«ថ្ងៃជ័យជម្នះ ៧ មករា» គឺជាថ្ងៃកំណើតទី២របស់កម្ពុជាដែលមិនអាចបំភ្លេចបានជារៀងរហូត!

ថ្ងៃទី០៧ ខែមករា ឆ្នាំ២០២៣នេះ គឺជាខួបអនុស្សាវរីយ៍លើកទី៤៤ឆ្នាំ នៃទិវាជ័យជំនះលើរបបប្រល័យពូជសាសន៍ខ្មែរក្រហម។ កាលពី៤៤ឆ្នាំមុន កងទ័ពស្ម័គ្រស្លាប់វៀតណាម និងកងទ័ពតស៊ូដ៏ឆ្នើមរបស់កម្ពុជា បានពួតដៃគ្នាវាយផ្តួលរំលំរបបកម្ពុជាប្រជាធិបតេយ្យ ឬរបបខ្មែរក្រហម បានដោយជោគជ័យ នាំយកសន្តិភាពជូនប្រជាជាតិកម្ពុជា។ ដោយសារតែសន្តិភាពនេះហើយ ទើបបច្ចុប្បន្ននេះ កម្ពុជា មានការអភិវឌ្ឍ រីកចម្រើនខ្លាំង និងមានការទទួលស្គាល់ពីសហគមន៍អន្តរជាតិ។

ថ្ងៃ៧ មករា ១៩៧៩ ត្រូវបានមហាជនកម្ពុជាចាត់ទុកថា គឺជាថ្ងៃកំណើតទី២ដែលប្រជាពលរដ្ឋខ្មែរបានរួចរស់ជីវិតពីចង្កូមមច្ចរាជខ្មែរក្រហម ក្រោមការដឹកនាំដោយ ប៉ុល ពត អៀង សារី ខៀវ សំផន និងនួន ជា។ គណបក្សប្រជាជនកម្ពុជា និងកងទ័ពវៀតណាម គឺជាតួអង្គសំខាន់ដែលនាំជ័យជន្នះ និងកំណើតទី២នេះមកជូនប្រជាជាតិកម្ពុជា។ បើគ្មានថ្ងៃជ័យជន្នះ ៧ មករា ទេ ក៏កម្ពុជា មិនអាចមានថ្ងៃនេះឡើយ។

គណបក្សប្រជាជនកម្ពុជា ធ្លាប់បានអះអាងឲ្យដឹងថា ថ្ងៃជ័យជំនះ ៧ មករា នាំឲ្យកម្ពុជាសម្រេចបានស្នាដៃធំៗជាប្រវត្តិសាស្ត្រចំនួ៤គឺ ទី១. បានរំដោះប្រជាជនកម្ពុជាពីរបប ប៉ុល ពត ដ៏សែនមហាឃោឃៅ យង់ឃ្នង និងទប់ស្កាត់របបអន្យតិរ្ថិយនេះ មិនឲ្យវិលត្រឡប់មកកម្ពុជាជាលើកទី២។ ទី២. គឺបាននាំមកជូនប្រជាជនវិញនូវសិទ្ធិសេរីភាពទាំងអស់ ដែលសិទ្ធិសេរីភាពទាំងនោះត្រូវបាន ប៉ុល ពត កម្ចាត់បង់ក្នុងរបប ៣ ឆ្នាំ ៨ ខែ ២០ ថ្ងៃ។ ទី៣ គឺបានស្តារ និងកសាងខឿនសេដ្ឋកិច្ចជាតិ ឲ្យមានស្ថេរភាពជាបណ្តើរៗតាំងពីពេលនោះមក និងទី៤. គឺបានធ្វើជាកម្លាំងស្នូលនៃការបង្រួបបង្រួមជាតិ និងជាកម្លាំងមិនអាចខ្វះបាន ក្នុងការអនុវត្តកិច្ចព្រមព្រៀងទីកុ្រងប៉ារីស ថ្ងៃទី២៣ ខែតុលា ឆ្នាំ ១៩៩១។

