ទ្រព្យសម្បត្តិ អេឡុន ម៉ាសក៍ ធ្លាក់ចុះក្រោម ៣០០ ប៊ីលានដុល្លារ ​ជំរុញបន្ថែមដោយពន្ធ ត្រាំ

ទ្រព្យសម្បត្តិរបស់ប្រធានក្រុមហ៊ុន Tesla Inc លោកមហាសេដ្ឋីពិភព​លោក អេឡុន ម៉ាសក៍ ធ្លាក់ចុះ​ក្រោម ៣០០ ប៊ីលាន​ដុល្លារ ជាលើកដំបូងរាប់តាំងពីខែវិច្ឆិកាឆ្នាំមុន ​ដោយ​គោលនយោបាយពន្ធគយរបស់ប្រធានាធិបតី ដូណាល់ ត្រាំ កាលពីសប្ដាហ៍​មុន ជួយជំរុញការធ្លាក់ចុះ​​។ នេះបើតាមការចុះផ្សាយរបស់សារព័ត៌មាន​ Bloomberg។

លោក ម៉ាសក៍ បាន​បាត់បង់ ៤,៤ ប៊ីលាន​ដុល្លារ​ បន្ថែមកាលពីថ្ងៃចន្ទ នៅពេល​ភាគហ៊ុនរបស់ក្រុមហ៊ុនផលិតរថយន្តអគ្គិសនី Tesla បាន​បន្តធ្លាក់ចុះ​ ដែល​ធ្វើឱ្យ​ទ្រព្យសម្បត្តិរបស់​លោក ធ្លាក់ចុះដល់ ២៩៧,៨ ប៊ីលាន​ដុល្លារ ក្នុង​​តារាង​សន្ទស្សន៍មហាសេដ្ឋី Bloomberg គិតត្រឹមថ្ងៃអង្គារនេះ (ម៉ោងនៅកម្ពុជា)។

គិតតែថ្ងៃព្រហស្បតិ៍ និងសុក្រសប្ដាហ៍មុន ទ្រព្យសម្បត្តិរបស់លោក ម៉ាសក៍ បាន​ធ្លាក់ចុះ ៣១ ប៊ីលាន​ដុល្លារ។ គិតពីដើម​ឆ្នាំមក​ទល់ពេល​នេះ លោក ម៉ាសក៍ បាន​ខាតបង់ទ្រព្យប្រមាណ ១៣៥ ប៊ីលាន​ដុល្លារ។

ទោះបីជា​លោកបន្តជាមហាសេដ្ឋីកំពូលរបស់ពិភព​លោក​ក្ដី លោក ម៉ាសក៍ គឺជា​អ្នកខាតបង់ទ្រព្យធំជាងគេ​បំផុតទី៦ ក្នុងបញ្ជីអ្នកមានបំផុតទាំង ៥០០ របស់ Bloomberg កាលពីថ្ងៃចន្ទ។ សន្ទស្សន៍មហាសេដ្ឋីដដែល បាន​បង្ហាញពីការធ្លាក់ចុះនៃទ្រព្យសម្បត្តិ ២៧១ ប៊ីលាន​ដុល្លារ ដែលជាកំណត់ត្រាអាក្រក់បំផុត​ទី៣ ក្នុងប្រវត្តិសាស្រ្ត។

​គេមើលឃើញថា ការធ្លាក់ចុះនៃទ្រព្យសម្បត្តិរបស់លោក ម៉ាសក៍ ត្រូវ​បាន​ជំរុញ​ដោយ​ការធ្លាក់ចុះនៃផ្សារភាគហ៊ុនរបស់ Tesla។ ​​ភាគហ៊ុន​ Tesla បានកើនឡើងខ្ពស់ បន្ទាប់ពី​ជាប់ឆ្នោតរបស់លោក ត្រាំ ដែលធ្វើឱ្យ​ទ្រព្យរបស់លោក ម៉ាសក៍ កើនដល់ជាង ៤៨៦ ប៊ីលាន​ដុល្លារ។

