សេដ្ឋកិច្ច

EU ចាប់ដៃចិន ពិភាក្សាគ្នាលើបញ្ហាពន្ធរបស់ ត្រាំ

បានផុស

១៤ នាទីutes មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

ក្រសួងពាណិជ្ជកម្មចិន បាននិយាយនៅថ្ងៃព្រហស្បតិ៍នេះថា ប្រទេសចិន និងសហភាពអឺរ៉ុប (EU) បានផ្លាស់ប្តូរទស្សនៈលើការពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងភាគីទាំង២ ដើម្បីឆ្លើយតបទៅនឹងពន្ធគយបដិការរបស់សហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍របស់ក្រសួងចិន បាននិយាយថា ក្នុងការហៅជាវិដេអូកាលពីថ្ងៃអង្គារ រដ្ឋមន្ត្រីក្រសួងពាណិជ្ជកម្មចិន លោក Wang Wentao បានពិភាក្សាជាមួយស្នងការសន្តិសុខពាណិជ្ជកម្ម និងសេដ្ឋកិច្ចអឺរ៉ុប លោក Maros Sefcovic អំពីការចាប់ផ្តើមឡើងវិញនៃកិច្ចពិភាក្សាស្តីពីការផ្តល់ជំនួយសង្គ្រោះពាណិជ្ជកម្ម និងអំពីការអនុវត្តការចរចាភ្លាមៗ លើបញ្ហាតម្លៃរថយន្តអគ្គិសនី។

គេមើលឃើញថា ការចាប់ដៃគ្នាពិភាក្សានេះ ធ្វើឡើងមុនពេលប្រធានាធិបតីអាមេរិក លោក ដូណាល់ ត្រាំ ប្រកាសពន្យារពេលពន្ធបដិការលើប្រទេសភាគច្រើនរយៈពេល ៩០ ថ្ងៃ និងទម្លាក់វាមកត្រឹមអត្រាពន្ធមូលដ្ឋាន ១០ ភាគរយ។ យ៉ាងណាមិញ លោកបានបន្ថែមពន្ធលើចិនរហូតដល់ទៅ ១២៥ ភាគរយ ពី ១០៤ ភាគរយ ក្រោយចិនប្ដេជ្ញា «ប្រយុទ្ធដល់ទីបញ្ចប់» ដោយបង្កើនពន្ធលើទំនិញអាមេរិក ដល់ ៨៤ ភាគរយ។

លោក Wang បានប្រាប់ លោក Sefcovic ថា ចិនបានត្រៀមខ្លួនរួចជាស្រេច ដើម្បីធ្វើឱ្យស៊ីជម្រៅនូវពាណិជ្ជកម្ម ការវិនិយោគ និងកិច្ចសហប្រតិបត្តិការឧស្សាហកម្មជាមួយសហភាពអឺរ៉ុប។

ប្រធានាធិបតីចិន លោក ស៊ី ជីនពីង ជួបជាមួយប្រធានគណៈកម្មការអឺរ៉ុប លោកស្រី Ursula von der Leyen កាលពីដើមខែមេសាឆ្នាំ ២០២៣ ។

សេចក្តីថ្លែងការណ៍របស់ក្រសួងដដែលបានបន្តថា លោក Wang បានជំរុញចិន និងសហភាពអឺរ៉ុប ឱ្យរួមគ្នាការពារប្រព័ន្ធពាណិជ្ជកម្មពហុភាគី ដែលផ្អែកលើមូលដ្ឋានលើច្បាប់ ហើយប្រកាន់ខ្ជាប់នូវសេរីភាវូបនីយកម្ម និងការសម្របសម្រួលពាណិជ្ជកម្ម ដែលផ្ដល់ស្ថិរភាព និងភាពប្រាកដប្រជាបន្ថែមទៀតទៅក្នុងសេដ្ឋកិច្ច និងពាណិជ្ជកម្មពិភពលោក។

ចិន និងសហភាពអឺរ៉ុប ក៏បានពិភាក្សាផងដែរ អំពីការបង្កើតបរិយាកាសធុរកិច្ចកាន់តែអំណោយផលសម្រាប់សហគ្រាស និងបញ្ហាផ្ទេរពាណិជ្ជកម្ម ខណៈភាគីទាំង ២ នឹងបន្តពង្រឹងទំនាក់ទំនងក្រោមក្របខណ្ឌអង្គការពាណិជ្ជកម្មពិភពលោក និងរួមគ្នាលើកកម្ពស់កំណែទម្រង់ WTO ។ នេះបើតាមសេចក្ដីថ្លែងការណ៍ដដែល។

គួររំឭកថា សហភាពអឺរ៉ុបបានដាក់ពន្ធបន្ថែម ៣៥,៣ ភាគរយ លើរថយន្តអគ្គិសនីចិនកាលពីឆ្នាំមុន បន្ថែមពីលើពន្ធ ១០ ភាគរយ ដែលមានស្រាប់។ យ៉ាងណាមិញ ចំពេលដែលហានិភ័យនៃអរិភាពពន្ធរបស់ ត្រាំ កើនឡើង ភាគីទាំង ២ បានចាប់ផ្ដើមបង្កើនការចរចាគ្នាជាថ្មី ដោយមានប្រទេសក្នុងប្លុកអឺរ៉ុបដូចជាអេស្ប៉ាញ បានការពារទំនាក់ទំនងពាណិជ្ជកម្មជិតស្និទ្ធជាមួយចិន។

ទន្ទឹមនឹងការសងសឹករបស់ចិន សហភាពអឺរ៉ុប ដែលជាសម្ព័ន្ធមិត្តអាមេរិកទាំងផ្នែកនយោបាយ និងសេដ្ឋកិច្ច ក៏ប្រកាសពន្ធសងសឹកលើសហរដ្ឋអាមេរិក ផងដែរ៕