះឡើងដោយសារតែគោលនយោបាយពន្ធរបស់ ត្រាំ ដូចគ្នានាពេលកន្លងមក ក្រោយលោកចូលកាន់អំណាចកាលពីខែមករា។ ការណ៍នេះអាចនឹងប៉ះពាល់ដល់កំណើនសេដ្ឋកិច្ចសកល ដោយទម្លាក់ពាណិជ្ជកម្មពិភពលោក តាមរយៈការបង្កើតរបាំងពាណិជ្ជកម្មពីប្រទេសផ្សេងៗ។ អ្វីដែលសំខាន់នោះ ពន្ធទាំងនេះនឹងបង្កើនតម្លៃសម្រាប់អ្នកប្រើប្រាស់ បង្កើនសម្ពាធអតិផរណា ជាពិសេសសហរដ្ឋអាមេរិកផ្ទាល់៕