តម្លៃមាសបន្តដាំក្បាលចុះ តែអ្នកជំនាញថា នៅតែមានឱកាសស្ទុះឡើងវិញ

តម្លៃមាសក្នុងស្រុកបានបន្តធ្លាក់ចុះនៅរយៈពេល ៤ ថ្ងៃជាប់ៗគ្នា ខណៈអ្នកជំនាញបានអះអាងថា ឱកាសស្ទុះឡើង​​វិញនៅតែកើតមាន។

តម្លៃហាងឆេងមាសបានបើកទីផ្សារនៅព្រឹកថ្ងៃទី ០៩ ខែមេសា ឆ្នាំ ២០២៥ ក្នុងតម្លៃ ២៩៨២ ដុល្លារ ក្នុងមួយអោន នៅលើទីផ្សារអន្តរជាតិ ឬស្មើនឹង ៣៥៩២ ដុល្លារ ក្នុងមួយ​តម្លឹង​នៅក្នុងប្រទេសកម្ពុជា។

សម្រាប់បណ្ដាហាងនានាក្នុងរាជធានីភ្នំពេញលក់ចេញក្នុងតម្លៃ ៣៦៣ ដុល្លារ ក្នុងមួយជីនៅថ្ងៃទី ០៩ មេសា។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities ប្រាប់​កម្ពុជាថ្មី នៅថ្ងៃទី ០៩ ខែមេសា ឆ្នាំ ២០២៥ ថា តម្លៃមាសបានបន្តធ្លាក់ចុះចាប់តាំងពីថ្ងៃទី ៤ ខែមេសាពីតម្លៃខ្ពស់បំផុត ៣១៦៧ ដុល្លារ ក្នុងមួយអោន មកនៅតម្លៃ ៣០០០ ដុល្លារ។

លោក ឡុង សំណាង យល់ថា ការធ្លាក់ចុះនេះ ពាក់ព័ន្ធនឹងអត្រាពន្ធ ដែលប្រធានាធិបតី​សហ​រដ្ឋ​អា​​មេរិក​បានដាក់ពន្ធទៅលើប្រទេសមួយចំនួន។

លោក ឡុង សំណាង យល់ឃើញថា៖ «បើយើងស្ដាប់ពីសម្ពាធពន្ធ យើងនឹងគិតថា ហាងឆេង​មាស​​នឹងអាចមានការ​កើនឡើង ហើយសង្គ្រាមពាណិជ្ជកម្មក៏អាចឱ្យមាសកើនឡើងដែរ បន្ទាប់ពី​មាន​ការចរចារពីបណ្ដាប្រទេសមួយចំនួនជា​មួយសហរដ្ឋអាមេរិកឃើញថា លទ្ធផលវិជ្ជមានច្រើន អញ្ចឹង​ហើយធ្វើឱ្យមាសធ្លាក់ចុះទៅក្រោម»។

លោក ឡុង សំណាង ប្រាប់ថា កម្រិតតម្លៃហាងឆេងមាសគឺខ្ពស់ចាប់តាំងពីថ្ងៃទី ៣ ខែមេសា ដែល​មានតម្លៃរហូតដល់ ១០ ម៉ឺន ៨០០ ដុល្លារ រហូតដល់ ១០ ម៉ឺន ១ ពាន់ដុល្លារ ក្នុងមួយគីឡូ ដូច្នេះបណ្ដាវិនិយោគិនធំៗនៅលើពិភពលោក ក៏ដូចជាធនាគារឯកជនមួយចំនួនមាន​មាសកាន់​នៅ​​​ក្នុង​ដៃច្រើន ហើយគេលក់ចេញដែលជះឥទ្ធិពលទៅដល់ទីផ្សារនៅលើពិភពលោក។

លោក ឡុង សំណាង បន្ថែមថា ទោះបីជាគោលនយោបាយដំឡើងពន្ធនាំចេញ-នាំចូលរបស់​អាមេរិក ប៉ុន្តែ​​តម្លៃមាស​នៅ​តែមានការកើនឡើងពីមួយឆ្នាំទៅមួយឆ្នាំដដែល។

លោក ឡុង សំណាង បញ្ជាក់ថា៖ «យើងទទួលស្គាល់ថា នៅសហរដ្ឋអាមេរិកមាន​តម្កល់មាស​ច្រើន​ជាងគេនៅលើពិភពលោក ប៉ុន្តែមិនមែនមានន័យថា វិនិយោគិនធំៗ ឬក៏បណ្ដាប្រទេស​មួយចំនួនត្រូវតែលក់មាសឱ្យទៅអាមេរិកទេ ទោះបីគាត់ដាក់ពន្ធទៅលើទំនិញមួយចំនួន ដែល​មិន​រាប់​បញ្ចូល​លើការដឹកជញ្ជូនមាស តម្លៃហាងឆេងមាសនៅតែមានសន្ទុះនៃការ​កើនឡើងពីមួយ​ឆ្នាំ​ទៅ​មួយឆ្នាំ»៕

អត្ថបទ៖ ឡេង ដេត