ផ្លូវ​ប្រប​មាត់​ទន្លេ​ភូមិសាស្ត្រស្រុកព្រែកប្រសព្វ ក្រាលកៅស៊ូ សម្រេចបានប្រមាណ ៥៥%

ផ្លូវខេត្តលេខ ២៧៩ តាមមាត់ទន្លេមេគង្គ ស្ថិតក្នុងភូមិសាស្ត្រស្រុកព្រែកប្រសព្វ ខេត្តក្រចេះ ដែល​មានប្រវែងសរុប ៧៣,៥០គីឡូម៉ែត្រ បាននឹងកំពុងស្ថាបនាជួសជុលក្រាលកៅស៊ូ DBST សម្រេចបានប្រមាណ ៥៥.៣៦ ភាគរយ។ នេះបើ​តាមការបញ្ជាក់ឲ្យដឹងពីលោក សាំង ប៊ុនថេន ប្រធានមន្ទីរសាធារណៈការ និងដឹកជញ្ជូនខេត្តក្រចេះ ឲ្យកម្ពុជាថ្មីដឹងនៅព្រឹកនេះ។

កំណាត់ផ្លូវខេត្តលេខ ២៧៩ មួយខ្សែនេះ គឺជាផ្លូវខេត្តតភ្ជាប់ពីស្រុកស្ទឹងត្រង់ ខេត្តកំពង់ចាម ជាមួយស្រុកព្រែកប្រសព្វ និងស្រុកសំបូរ នៃខេត្តក្រចេះ ហើយក៏ជាខ្សែរផ្លូវដែលតភ្ជាប់ទៅខេត្តស្ទឹងត្រែង តាមស្រុកសៀមបូកផងដែរ។

នៅ​ភូមិសាស្រ្ត​ស្រុកព្រែកប្រសព្វ ផ្លូវ​នេះ​មួយ​កំណាត់​បាន​ស្ថាបនា​ជា​ផ្លូវកៅស៊ូ​រួចរាល់​ និងកំណាត់​ខ្លះ​នៅជា​ផ្លូវ​ក្រួសក្រហម​នៅឡើយ​។

កំណាត់ផ្លូវខេត្តលេខ ២៧៩ ក្នុងស្រុកព្រែកប្រសព្វ ឆ្លង​កាត់​ឃុំចំនួន ៧ មាន​ឃុំឬស្សីកែវ ឃុំចំបក់ ឃុំតាម៉ៅ ឃុំកំពង់គរ ឃុំព្រែកប្រសព្វ ឃុំសោប និងឃុំជ្រោយបន្ទាយ។ កំណាត់ផ្លូវខេត្តលេខ ២៧៩ មានប្រវែងសរុប ៧៣,៥០​ គីឡូម៉ែត្រ បានកំពុងស្ថាបនាជួសជុលក្រាលកៅស៊ូ DBST មានប្រវែង ៤០,៦៩ គីឡូម៉ែត្រ និងកម្រាលដីល្បាយថ្មជាប្រភេទគ្រួសក្រហមមានប្រវែង ៣២,៨១ គីឡូម៉ែត្រ៕

អត្ថបទ៖ ប្រុញ វិធិន