អ្នកជំនាញឱ្យពលរដ្ឋប្រុងប្រយ័ត្ន តម្លៃមាសនឹងដាំក្បាលចុះនៅពេលណាមួយ

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បាន​ប្រាប់ឱ្យប្រជាពលរដ្ឋប្រុងប្រយ័តទៅលើការជួញដូរមាស នៅចំពេលដែលតម្លៃ​ហាងឆេងមាស​កំពុង​កើនឡើងខ្ពស់ ខណៈស្ថានភាពនៃសង្រ្គាមពាណិជ្ជកម្មសកលពុំអាចធ្វើការព្យាករណ៍បាន។

តម្លៃហាងឆេងមាសបានបន្តកើនឡើងដល់ជិត ៤ ពាន់ដុល្លារ (៣ ៧៩០) ក្នុងមួយតម្លឹង នៅ​ប្រ​ទេស​កម្ពុជា នៅចំពេលដែលស្ថានភាព​សង្រ្គាមពាណិជ្ជកម្ម​រវាង​​ប្រទេស​មហាអំណាច​ ខណៈ​​​​ប្រាក់​​ដុល្លារអាមេរិកបានធ្លាក់ចុះ។

លោក ឡុង សំណាង ប្រាប់កម្ពុជាថ្មីនៅថ្ងៃទី ០២ ខែមេសា ឆ្នាំ ២០២៥ ថា មាសនឹងដាំ​ក្បាល​ចុះ​ពី​តម្លៃខ្ពស់បំផុតនៅពេលណាមួយ។

លោក ឡុង សំណាង បញ្ជាក់ថា៖ «អាចថា ពេលដែលវិនិយោគិនធំៗ និងធនាគារធំៗ ដែលគេទិញទៅលើតម្លៃហាង​ឆេងមាស បានន័យថា គេបុក​ទិញៗ​ តម្លៃហាងឆេងមាសគឺចាប់ផ្ដើមឡើងមិនស្រាកស្រាន្ត ប៉ុន្តែដល់ពេល​វិនិ​យោគិនធំៗ ទាំងអស់ហ្នឹង ឬធនាគារធំៗ គេកាត់ចំណេញ ឬលក់មាសហ្នឹងចេញវិញ អញ្ចឹង​មាន​ន័យថា ទីផ្សារ​នឹង​ដាំក្បាលចុះ ប៉ុន្តែការដាំក្បាលចុះមកវិញមិនចុះស្មើដើម ឬទាបទេ ប្រសិនបើឡើង ១០០ លេខ អញ្ចឹង​វាធ្លាក់ប្រហែល ៣០ លេខ ឬ ៥០ លេខ»។

លោក ឡុង សំណាង បន្ថែមថា៖ «កន្លែងនេះ ហើយដែលខ្ញុំបារម្ភថា ឡើងៗ មានការធ្លាក់​ចុះ​វិញ​ខ្លាំង ខ្ញុំបារម្ភខ្លាចបងប្អូនប្រជាពលរដ្ឋខ្មែរយើង ជួញដូរទៅលើឧបករណ៍​និស្សន្ទ​ ឬគងតម្លៃ​ទីផ្សារខាងក្រៅទិញមាសគីឡូ គាត់ឃើញតែឡើងគាត់បុកទិញគាត់ចេះតែចំណេញ ដល់ពេល​ថ្ងៃណាមួយ វិនិយោគិនធំៗ គេលក់មាសយកចំណេញ គាត់អត់បានដឹងគាត់នឹងខាត»។

ចំណាត់ការពន្ធរបស់លោក​ដូណាល់ ត្រាំ នៅតែបន្ត ខណៈប្រទេសមួយចំនួនដែលកំពុងធ្វើពាណិជ្ជកម្មជាមួយអាមេរិក ត្រៀមប្រកាសពន្ធ ឬចរចារបែបណា ដែលចំណុចមួយដែលវិនិយោគិនមើលឃើញថា តើគេអាចបន្ធូរបន្ថយពន្ធ ឬនៅតបន្តតានតឹង ធ្វើឱ្យតម្លៃហាងឆេងមាសបន្តកើនឡើង។

បើតាមលោក ឡុង សំណាង នៅក្នុងឆ្នាំ ២០២៥ នេះ តម្លៃមាសអាចនឹងហក់ឡើងដល់ ៤០០០ ដុល្លារ ក្នុងមួយតម្លឹង។

តម្លៃមាសបានកើនឡើងដល់ ៣១៤៥ ដុល្លារ ក្នុងមួយអោន នៅលើទីផ្សារអន្តរជាតិ ឬស្មើនឹង ៣៧៩០ ដុល្លារ ក្នុងមួយតម្លឹង។

សម្រាប់តម្លៃមាស នៅតាមបណ្ដាហាងនានា នៅរាជធានីភ្នំពេញបានកើនឡើងដល់ ៣៨០ ដុល្លារ ក្នុងមួយជីនៅថ្ងៃទី ០២ ខែមេសា ឆ្នាំ ២០២៥៕

អត្ថបទ៖ ឡេង ដេត