ក្នុងបរិបទពន្ធ ប្រាក់ហ្វ្រង់ស្វីស និងយ៉េនជប៉ុន កើនឡើង ខណៈដុល្លារធ្លាក់ចុះ

វិនិយោគិន​បាន​បង្កើនការវិនិយោគលើប្រាក់ហ្រ្វង់របស់​ស្វីស និងយ៉េនរបស់ជប៉ុន ដែលជាធ្វើឱ្យតម្លៃរូបិយប័ណ្ណទាំង២​កើនឡើង​ ខណៈ​ប្រាក់ដុល្លារអាមេរិក​ធ្លាក់ចុះ ជុំវិញ​គោលនយោបាយពន្ធគយរបស់​ប្រធានាធិបតី​អាមេរិក លោក ដូណាល់ ត្រាំ។ នេះបើតាម​ការចុះផ្សាយរបស់​ទីភ្នាក់ងារសារព័ត៌មាន​រ៉យទ័រ​។

​នាព្រឹកថ្ងៃចន្ទនេះ ប្រាក់ដុល្លារត្រូវបានជួញដូរ​នៅតម្លៃ ១ ដុល្លារ = ​​​១៤៤,៩៥ យ៉េន​ ដោយធ្លាក់ចុះ ១,៣ ភាគរយ ដែល​ជិតដល់កម្រិតទាបបំផុត​ក្នុង​រយៈពេល ៦ ខែ និងជាការ​បន្ត​ការធ្លាក់ចុះជិត ២ ភាគរយ កាលពីសប្ដាហ៍មុន។

ចំណែកឯ​ប្រាក់ហ្វ្រង់ស្វីសឯណោះវិញ បានកើនឡើងច្រើនជាង ១ ភាគរយ ដល់ ០,៨៥០៩៥ ហ្វ្រង់/ដុល្លារ ​​ខណៈវា​បាន​កើនឡើង ២,៣ ភាគរយ ធៀប​នឹង​ប្រាក់ដុល្លារ កាលពីសប្ដាហ៍មុន​។ ​

រូបិយប័ណ្ណសុវត្ថិភាពទាំង ២ បាន​កើនឡើងគួរឱ្យកត់សម្គាល់ បន្ទាប់ពីវិធាន​ការ​ពន្ធចុងក្រោយរបស់លោក ត្រាំ ។ ដូចគ្នានេះដែរ ទ្រព្យ​សម្បត្តិ​ដូចជាមូលបត្របំណុលរដ្ឋាភិបាល និងមាស បានកើនឡើង ​ចំពេល​ដែល​វិនិយោគិនបង្កើនការវិនិយោគលើជម្រើសទាំងនេះ ក្នុងក្ដីបារម្ភពីហានិភ័យផ្សេងៗ។

ប្រាក់អឺរ៉ូអឺរ៉ុបឯណោះវិញ បាន​កើនឡើង ០,២៦ ភាគរយ ធៀប​នឹង​ប្រាក់ដុល្លារ ដោយជួញដូរ​នៅតម្លៃ ១ អឺរ៉ូ = ១, ០៩៩៤ ដុល្លារ នៅទីផ្សារអាស៊ី។

លោក Rodrigo Catril អ្នកយុទ្ធសាស្រ្ត FX ជាន់ខ្ពស់នៅធនាគារជាតិអូស្រ្តាលី បាននិយាយថា៖ «​ដោយ​សារ​សហរដ្ឋអាមេរិកស្ថិតនៅចំណុចកណ្តាលនៃសង្រ្គាមពាណិជ្ជកម្ម នោះប្រាក់ដុល្លារបានទទួលរងនូវលំហូរចេញ» ដោយ​​អ្នកវិនិយោគ ​«សម្លឹង​ធ្វើពិពិធកម្មឆ្ងាយពីទ្រព្យសម្បត្តិរបស់សហរដ្ឋអាមេរិក»៕