បណ្ឌិត ឈត ប៊ុនថង៖ គួរប្រើបញ្ញាសិប្បនិម្មិត (AI)សម្រាប់គោលបំណងវិជ្ជមាន ជាជាងគោលបំណងអវិជ្ជមាន

ក្នុងរយៈពេលថ្មីៗនេះ ការប្រើប្រាស់បញ្ញាសិប្បនិម្មិត (AI/Artificial Intelligence)​កំពុង​ពេញ​និយម ​និងទទួលបានការចាប់អារម្មណ៍យ៉ាងខ្លាំងពីមហាជន។ ការប្រើប្រាស់ AI ​​នេះ​ យើង​សង្កេតឃើញមាន​ទាំងទិដ្ឋភាពវិជ្ជមាន ទាំងទិដ្ឋភាព​អវិជ្ជមាន។ តើបញ្ញាសិប្បនិម្មិត (AI)​ជាអ្វី? ហើយត្រូវប្រើប្រាស់ដូចម្ដេច ដើម្បីទទួលបានផលប្រយោជន៍វិជ្ជមាន​ និងអាចគេចផុតពីហានិភ័យផ្សេងៗទាំងបុគ្គល ទាំងសង្គម និងពិភពលោកទាំងមូល?

បញ្ញាសិប្បនិម្មិត (AIឬArtificial Intelligence) សំដៅលើការក្លែងធ្វើនូវភាពវៃឆ្លាត ឬបញ្ញារបស់មនុស្សនៅក្នុងម៉ាស៊ីន ដែលត្រូវបានបង្កើតជាកម្មវិធីឱ្យចេះគិត ដឹង ឬរៀន និងដោះស្រាយបញ្ហាតាមរបៀបស្រដៀងគ្នាទៅនឹងមនុស្សដែរ។ ប្រព័ន្ធ AI អាចដំណើរការទិន្នន័យមួយចំនួនធំ សម្គាល់គំរូនានា ធ្វើការសម្រេចចិត្ត និងអាចសម្របខ្លួនទៅនឹងស្ថានភាពថ្មីបន្ទាប់ពីទទួលបានការបណ្តុះបណ្តាល ដោយមិនមានព័ត៌មានច្បាស់លាស់ពីមនុស្ស។

មកដល់ពេលនេះ យើងបានសង្កេតឃើញមានប្រភេទ AI ដូចជា៖

១.AI តូចចង្អៀត ឬ AI ខ្សោយ (Narrow AI or Weak AI) ៖ មានឯកទេសក្នុងកិច្ចការតែមួយ ដូចជា ការសម្គាល់ផ្ទៃមុខ ការបកប្រែភាសា ឬការលេងអុក ជាដើម។

២. AI ទូលំទួលាយ ឬ AI ខ្លាំង (General AI or Strong AI) ៖ គឺជាទម្រង់ AI កម្រិតខ្ពស់ដែលអាចយល់ដឹង រៀន ឬដឹង និងអនុវត្តភាពវៃឆ្លាតក្នុងកិច្ចការជាច្រើនដូចជាមនុស្សដែរ។

AI ត្រូវបានគេប្រើប្រាស់នៅក្នុងឧស្សាហកម្មជាច្រើន ដោយរាប់ចាប់ពីការថែទាំសុខភាព (សម្រាប់ការធ្វើរោគវិនិច្ឆ័យ) រហូតដល់ការកម្សាន្តនានា (ដូចជាប្រព័ន្ធផ្ដល់យោបល់) រថយន្តស្វ័យប្រវត្ត ហិរញ្ញវត្ថុ និងកិច្ចការជាច្រើនទៀត។ គោលដៅចុងក្រោយរបស់ AI គឺដើម្បីបង្កើតប្រព័ន្ធនានាដែលអាចបំពេញភារកិច្ចដែលជាធម្មតាត្រូវការភាពវៃឆ្លាតរបស់មនុស្ស ការកែលម្អប្រសិទ្ធភាព នវានុវត្តន៍ និងផលិតភាពនានា។ ដើម្បីទាញប្រយោជន៍ពី AI យើងគួរប្រើ AIសម្រាប់គោលបំណងវិជ្ជមាន ជាជាង​ប្រើ​សម្រាប់គោលបំណងអវិជ្ជមាន។ AI អាច​ត្រូវ​បានគេ​ប្រើ​ក្នុង​គោល​បំណង​វិជ្ជមាន​ជា​ច្រើននៅ​ក្នុង​វិស័យ​ផ្សេងៗ។ ខាងក្រោមនេះ គឺជាផ្នែកសំខាន់ៗមួយចំនួនដែល AI កំពុងធ្វើឱ្យមានភាពខុសប្លែកៗគ្នាតាមរបៀបដ៏ល្អ៖

