ព័ត៌មានជាតិ

កសិដ្ឋានគិរីសួគ៍ គ្រោងនាំចូលពូជគោបន្ថែម ដើម្បីឆ្លើយតបនឹងតម្រូវការទីផ្សារ

បានផុស

២១ វិនាទី មុន

នៅ

ថ្ងៃពុធ ២៣ មេសា ២០២៥

ដោយ

កសិដ្ឋានចិញ្ចឹមគោយកទឹកដោះគិរីសួគ៍ នៅចុងឆ្នាំ២០២៥ នេះ គ្រោងនាំចូលពូជគោពីប្រទេសអូស្ត្រាលីបន្ថែមទៀតដើម្បីចិញ្ចឹមយកទឹកដោះ ផ្គត់ផ្គង់ឱ្យគ្រប់គ្រាន់ទៅតាមតម្រូវការទីផ្សារ។ នេះបើតាមឱ្យបញ្ជាក់ពីលោក ជី សិលា សហស្ថាបនិកកសិដ្ឋានគិរីសួគ៌របស់ក្រុមហ៊ុន Khmer Fresh Milk Co., Ltd ដែលផលិតទឹកដោះគិរីសួគ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងមកកាន់ «កម្ពុជាថ្មី» នៅរសៀលថ្ងៃទី២៣ ខែមេសា នេះ លោក ជី សិលា បានមានប្រសាសន៍ថា តាំងពីឆ្នាំ២០២០មក ក្រុមហ៊ុនបាននាំចូលពូជគោពីប្រទេសអូស្រ្តាលីមកប្រមាណ ៥៥០ដើម្បីចិញ្ចឹមយកទឹកដោះ ប៉ុន្តែបើគិតមកដល់ពេលបច្ចុប្បន្ននេះបានកើនដល់ជិត ១៥០០ក្បាលហើយ។

បច្ចុប្បន្នដោយសារតម្រូវការទឹកដោះគោនៅលើទីផ្សារមានការកើនឡើងជាបន្តបន្ទាប់ ហើយកសិដ្ឋានគិរីសួគ៍ក៏ទទួលបានការគាំទ្រច្រើននៅលើទីផ្សារ ជាហេតុធ្វើឱ្យកសិដ្ឋានមិនអាចផ្គត់ផ្គង់បានគ្រប់គ្រាន់តាមតម្រូវការនៅលើទីផ្សារ ព្រោះការលក់ទឹកដោះគោ ចេះតែមានការកើនឡើងជារៀងរាល់ខែ។

ជាក់ស្តែង នៅរយៈពេលប៉ុន្មានខែចុងក្រោយនេះ កសិដ្ឋានគិរីសួគ៍ គឺមិនអាចផ្គត់ផ្គង់ទឹកដោះគោគ្រប់គ្រាន់នៅតាមកន្លែងមួយចំនួននៅលើទីផ្សារដូចគ្នាដែរ។

ដើម្បីដោះស្រាយបញ្ហាក៏ប្រឈមលើការផ្គត់ផ្គង់ទឹកដោះគោនៅលើទីផ្សារ លោក ជី សិលា បានអះអាងថា នៅចុងឆ្នាំ២០២៥ នេះ កសិដ្ឋានគិរីសួគ៍ គ្រោងនាំចូលពូជគោបន្ថែម ដើម្បីពង្រីកផលិតកម្មឱ្យស្របតាមតម្រូវការទីផ្សារ ព្រោះកូនគោដែលកើតមក ក៏មិនអាចចិញ្ចឹមឱ្យធំធាត់ទាន់អាចយកទឹកដោះបាន បំពេញតាមតម្រូវការទីផ្សារដែរ។

សូមបញ្ជាក់ថា បច្ចុប្បន្នកសិដ្ឋានគិរីសួគ៍ លក់ទឹកដោះគោទៅលើទីផ្សារក្នុងមួយខែប្រមាណជា ៥០ម៉ឺនលីត្រ។ ប៉ុន្តែ នៅកំឡុងខែមេសា និងឧសភា នេះ ទីផ្សារអាចនឹងមានការថយចុះប្រមាណជា ១០% ដោយសារតែ អាកាសធាតុក្តៅខ្លាំង ជាហេតុធ្វើឱ្យគោផលិតទឹកដោះបានតិច។

ចំពោះមុខ ទឹកដោះគោគិរីសួគ៍ ១០០% គឺ ផលិត និងលក់នៅក្នុងស្រុកនៅមិនទាន់មានលទ្ធភាពនាំចេញទៅកាន់ទីផ្សារខាងក្រៅនៅឡើយទេ ព្រោះទឹកដោះស្រស់ដែលដាក់ក្លាសេគឺនៅនាំចូលពីក្រៅប្រទេសនៅឡើយ។

សព្វថ្ងៃនេះ បើនិយាយពីទីផ្សារចំពោះមុខ កសិដ្ឋានគិរីសួគ៍ មានទីផ្សារនៅក្នុងស្រុកសម្រាប់នាំចេញប្រមាណ ៣០% ហើយចំនួនទីផ្សារក្នុងស្រុកក៏មានការកើនឡើងជាបណ្តើរៗ ប៉ុន្តែមិនទាន់អាចជំនួសទីផ្សារនាំចូលនោះទេ ដែលកត្តាទាំងនេះទាមទារឱ្យមានការចូលរួមទាំងអស់គ្នា ទាំងការពង្រីកផលិតកម្ម ការគាំទ្រអតិថិជនទាំងអស់នៅក្នុងស្រុកឱ្យទទួលស្គាល់ និងទទួលយកទឹកដោះគោនៅក្នុងដែលមានគុណភាព និងតម្លៃអាចថោកជាងទឹកដោះគោនាំចូលប្រមាណ ៥% ផងដែរ៕