ជាសច្ចៈភាពប្រវត្តិសាស្រ្តដែលមិនអាចប្រកែកបាន គឺថាការទទួលបានជ័យជម្នះលើរបបខ្មែរក្រហម គឺមានការរួមចំណែកយ៉ាងសំខាន់ពីសំណាក់កងទ័ពវៀតណាម។ រណសិរ្សសាមគ្គីសង្រ្គោះជាតិកម្ពុជា និងកងទ័ពវៀតណាម បានបើកការវាយលុកកម្ទេចកងទ័ពខ្មែរក្រហមនៅថ្ងៃទី២៥ ខែធ្នូ ឆ្នាំ១៩៧៨។ កាលណោះ រណសិរ្សសាមគ្គីសង្រ្គោះជាតិកម្ពុជា មានកងទ័ពតែប្រមាណ ២ម៉ឺននាក់ប៉ុណ្ណោះ ខណៈវៀតណាមវិញ មានកងទ័ពដល់ទៅប្រមាណ១០ ម៉ឺននាក់ ដោយរួមមាន ទាំងកងរថក្រោះ និងយន្តហោះចម្បាំង។

ក្នុងអំឡុងពេលប្រតិបត្តិការយោធានៅកម្ពុជា កងទ័ពវៀតណាម បានជួយផ្តល់ម្ហូបអាហារដល់ប្រជាពលរដ្ឋខ្មែរដែលកំពុងតែស្រកឃ្លាន ផ្តល់ថ្នាំសង្កូវ ជួយព្យាបាលជំងឺ និងផ្តល់ជំនួយផ្សេងៗទៀតដល់ពួកគេ។ ក្រោយវាយផ្តួលរំលំរបបខ្មែរក្រហមបានជោគជ័យនៅថ្ងៃទី០៧ ខែមករា ឆ្នាំ១៩៧៩ កងទ័ពវៀតណាម ក៏បានជួយរៀបចំកងកម្លាំងកម្ពុជា ដើម្បីទប់ទល់នឹងកងកម្លាំងខ្មែរក្រហមដែលសេសសល់ និងបានផ្តល់ជំនាញការវៀតណាមជាច្រើននាក់ ដើម្បីជួយរៀបចំរដ្ឋាភិបាលថ្មី ដឹកនាំ និងគ្រប់គ្រងប្រទេសកម្ពុជា មុនដកកងទ័ពចាកចេញពីប្រទេសកម្ពុជានៅក្នុងឆ្នាំ១៩៨៩។ ចំណែក ផ្នែកការទូតវិញ អ្នកតំណាងវៀតណាមប្រចាំនៅអង្គការសហប្រជាជាតិនាពេលនោះ ក៏បានផ្តល់ការគាំទ្រផ្នែកតស៊ូមតិដល់សាធារណរដ្ឋប្រជាមានិតុកម្ពុជាដែលទើបបង្កើតឡើង និងបានជួយតវ៉ាប្រឆាំងនឹងការរក្សាអសនៈរបស់ខ្មែរក្រហមនៅអង្គការសហប្រជាជាតិថែមទៀត។

មកដល់ពេលនេះ កម្ពុជា មានសន្តិភាពពេញលេញ ឯវៀតណាម ក៏ដូចគ្នា។ ក្នុងពេលកំពុងមានសន្តិភាពពេញលេញនេះ រដ្ឋាភិបាលកម្ពុជា និងវៀតណាម បាន និងកំពុងរក្សាបាននូវទំនាក់ទំនងយ៉ាងល្អជាមួយគ្នាស្ទើរគ្រប់វិស័យទាំងអស់។ គិតត្រឹមឆ្នាំ២០២៣នេះ កម្ពុជា និងវៀតណាម មានទំនាក់ទំនងទ្វេភាគីរយៈពេល៥៦ឆ្នាំមកហើយ។ កម្ពុជា និងវៀតណាម បានចាត់ទុកគ្នាទៅវិញទៅមកថា ជាអ្នកជិតខាង​ល្អ​ មិត្តភាព​ប្រពៃ​ណី​ កិច្ចសហប្រតិបត្តិការ​លើ​គ្រប់​ជ្រុងជ្រោយ​ និង​និរន្តរភាព​យូរអង្វែង​។ ភាគី​ទាំងពីរ​ បាន​រក្សា ​និង​លើក​កម្ពស់​ប្រសិទ្ធ​ភាព​នៃ​យន្តការ​សហប្រតិបត្តិកា​ររវាង​ប្រទេស​ទាំងពីរ​តាមរយៈបក្ស និង​រដ្ឋាភិបាល ពង្រឹង​ការផ្លាស់ប្តូរ​ទស្សនកិច្ច​កិច្ចប្រជុំ ​និង​ទំនាក់ទំនង​រវាង​ថ្នាក់ដឹកនាំ​ជាន់ខ្ពស់ និង​គ្រប់​លំដាប់ថ្នាក់​។