១. ការថែទាំសុខភាព

•ការធ្វើរោគវិនិច្ឆ័យ និងការព្យាបាល៖ AI អាចជួយក្នុងការរកឃើញជំហានដំបូងៗនៃជំងឺ (ដូចជា ជំងឺមហារីក ស្ថានភាពឬមុខងារបេះដូង ឬជំងឺសរសៃប្រសាទ) ដោយការវិភាគរូបភាពវេជ្ជសាស្ត្រ ទិន្នន័យហ្សែន និងកំណត់ត្រាអ្នកជំងឺ។ ឧបករណ៍ដែលដំណើរការដោយ AI ដូចជាក្បួន ឬម៉ាស៊ីនដែលរៀនដោះស្រាយបញ្ហា អាចធ្វើឱ្យ​ប្រសើរឡើងនូវភាពត្រឹមត្រូវនៃការធ្វើរោគវិនិច្ឆ័យ និងណែនាំជម្រើសនៃការព្យាបាលផ្ទាល់ខ្លួន។

•ការរកឃើញថ្នាំ ៖ AI អាចបង្កើនល្បឿនដំណើរការនៃការរកឃើញថ្នាំថ្មីៗដោយផ្ដល់ពីរបៀបដែលសមាសធាតុផ្សេងៗគ្នាមានអន្តរកម្មជាមួយជំងឺ ដែលអាចជួយសន្សំសំចៃពេលវេលាបានជាច្រើនឆ្នាំសម្រាប់ការស្រាវជ្រាវ និងការអភិវឌ្ឍ។

• សុខភាពផ្លូវចិត្ត ៖ AI អាចជួយក្នុងការគាំទ្រសុខភាពផ្លូវចិត្តតាមរយៈវេទិកាព្យាបាលបែបនិម្មិត កម្មវិធីតាមដានអារម្មណ៍ និងសូម្បីតែ chatbots (កម្មវិធីកុំព្យូទ័រដែលបង្កើតការសន្ទនាជាមួយមនុស្ស ជាអត្ថបទ ឬសំឡេង) ដែលផ្តល់ការគាំទ្រផ្នែកអារម្មណ៍ដល់បុគ្គលដែលត្រូវការជំនួយ។

២. បរិស្ថាន និងនិរន្តរភាព

•ព្យាករណ៍បម្រែបម្រួលអាកាសធាតុ ៖ AI អាចផ្ដល់គំរូ និងទស្សន៍ទាយការផ្លាស់ប្តូរបរិស្ថាន ដែលជួយអ្នកវិទ្យាសាស្ត្រ និងរដ្ឋាភិបាលឱ្យយល់អំពីគំរូអាកាសធាតុ ព្យាករពីអំគ្រោះមហន្តរាយធម្មជាតិ និងបង្កើតដំណោះស្រាយដើម្បីប្រយុទ្ធប្រឆាំងនឹងការឡើងកំដៅនៃ​ផែនដី។

•ប្រសិទ្ធភាពថាមពល ៖ AI អាចបង្កើនប្រសិទ្ធភាពនៃ​ការប្រើប្រាស់ថាមពលនៅក្នុងឧស្សាហកម្ម អគារនានា និងការដឹកជញ្ជូន ដោយកាត់បន្ថយកាកសំណល់ និងកាត់បន្ថយការបំភាយឧស្ម័នការបូនិក។ បណ្ដាញអគ្គិសនីឆ្លាតវៃ និងប្រព័ន្ធដំណើរការដោយ AI អាចធ្វើឱ្យប្រសើរឡើងនូវការចែកចាយថាមពល និងសន្សំសំចៃធនធាន។