យ៉ាងណាមិញ ការធ្លាក់ចុះបាន​​ចាប់ផ្ដើមឡើង​ ក្រោយ​លោក ត្រាំ ឡើងកាន់អំណាច ហើយតែងតាំងលោក ម៉ាសក៍ ជាទីប្រឹក្សារបស់លោក។ កិរិយាគាំទ្របក្ស​ណាហ្ស៊ីរបស់លោក ម៉ាសក៍ និងការជាប់ពាក់ព័ន្ធរបស់លោកក្នុងនយោបាយសហរដ្ឋអាមេរិក និង​ក្រុមស្ដាំនិយមនៅអឺរ៉ុប បាន​បង្កជា​ចលនាស្អប់ក្រុមហ៊ុនរបស់លោក រួមទាំង Tesla រហូតដល់មាន​ការបំផ្លិចបំផ្លាញសាធារណៈ​។ ជាមួយ​គ្នានោះ កម្សោយនៃការលក់នៅអឺរ៉ុប និងចិនលើរថយន្ត Tesla និងកំណើននៃការប្រកួតប្រជែងពីក្រុមហ៊ុនផលិតរថយន្តអគ្គិសនីដទៃ ក៏ជាមូលហេតុធ្វើឱ្យផ្សារហ៊ុនរបស់ Tesla ធ្លាក់ចុះផងដែរ​។ ​​

ភាគហ៊ុនរបស់ Tesla បានធ្លាក់ចុះជាង ៥០ ភាគរយ​ ចាប់តាំងពីបាន​ហក់ដល់កំណត់ត្រាខ្ពស់បំផុតនៅពាក់កណ្តាលខែធ្នូ ឆ្នាំមុន​។

ការធ្លាក់ចុះនេះបាន​បន្តធ្ងន់ធ្ងរ នៅពេល​ទីផ្សារហិរញ្ញវត្ថុសកលប្រឈមមុខ​នឹង​ការលក់ហ៊ុនចេញ ដោយ​វិនិយោគិនព្រួយបារម្ភពីវិបត្តិសេដ្ឋកិច្ច ជុំវិញ​វិធានការពន្ធគយបដិការ ដែល​លោក ត្រាំ ប្រកាសឡើងកាលពីថ្ងៃព្រហស្បតិ៍សប្ដាហ៍មុន។

កាលពីចុងសប្តាហ៍ លោក ​ម៉ាកស៍ បាននិយាយថា លោកសង្ឃឹម​នឹងមាន​ប្រព័ន្ធ «ពន្ធសូន្យ​» ​រវាងសហរដ្ឋ​អាមេរិក និងអឺរ៉ុប ដែលនឹងបង្កើត «តំបន់ពាណិជ្ជកម្មសេរី» ប្រកបដោយប្រសិទ្ធភាព។ ​ប្អូន​ប្រុសរបស់​លោក ម៉ាសក៍ ឈ្មោះ Kimbal កាលពីថ្ងៃចន្ទ បានរិះគន់ពន្ធរបស់ ត្រាំ ថាជា «ពន្ធរចនាសម្ព័ន្ធ និងជាអចិន្ត្រៃយ៍ លើអតិថិជនអាមេរិក»។

លោក Kimbal Musk ដែលជាសមាជិកក្រុមប្រឹក្សាក្រុមហ៊ុន Tesla បាននិយាយ​ក្នុងសារបង្ហោះនៅលើបណ្ដាញសង្គម X ថា៖ «ទោះបីជាលោក​(ត្រាំ)ទទួលបានជោគជ័យក្នុងការនាំយកការងារ​ពីបរទេស តាមរយៈពន្ធគយក៏ដោយ តម្លៃនឹងនៅតែខ្ពស់ ហើយពន្ធលើការប្រើប្រាស់ នឹងនៅតែធ្វើឱ្យ​តម្លៃខ្ពស់ជាងមុន ពីព្រោះយើងមិន​ពូកែគ្រប់យ៉ាងនោះទេ»៕

​