កម្ពុជា នឹងនាំយកស្នាដៃស្ថាបត្យកម្ម-សិល្បៈបុរាណខ្មែរដ៏ល្អឯក បង្ហាញក្នុងពិព័រណ៍ពិភពលោក ២០២៥ អូសាកា ប្រទេសជប៉ុន នាពេលខាងមុខ

នាថ្ងៃទី១២ ខែមេសា ឆ្នាំ២០២៥ ខាងមុខនេះ កម្ពុជា ព្រមទាំង​គណៈប្រតិភូ នឹង​ចូលរួម​កម្មវិធី សម្ពោធពិព័រណ៍ពិភពលោក ២០២៥ អូសាកា នៅទីក្រុងអូសាកា តំបន់កាន់សៃ ប្រទេសជប៉ុន ដោយ​នឹង​នាំ​យក​ស្នាដៃស្ថាបត្យកម្ម និងសិល្បៈបុរាណខ្មែរដ៏ល្អឯក បង្ហាញក្នុងពិព័រណ៍​នេះ​ផង​ដែរ​។

​

បើ​តាម​ក្រសួង​ពាណិជ្ជកម្ម បាន​ឱ្យ​ដឹង​ថា ក្រោយ​ទទួលបានគោលការណ៍អនុញ្ញាត​ពី សម្តេច​ធិបតី ហ៊ុន ម៉ាណែត ​នាយករដ្ឋមន្ត្រី​កម្ពុជា លោក​ស្រី ចម និម្មល រដ្ឋមន្ត្រីក្រសួងពាណិជ្ជកម្ម នឹងអញ្ជើញ​ដឹកនាំគណៈប្រតិភូក្រសួងពាណិជ្ជកម្ម ចូលរួមកម្មវិធី សម្ពោធពិព័រណ៍ពិភពលោក ២០២៥ អូសាកា នៅទីក្រុងអូសាកា តំបន់កាន់សៃ ប្រទេសជប៉ុន។

ក្នុងការចូលរួមក្នុងពិព័រណ៍ពិភពលោក ២០២៥ អូសាកានេះ កម្ពុជាបានរៀបចំសាងសង់​ពន្លាជាតិ​កម្ពុជា​ដោយ​រំលេច​អំពី “ប្រាសាទ​កោះកេរ” ជាគោល ដែល​ជា​តំបន់​បេតិកភណ្ឌ​ពិភពលោក របស់​អង្គការយូណេស្កូ។ ការណ៍​​នេះ បានឆ្លុះ​បញ្ចាំង​ពីការយក​ចិត្តទុកដាក់​របស់​កម្ពុជា ក្នុង​ការ​​អភិរក្ស​បេតិកភណ្ឌ វប្បធម៌​ដ៏​សម្បូរបែប និង​បង្ហាញ​ពីស្នាដៃ​ស្ថាបត្យកម្ម និង​សិល្បៈបុរាណខ្មែរដ៏ល្អឯក។

ពន្លាជាតិ កម្ពុជា​ក៏មានរំលេចនូវរូបសំណាកសត្វគោព្រៃដែលជាសត្វតំណាងជាតិ និងជីវចម្រុះ​ដែល​ជានិមិត្តរូប​នៃឧត្តមភាព ដ៏​សម្បូរបែបនៃធនធានធម្មជាតិរបស់កម្ពុជា អមដោយការ​សាងសង់​ថែវ​ប្រាសាទអង្គរវត្ត​នៅផ្នែកខាងឆ្វេង ដោយ​បានរំលេច​ផ្ទាំងទស្សនីយភាព​កូរសមុទ្រ​ទឹកដោះ​នៅលើជញ្ជាំង​ថែវ​ខាងកើតនៃប្រាសាទ និង​នៅខាងស្តាំ មានសំណង់ផ្ទះខ្មែរធ្វើអំពីឫស្សី និង​នៅចំណុច​កណ្តាល​មានរៀបចំឱ្យ​មានជាទិដ្ឋភាព​វាលស្រែ​ដែល​ស្តែង​​ឱ្យឃើញ​ពីសក្តានុពល​កសិកម្ម និង​ផលិតផល​អង្ករ​ដ៏មាន​ឱជារសរបស់កម្ពុជា និងមាន​ម៉ាកែត​ប្រាសាទអង្គរវត្ត។​

​បន្ថែមជា​មួយ​គ្នា​នេះ កម្ពុជា ក៏នឹងនាំយកផលិតផលខ្មែរ​ទៅតាំងបង្ហាញ​ដល់​ភ្ញៀវជាតិ-អន្តរជាតិ និងថ្នាក់​ដឹកនាំដែលនឹង​ចូលរួមពិព័រណ៍នេះផងដែរ។ មិនតែប៉ុណ្ណោះ ពិព័រណ៍ពិភពលោកនេះ នឹងផ្តល់ឱកាស​ឱ្យកម្ពុជាផ្សព្វផ្សាយពីផលិតផលដែលមានសក្តានុពលសម្រាប់ ការនាំចេញ និងផ្សព្វផ្សាយពីសក្តានុពលទេសចរណ៍របស់កម្ពុជា ដល់ប្រជាជនជប៉ុន និងភ្ញៀវចូលទស្សនាពិព័រណ៍។

បន្ថែមលើនេះ កម្ពុជា និងគណៈកម្មការរៀបចំពិព័រណ៍របស់ជប៉ុន គ្រោងរៀបចំ កម្មវិធីទិវាជាតិកម្ពុជា នៅ ថ្ងៃទី៥ ខែកក្កដា ឆ្នាំ២០២៥ ដែលកម្មវិធីនេះនឹងមានការបង្ហាញអំពីសិល្បៈវប្បធម៌ ប្រពៃណីទំនៀមទម្លាប់ ការ សម្តែងទស្សនីយភាព ការបង្ហាញម្ហូបអាហារនិងផលិតផលខ្មែរ និងវេទិកាអមមួយចំនួនផងដែរ។

សូម​ជម្រាប​ថា ប្រទេសជប៉ុន ជាម្ចាស់ផ្ទះទទួលរៀបចំពិព័រណ៍ពិភពលោក ២០២៥ អូសាកា ក្រោមប្រធានបទ “រៀបចំ សង្គមសម្រាប់អនាគតដើម្បីជីវិតរស់នៅ” ដែលនឹងប្រព្រឹត្តទៅចាប់ពីថ្ងៃទី១៣ ខែមេសា ឆ្នាំ២០២៥ ដល់ ថ្ងៃទី១៣ ខែតុលា ឆ្នាំ២០២៥ ដោយមានរយៈពេល ៦ខែ នៅលើផ្ទៃដីទំហំ ១៥៤ហិកតា ដោយទទួលបានការ អនុញ្ញាតពីការិយាល័យពិព័រណ៍អន្តរជាតិ (Bureau International des Epositions-BIE) នៃប្រទេសបារាំង និងមានប្រទេសចូលរួមជាផ្លូវការចំនួន ១៥៨ប្រទេស និងអង្គការអន្តរជាតិធំៗចំនួន៧។

ក្នុងនោះផងដែរ ប្រទេសជប៉ុន រំពឹងថានឹងទទួលបានភ្ញៀវចូលទស្សនាប្រមាណ២៨លាននាក់ ដែលក្នុងនោះអាចមានភ្ញៀវបរទេស ប្រមាណ៣.៥លាននាក់៕