• ការអភិរក្ស ៖ បច្ចេកវិទ្យាដែលដំណើរការដោយ AI អាចជួយក្នុងការការពារសត្វព្រៃដោយការវិភាគទិន្នន័យអន្ទាក់ម៉ាស៊ីនថតរូប(camera trap data) តាមដានប្រភេទសត្វជិតផុតពូជ និងការបង្ការការបរបាញ់ខុសច្បាប់។

៣. ការអប់រំ

•វិធីសាស្ត្របង្រៀនស្របនឹងតម្រូវការ ចំណាប់អារម្មណ៍ និងសមត្ថភាពសិស្ស(Personalized Learning) ៖ AI អាចកែសម្រួលខ្លឹមសារអប់រំឱ្យសមនឹងរចនាបថសិក្សា និងល្បឿនរបស់សិស្សម្នាក់ៗ។ វិធីនេះ ជួយឱ្យអ្នកសិក្សាចាប់យកគំនិតក្នុងល្បឿនផ្ទាល់ខ្លួនរបស់ពួកគេ និងកែលម្អលទ្ធផលអប់រំ ជាពិសេស នៅក្នុងតំបន់ដែលមិនមានធនធាន។

•ប្រព័ន្ធ ឬបច្ចេកទេសអបរំដែលសម្របទៅតាមលក្ខណជាក់ស្ដែងរបស់សិស្ស(Tutoring Systems) ៖ អ្នកបង្រៀននិម្មិតមួយទល់មួយ និង chatbots ដែលជំរុញ ឬដើរដោយ AI អាចជួយសិស្សឱ្យធ្វើកិច្ចការផ្ទះ រៀនគោលគំនិត ឬបញ្ញត្តិថ្មីៗ ឬអនុវត្តជំនាញ ដោយផ្តល់ការគាំទ្របន្ថែមនៅខាងក្រៅថ្នាក់។

•ការភ្ជាប់គម្លាតនៃ​លទ្ធភាពប្រើប្រាស់ ៖ ឧបករណ៍ AI នានា ដូចជា ការសម្គាល់សុន្ទរកថា​ ឬសម្ដី ការធ្វើឱ្យអត្ថបទក្លាយទៅជាការនិយាយ ឬសុន្ទរកថា និងការបកប្រែ អាចជួយឱ្យបុគ្គលដែលមានពិការភាពទទួលបានសម្ភារៈ ឬមធ្យោបាយអប់រំ និងធ្វើឱ្យបរិយាកាសសិក្សាកាន់តែ​មានបរិយាបន្ន។

៤.កិច្ចខិតខំប្រឹងប្រែងខាងមនុស្សធម៌

•ការឆ្លើយតបនឹងគ្រោះមហន្តរាយ ៖ AI អាចជួយព្យាករគ្រោះមហន្តរាយធម្មជាតិ បង្កើនប្រសិទ្ធភាពនៃការដឹកជញ្ជូនជំនួយសង្គ្រោះគ្រោះមហន្តរាយ និងជួយក្នុងការខិតខំប្រឹងប្រែងស្តារឡើងវិញក្នុងពេលជាក់ស្តែង។ យន្តហោះគ្មានមនុស្សបើក (Drones)​ដែលដំណើរការដោយ AI អាចផ្តល់នូវទិដ្ឋភាពពីលើអាកាសនៃតំបន់រងគ្រោះដោយគ្រោះមហន្តរាយ ធ្វើឱ្យប្រសើរឡើងនូវប្រតិបត្តិការជួយសង្គ្រោះ។

