ព័ត៌មានអន្ដរជាតិ

អ្នកជំនាញ៖ ពន្ធរបស់ត្រាំ នឹងប៉ះពាល់ធ្ងន់ធ្ងរដល់កំណើនសេដ្ឋកិច្ចថៃ

បានផុស

១ នាទីute មុន

នៅ

ថ្ងៃពុធ ២ មេសា ២០២៥

ដោយ

ក្រុមហ៊ុនឈ្មួញជើងសាហិរញ្ញវត្ថុ InnovestX Securities បានអះអាងថា ពន្ធឆ្លើយតបឱ្យស្មើគ្នារបស់ប្រធានាធិបតីអាមេរិក លោក ដូណាល់ ត្រាំ អាចធ្វើឱ្យផលិតផលក្នុងស្រុកសរុប (GDP) របស់ថៃ ធ្លាក់ចុះរហូតដល់ទៅ ១,២ ភាគរយ ពីការព្យាករ ២,៥ ភាគរយ ខណៈការកាត់បន្ថយអត្រាការប្រាក់របស់ធនាគារកណ្តាលថៃ អាចនឹងមានប្រសិទ្ធិភាពតិចតួចក្នុងការពង្រឹងសេដ្ឋកិច្ច។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថៃស្ថិតក្នុងបញ្ជី «ប្រទេសកខ្វក់ទាំង១៥» ដែលសំដៅលើប្រទេសមានអតិរេកពាណិជ្ជកម្មធំៗជាមួយសហរដ្ឋអាមេរិក ដោយនឹងអាចរងផលប៉ះពាល់ដោយពន្ធរបស់លោក ត្រាំ។ ជាមធ្យម ពន្ធអាមេរិកលើការនាំចូលថៃគឺ ២ ភាគរយ ខណៈថៃយកពន្ធជាមធ្យម ៨ ភាគរយ លើផលិតផលអាមេរិក។ អតុល្យភាពពាណិជ្ជកម្មបែបនេះ ដែលលោក ត្រាំ លើកឡើងដើម្បីដាក់ចេញនូវពន្ធឱ្យស្មើគ្នា។ បើតាមទិន្នន័យរដ្ឋាភិបាលថៃ ថៃមានអតិរេកពាណិជ្ជកម្មជាមួយអាមេរិក ៣៥,៤ ប៊ីលានដុល្លារ ប៉ុន្តែរដ្ឋាភិបាលអាមេរិកដាក់តួលេខនេះរហូតដល់ជាង ៤៥,៦ ប៊ីលានដុល្លារ។

ការនាំចេញរបស់ ថៃទៅកាន់សហរដ្ឋអាមេរិក រួមចំណែកប្រមាណ ២៩ ភាគរយ នៃការនាំចេញសរុបរបស់ប្រទេស ដែលច្រើនជាងម៉ាឡេស៊ី (២៦ ភាគរយ) ប៉ុន្តែតិចជាងវៀតណាម (៤៧ ភាគរយ)។

ប្រធានផ្នែកស្រាវជ្រាវសេដ្ឋកិច្ចនៅក្រុមហ៊ុន InnovestX លោក Piyasak Manason បាននិយាយថា ក្រុមហ៊ុនបានព្យាករលើសេណារីយ៉ូចំនួន ៤ សម្រាប់ពន្ធឱ្យស្មើគ្នារបស់សហរដ្ឋអាមេរិក លើផលិតផលថៃ។

សេណារីយ៉ូទី ១ គឺសហរដ្ឋអាមេរិករក្សាពន្ធបច្ចុប្បន្នសម្រាប់ការនាំចូលទាំងអស់ពីប្រទេសថៃ (លទ្ធភាពនៃការកើតឡើង ៤០ ភាគរយ) ដោយបណ្តាលឱ្យ GDP ថៃកើនឡើងពី ២,៤-២,៥ ភាគរយ ។

ការដំឡើងពន្ធជាមធ្យមដល់ ៦ ភាគរយ (ដែលមានលទ្ធភាពកើតឡើង ៣០ ភាគរយ) នឹងកាត់បន្ថយ GDP មកនៅត្រឹមប្រហែល ២ ភាគរយ ខណៈការដំឡើងពន្ធជាមធ្យម ១០ ភាគរយ (លទ្ធភាពកើតឡើង ២០ ភាគរយ) នឹងកាត់បន្ថយ GDP មកត្រឹម ១,៧ ភាគរយ ក្នុងឆ្នាំ ២០២៥។

លោក Piyasak បានបន្តថា សម្រាប់ករណីដ៏អាក្រក់បំផុតដែល ត្រាំ ដំឡើងពន្ធមធ្យមលើសពី ១០ ភាគរយ (លទ្ធភាពកើតឡើង ១០ ភាគរយ) GDP អាចធ្លាក់ចុះមកត្រឹម ១,៣ ភាគរយ ប៉ុណ្ណោះ។

មន្រ្តីក្រុមហ៊ុនដដែល បាននិយាយថា៖ «សម្រាប់សេណារីយ៉ូដ៏អាក្រក់បំផុត ការកាត់បន្ថយអត្រាការប្រាក់របស់ធនាគារកណ្តាលនៅឆ្នាំនេះ នឹងមិនអាចជួយដល់សេដ្ឋកិច្ចបានទេ ពីព្រោះផលប៉ះពាល់ពីពន្ធគយរបស់សហរដ្ឋអាមេរិក នឹងធ្ងន់ធ្ងរខ្លាំងណាស់»។

លោកបាននិយាយថា ថៃពឹងផ្អែកយ៉ាងខ្លាំងលើពាណិជ្ជកម្មអន្តរជាតិ ហើយអាចជួបប្រទះទាំងផលប៉ះពាល់ដោយផ្ទាល់ និងដោយប្រយោលពីពន្ធឆ្លើយតបឱ្យស្មើគ្នា ខណៈប្រទេសផ្សេងទៀត និងពាណិជ្ជកម្មពិភពលោក ក៏ទទួលឥទ្ធិពលនៃសម្ពាធពីពន្ធទាំងនេះផងដែរ។ លោក Piyasak បាននិយាយថា៖ «សេដ្ឋកិច្ចពិភពលោកមានហានិភ័យនៃការជាប់គាំងក្នុងកម្រិតស្រាល ដែលមានន័យថា កំណើនសេដ្ឋកិច្ចយឺត ជាមួយនឹងអតិផរណាលើ់សគោលដៅ»៕