តម្លៃមាសហក់ឡើងវិញជិត ៤០០០ ដុល្លារ មួយតម្លឹង

តម្លៃហាងឆេងមាសហក់ឡើងវិញដល់ជិត ៤ ពាន់ដុល្លារ (៣ ៨២៧) ក្នុងមួយតម្លឹង នៅប្រទេសកម្ពុជា ជំរុញដោយសង្គ្រាមពាណិជ្ជកម្មរវាងចិន និងអាមេរិក។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities ប្រាប់កម្ពុជាថ្មី នៅថ្ងៃទី ១១ ខែមេសា ឆ្នាំ ២០២៥ថា នៅពេលដែលតម្លៃហាងឆេងមាស​បានធ្លាក់ចុះនៅតម្លៃទាប វិនិយោគិនធំៗ និងធនាគារឯកជនធំៗចាប់ផ្ដើមទិញវិញ ខណៈ​សន្ទុះនៃការបញ្ជាទិញបានកើនឡើងខ្ពស់នៅរយៈពេលប៉ុន្មានថ្ងៃនេះ ដែលរុញច្រាន​ដោយសម្ពាធពន្ធឆ្លើយឆ្លងគ្នាទៅវិញទៅមករវាងប្រទេសចិន និងអាមេរិក ធ្វើឱ្យសម្ពាធ​នៃប្រាក់ដុល្លារធ្លាក់ចុះ ខណៈតម្លៃពន្ធប៉ះពាល់ទៅដល់ពាណិជ្ជកម្ម ឬសេដ្ឋកិច្ច ធ្វើឱ្យតម្លៃ​ហាងឆេងមាសហក់ឡើង។

លោក ឡុង សំណាង យល់ឃើញថា៖ «ប្រសិនបើសហរដ្ឋអាមេរិក ដាក់សម្ពាធពន្ធទៅវិញទៅ​មកជាមួយបណ្ដាប្រទេសមួយចំនួនដែលមានសេដ្ឋកិច្ចទាប ឬក៏ឱនភាពពាណិជ្ជកម្ម​ជាមួយអាមេរិក វានៅតូច មិនសូវមានផលប៉ះពាល់ទៅដល់ ហាង​ឆេងមាស ឬសេដ្ឋកិច្ច​លើពិភ​ព​លោកទេ ប៉ុន្តែបើសិន​ជាសម្ពាធពន្ធ ឬក៏ការឌឺដងសងសឹកគ្នាទៅវិញទៅមករវាងអាមេរិក និង​ប្រទេសចិន អាហ្នឹងជាបញ្ហាធំមួយ ដែលធ្វើឱ្យសេដ្ឋកិច្ចលើពិភពលោកអាចគាំងស្ទះ ឬក៏សេដ្ឋកិច្ច​ថមថយខ្លាំង ដែលរុញច្រានឱ្យប្រាក់ដុល្លារថយដែរ ហើយបណ្ដាវិនិយគិនធំៗ ឬធនាគារឯកជន​ធំៗ​​គេតែង​តែមើល​ឃើញប្រទេសពីរហ្នឹង ប្រសិនបើប្រទេសពីរហ្នឹង​មានបញ្ហាមិន​ល្អនឹងគ្នា​ទំនុ​ក​ចិត្ត​​​និងការវិនិយោគគេនឹងដើរទៅតាមហ្នឹងហើយ»។

តម្លៃហាងឆេងមាសបន្តកើនឡើងដល់ ៣ ១៧៧ ដុល្លារក្នុងមួយអោននៅទីផ្សារអន្តរជាតិ ឬស្មើ​នឹង ៣ ៨២៧ ដុល្លារ ក្នុងមួយតម្លឹងនៅកម្ពុជា។ សម្រាប់ហាងឆេងនៅរាជធានីភ្នំពេញ តាមបណ្ដា​ហាងនានានៅថ្ងៃទី ១១ ខែមេសា នេះ លក់ចេញ​ក្នុងតម្លៃ ៣៨៦ ដុល្លារ ក្នុងមួយជី៕

អត្ថបទ៖ ឡេង ដេត