សមាគមវាយនភណ្ឌកម្ពុជាស្នើដល់ម្ចាស់រោងចក្រ សហគ្រាស បើកប្រាក់ឈ្នួលដល់កម្មករនិយោជិត ឱ្យបានមុនថ្ងៃឈប់សម្រាកចូលឆ្នាំខ្មែរ

នៅ​ថ្ងៃ​ទី​១១ ខែ​មេសា ឆ្នាំ​២០២៥ នេះ សមាគមវាយនភណ្ឌ សម្លៀកបំពាក់ ស្បែកជើង និងផលិតផល​ធ្វើដំណើរ​នៅកម្ពុជា (TAFTAC) បាន​ចេញ​សារ​ណែនាំ​​ ដល់​សមាជិកដោយ​តម្រូវ​ឱ្យ​ រោងចក្រ សហគ្រាស ​បើក​ប្រាក់ឈ្នួលបុរេប្រទាន ដល់កម្មករនិយោជិត ឱ្យបានមុនថ្ងៃឈប់សម្រាកចូលឆ្នាំខ្មែរ។

យោងសេចក្តីជូនដំណឹងលេខ ០០៨/២៥ ចុះថ្ងៃទី២៧ ខែមីនា ឆ្នាំ២០២៥ ស្តីពីការអនុវត្ត​ការឈប់​សម្រាក​ក្នុងពិធី បុណ្យចូលឆ្នាំថ្មីប្រពៃណីជាតិ ក្រសួងការងារ និងបណ្តុះបណ្តាលវិជ្ជាជីវៈ ​អំពីការឈប់សម្រាករយៈ ពេល ៣ (បី) ថ្ងៃ ពោល​​គឺថ្ងៃទី ១៤-១៥-១៦ ខែមេសា ឆ្នាំ២០២៥ ហើយនិយោជកត្រូវសម្របសម្រួលរៀបចំបើក ប្រាក់ឈ្នួលខែមេសា ដែលកម្មករនិយោជិតត្រូវទទួលបានលើកទី១ ឱ្យបានមុនថ្ងៃឈប់សម្រាកនេះ។

ក្នុងន័យនេះ ចំពោះរោងចក្រ សហគ្រាសជាសមាជិក ដែលបានបើកប្រាក់ឈ្នួលលើកទី១ នៅចន្លោះថ្ងៃទី ២០ ដល់ថ្ងៃទី ២៥ ខែមីនា និងត្រូវបើកប្រាក់ឈ្នួលលើកទី២ នៅចន្លោះថ្ងៃទី ៥ ដល់ថ្ងៃទី ១០ ខែមេសា ឆ្នាំ២០២៥ ត្រូវបានចាត់ទុកថាបានបើកប្រាក់ឈ្នួល បានមុនថ្ងៃឈប់សម្រាកក្នុងពិធីបុណ្យចូលឆ្នាំថ្មី ហើយពុំមានកាតព្វកិច្ច បើកប្រាក់ឈ្នួលខែមេសា ដែលកម្មករនិយោជិតត្រូវទទួលបានលើកទី១ ឱ្យបានមុនថ្ងៃឈប់សម្រាកនេះទេ។

សមាគម​លើកទឹកចិត្ត ដល់រោងចក្រ សហគ្រាសជាសមាជិក ផ្តល់ជូនជាប្រាក់​ឈ្នួលបុរេប្រទាន ដល់កម្មករនិយោជិតឱ្យបានមុនថ្ងៃឈប់សម្រាកនេះ ទៅតាមលទ្ធភាពរបស់ខ្លួន តាមដែលអាចធ្វើទៅបាន។

សមាគម សង្ឃឹមយ៉ាងមុតមាំថា បន្ទាប់ពីទទួលបានសារណែនាំនេះហើយ រោងចក្រ សហគ្រាសដែលជាសមាជិក ទាំងអស់ នឹងចូលរួមសហការ និងអនុវត្តតាមការណែនាំ​ខាងលើ​ប្រកប​ដោយ​ស្មារតី​ទទួល​ខុសត្រូវខ្ពស់។