ក្រៅពីនេះ កម្ពុជា-វៀតណាម ក៏​បាន​សហកា​រយ៉ា​ង​ជិតស្និទ្ធ​ ដើម្បី​រក្សា​ស្ថិរភាព​នយោបាយ និង​ធានា​ការពារជាតិ​ និង​សន្តិសុខ​នៅក្នុង​ប្រទេស​នីមួយៗ ​សហការ​បានល្អ​ក្នុងការ​អនុវត្ត​ពិធីសារ និង​ផែនការ​សហប្រតិបត្តិកា​​រលើ​វិស័យ​ការពារជាតិ និង​សន្តិសុខ​។ ភាគីទាំងពីរ ក៏បានធ្វើកិច្ចសហប្រតិបត្តិការ​ក្នុង​ការកសាង​ខ្សែបន្ទាត់​ព្រំដែន​ផងដែរ។ ជាក់ស្តែង ​ភាគី​ទាំងពីរ​បានបញ្ចប់​ការចុះហត្ថលេខា​ និង​ផ្តល់​សច្ចាប័ន​លើ​ឯកសារ​ច្បាប់​សំខាន់ៗ​ចំនួន​ ០២ ​កត់ត្រា​ការងារ​បោះបង្គោល​ព្រំដែន​គោក និង​បោះបង្គោល​ព្រំដែន​បាន​ចំនួន ​៨៤%​ និង​បាន​កំណត់​ការចរចា​បញ្ចប់ ​១៦% ​ដែល​នៅ​សេសសល់ ​ដើម្បី​ប្រែក្លាយ​ព្រំដែន​នៃ​ប្រទេស​ទាំងពីរ​ទៅជា​ព្រំដែន​សន្តិភាព​មិត្តភាព​កិច្ចសហប្រតិបត្តិការ​ និង​ការអភិវឌ្ឍ​ប្រកបដោយ​ចីរភាព​។

នាពេលអនាគត រដ្ឋាភិបាលកម្ពុជា និងវៀតណាម បានអះអាងហើយថា នឹងបន្តរក្សាទំនាក់ទំនងជាប្រពៃណី មិត្តភាព និងជាអ្នកជិតខាងល្អ។ ចំណែក បញ្ហាព្រំដែនដែលនៅសេសសល់ ភាគី ទាំង២ បានប្តេជ្ញាបន្តធ្វើការងារបញ្ចប់នាពេលខាងមុខ ប្រកបដោយមិត្តភាព និងដោយសន្តិវិធី។ រីឯ បញ្ហាពាណិជ្ជកម្មវិញ ភាគីទាំង២ ក៏ជំរុញឲ្យមានការកើនឡើងជាលំដាប់ ដោយនៅឆ្នាំ២០២២ រំពឹងថា កើនដល់១០ពាន់លានដុល្លារ ខណៈរយៈពេល៩ខែ ឆ្នាំ២០២២ ទំហំពាណិជ្ជកម្មរវាងកម្ពុជា-វៀតណាម សម្រេចបាន ៨,៤៦ពាន់លានដុល្លារ។ ដោយឡែក ផ្នែកនយោបាយ និងការទូតវិញ កម្ពុជា ក៏ដូច វៀតណាម នឹងបន្តសហប្រតិបត្តិការល្អ ព្រោះកម្ពុជាក្តី វៀតណាមក្តី គឺត្រូវការគាំទ្រគ្នាទៅវិញទៅមកនៅលើឆាកអន្តរជាតិ ដើម្បីផលប្រយោជន៍ប្រទេសរៀងៗខ្លួន៕

ដោយ៖ វណ្ណ សុគន្ធា