•ការប្រយុទ្ធប្រឆាំងនឹងភាពក្រីក្រ ៖ ឧបករណ៍ AI នានា អាចវិភាគទិន្នន័យសេដ្ឋកិច្ច ដើម្បីកំណត់តំបន់ដែលមានភាពក្រីក្រធ្ងន់ធ្ងរបំផុត ហើយស្នើឱ្យមានអន្តរាគមន៍ ដើម្បីកែលម្អលទ្ធផលសេដ្ឋកិច្ច ដូចជា ការបង្កើតការងារ ឬកម្មវិធីជំនួយសង្គមជាដើម។

៥. កុសលភាពសង្គម និងសុវត្ថិភាពសាធារណៈ

•ការកែលម្អលទ្ធភាពប្រើប្រាស់ ៖ AI អាចធ្វើឱ្យពិភពលោកកាន់តែមានភាពងាយស្រួលសម្រាប់ប្រជាជនដែលមានពិការភាព តាមរយៈការធ្វើឱ្យប្រសើរឡើងនូវឧបករណ៍ទំនាក់ទំនង ការផ្តល់ជំនួយក្នុងការស្វែងរកទិសដៅ និងការបកប្រែខ្លឹមសារក្នុងពេលវេលាជាក់ស្តែងសម្រាប់អ្នកដែលថ្លង់ ឬពិបាកស្តាប់។

• ការបង្ការឧក្រិដ្ឋកម្ម និងសុវត្ថិភាពសាធារណៈ ៖ AI អាចត្រូវបានគេ​ប្រើ ដើម្បីព្យាករចំណុចក្តៅនៃឧក្រិដ្ឋកម្ម និងបែងចែកធនធានអនុវត្តច្បាប់ឱ្យកាន់តែមានប្រសិទ្ធភាព។ វាក៏អាចជួយក្នុងការកំណត់អត្តសញ្ញាណនៃ​គំរូនានាដែលនាំទៅដល់ការបង្ការឧក្រិដ្ឋកម្ម ការធានាសុវត្ថិភាព ខណៈពេលដែលជំរុញឱ្យមានគោរពឯកជនភាព និង​សិទ្ធិមនុស្ស។

•ការលើកកម្ពស់សិទ្ធិទទួលបានជំនួយផ្នែកច្បាប់ ៖ AI អាចជួយក្នុងការផ្តល់ជំនួយផ្នែកច្បាប់ដល់ប្រជាជនក្រីក្រដែលគ្មានអំណាច បង្កើតឯកសារផ្លូវច្បាប់ដោយស្វ័យប្រវត្តិ ឬផ្តល់ដំបូន្មានផ្នែកច្បាប់ ធ្វើឱ្យប្រព័ន្ធយុត្តិធម៌កាន់តែងាយស្រួលទទួលបានដោយ​អ្នក​ប្រើប្រាស់។

៦. អាជីវកម្ម និងកំណើនសេដ្ឋកិច្ច

•ការបង្កើនផលិតភាព ៖ ស្វ័យប្រវត្តិកម្មដែលជំរុញដោយ AI អាចដោះស្រាយកិច្ចការដែលគេធ្វើដដែលៗ កាត់បន្ថយបន្ទុកការងាររបស់បុគ្គលិកជាមនុស្ស ជាពិសេស ចំពោះតួនាទីច្នៃប្រឌិត និងយុទ្ធសាស្ត្រដែលកាន់តែមានភាពស៊ីជម្រៅ។

ក្រៅពីគោលបំណងវិជ្ជមានដែល AI បានផ្ដល់ឱ្យដូចបានរៀបរាប់ខាងនេះ យើងគួរជៀសវាងការប្រើប្រាស់ AI ក្នុងគោលបំណងអវិជ្ជមាន។ ការជៀសវាងការប្រើប្រាស់ AI សម្រាប់គោលបំណងអវិជ្ជមាន គឺមានសារៈសំខាន់ណាស់ក្នុងការធានាថាបច្ចេកវិទ្យាដ៏មានអានុភាពនេះ ត្រូវបានប្រើប្រាស់ប្រកបដោយសីលធម៌ និងការទទួលខុសត្រូវ។ ខាងក្រោមនេះ គឺជាគោលការណ៍ និងការអនុវត្តមួយចំនួនដែលអាចជួយណែនាំឱ្យការប្រើប្រាស់ AI ប្រកបដោយការទទួលខុសត្រូវ និងវិជ្ជមាន៖

