ព័ត៌មានជាតិ

GCF កៀរគរមូលនិធិប្រមាណ ២២០ លានដុល្លារ ផ្តល់ហិរញ្ញប្បទានដល់ក្រុមហ៊ុនក្នុងប្រទេសអាស៊ានចំនួន ៥ រួមទាំងកម្ពុជា

បានផុស

២៣ វិនាទី មុន

នៅ

ថ្ងៃព្រហស្បតិ៍ ៣ មេសា ២០២៥

ដោយ

មូលនិធិអាកាសធាតុបៃតង (GCF) បានកៀរគរមូលនិធិប្រមាណ ២២០ លានដុល្លារ សម្រាប់ផ្តល់ហិរញ្ញប្បទានដល់ក្រុមហ៊ុននៅក្នុងប្រទេសអាស៊ានចំនួន ៥ រួមទាំងកម្ពុជា ដើម្បីឱ្យក្រុមហ៊ុនទាំងនោះអនុវត្តដំណោះស្រាយបៃតងក្នុងខ្សែច្រវាក់ផលិតកម្មរបស់ខ្លួន។ នេះបើតាមការឱ្យដឹងពីលោកស្រី Shomi Kim គណៈប្រតិភូមកពីវិទ្យាស្ថានកំណើនបៃតងសកល (GGGI)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសទទួលជួបគណៈប្រតិភូមកពីវិទ្យាស្ថានកំណើនបៃតងសកល នៅថ្ងៃទី០២ ខែមេសា ម្សិលមិញនេះ លោករដ្ឋមន្ត្រីក្រសួងឧស្សាហកម្ម ហែម វណ្ណឌី បានមានប្រសាសន៍កោតសរសើរវិទ្យាស្ថាន GGGI ដែលបានរួមចំណែកលើកកម្ពស់ប្រសិទ្ធភាពថាមពលក្នុងវិស័យកាត់ដេរ ស្បែកជើង និងទំនិញធ្វើដំណើរ។ ជាពិសេសលើតុល្យភាពរវាងការធ្វើឱ្យឧស្សាហកម្មកម្ពុជាកាន់តែបៃតង និងការលើកកម្ពស់ភាពប្រកួតប្រជែងនៃឧស្សាហកម្មទាំងនោះ។

ជាមួយគ្នានោះ លោករដ្ឋមន្ត្រីបានលើកទឹកចិត្តឱ្យ GGGI ពង្រីក និងចែករំលែកភាពជោគជ័យនៃកំណើនបៃតង បន្ថែមពីលើប្រសិទ្ធភាពថាមពល ដូចជាការប្រើប្រាស់ទឹក និងការគ្រប់គ្រងកាកសំណល់របស់រោងចក្រ និងផ្តល់ការគាំទ្រក្នុងការរៀបចំគោលការណ៍ណែនាំស្តីពីការបង្កើតសួនអេកូឧស្សាហកម្ម សម្រាប់ជាគំរូនៃការអភិវឌ្ឍឧស្សាហកម្មប្រកបដោយនិរន្តរភាព។

ជាការឆ្លើយតប លោកស្រី Shomi Kim បានបង្ហាញការប្តេជ្ញាចិត្តរបស់ GGGI ក្នុងការគាំទ្រកំណើនបៃតងរបស់កម្ពុជា តាមរយៈគម្រោងឧស្សាហកម្មបៃតង និងគម្រោងធុរកិច្ចដែលប្រើបច្ចេកវិទ្យាមេត្រីភាពអាកាសធាតុ។

លោកស្រី បានសង្កត់ធ្ងន់ថា «មូលនិធិអាកាសធាតុបៃតង (GCF) បានកៀរគរមូលនិធិប្រមាណ ២២០ លានដុល្លារ សម្រាប់ផ្តល់ហិរញ្ញប្បទានដល់ក្រុមហ៊ុននៅក្នុងប្រទេសអាស៊ានចំនួន ៥ រួមទាំងកម្ពុជា ដើម្បីឱ្យក្រុមហ៊ុនទាំងនោះអនុវត្តដំណោះស្រាយបៃតងក្នុងខ្សែច្រវាក់ផលិតកម្មរបស់ខ្លួន។ បច្ចុប្បន្ន GGGI កំពុងអនុវត្ត ដើម្បីផ្សារភ្ជាប់សហគ្រាសធុនតូច និងមធ្យមក្នុងស្រុក ជាមួយក្រុមហ៊ុនសកល លើការជួញដូរឥណទានកាបូន»។

អ្នកស្រី Shomi Kim បានលើកឡើងថា វិទ្យាស្ថាន GGGI បាននិងកំពុងគាំទ្រក្រុមហ៊ុនក្នុងស្រុក ក្នុងការបោះផ្សាយមូលបត្របំណុលបៃតង និងគាំទ្រធនាគារក្នុងស្រុកឱ្យទទួលបានការវាយតម្លៃទទួលស្គាល់ពីមូលនិធិ GCF សម្រាប់ការផ្តល់ហិរញ្ញប្បទានបៃតង។

ជាមួយគ្នានេះដែរ លោក ហែម វណ្ណឌី បានស្នើឱ្យវិទ្យាស្ថាន GGGI និង មូលនិធិ GCF ដើរតួជាសំឡេងតំណាងឱ្យប្រទេសដែលមានសេដ្ឋកិច្ចតូច ដោយតស៊ូមតិលើការអនុវត្តគោលការណ៍បៃតងប្រកបដោយសមធម៌ និងយុត្តិធម៌ ជាពិសេសសម្រាប់ប្រទេសដែលមានសេដ្ឋកិច្ចតូច និងសមត្ថភាពអនុលោមភាពនៅមានកម្រិត៕