១. ចូរអនុវត្តតាមគោលការណ៍ណែនាំខាងសីលធម៌

•ចូរគោរពឯកជនភាព ៖ ចូរអ្នកជៀសវាងការប្រើ AI ដើម្បីរំលោភលើឯកជនភាព​របស់មនុស្សម្នាក់ៗ ដូចជា ការប្រមូលទិន្នន័យដោយគ្មានការយល់ព្រម ឬការ​ប្រើ AI សម្រាប់ការឃ្លាំមើលនរណាម្នាក់ដោយគ្មានភាពហេតុផលឬយុត្តិកម្ម។

•តម្លាភាព ៖ ត្រូវប្រាកដថា ការប្រើប្រាស់ប្រព័ន្ធ AI មានតម្លាភាពនិងអាចយល់បានចំពោះអ្នកប្រើប្រាស់ ជាពិសេស នៅក្នុងស្ថានភាពដែលមានហានិភ័យខ្ពស់ (ឧ.ការអនុវត្តច្បាប់ ការថែទាំសុខភាព)។

•ទំនួលខុសត្រូវ ៖ ចូរអ្នកតម្រង់ទិសឱ្យអ្នកអភិវឌ្ឍ ស្ថាប័ន និងអ្នកប្រើប្រាស់ ទទួលខុសត្រូវចំពោះវិបាកនៃប្រព័ន្ធ AI ដោយធានាថា មានបណ្ដាញច្បាស់លាស់នៃការទទួលខុសត្រូវនៅពេលមានអ្វីមួយខុសឆ្គងខាងផ្លូវច្បាប់ឬសីលធម៌។

២.ជៀសវាងការបោកបញ្ឆោត ឬការបំភាន់

•បង្ការព័ត៌មានមិនពិត ៖ ចូរអ្នក​ជៀសវាងការប្រើ AI ដើម្បីបង្កើតឬផ្សព្វផ្សាយព័ត៌មានមិនពិត ព័ត៌មានក្លែងបន្លំ ឬខ្លឹមសារបំភាន់។

•ជៀសវាងការលំអៀង ៖ ត្រូវប្រាកដថាប្រព័ន្ធ AI ត្រូវបានរចនាឡើងដើម្បីជៀសវាងការពង្រឹងភាពលំអៀងដែលបង្កគ្រោះថ្នាក់ ឬគំរូដែលអាចជះឥទ្ធិពលជាអវិជ្ជមានដល់ក្រុមដែលងាយរងគ្រោះ។

•ធានាការយល់ព្រម ៖ ជានិច្ចកាលចូរស្វែងរកការយល់ព្រម នៅពេលដែលអ្នក​ប្រើប្រាស់ប្រព័ន្ធ AI ជាពិសេស នៅពេលដែលប្រាស់ប្រព័ន្ធនេះមានទំនាក់ទំនងជាមួយបុគ្គលម្នាក់ៗ ឬជះឥទ្ធិពលលើពួកគេ។

៣. ចូរអ្នកកំណត់ព្រំដែននៃករណីប្រើប្រាស់ដែលបង្កហានិភ័យ

• អាវុធនីយកម្មនៃ​ AI ៖ ត្រូវយកចិត្តទុកដាក់ពីហានិភ័យដែលទាក់ទងនឹងការអភិវឌ្ឍ ឬប្រើប្រាស់ AI នៅក្នុងប្រព័ន្ធសព្វាវុធឬយោធា។ កិច្ចខិតខំប្រឹងប្រែងគួរតែត្រូវបានធ្វើឡើងដើម្បីជៀសវាងអាវុធAIស្វយ័ប្រវត្ត ដែលអាចធ្វើសកម្មភាពដោយគ្មានការត្រួតពិនិត្យពីមនុស្ស ឬអាចបណ្តាលឱ្យមានគ្រោះថ្នាក់ដោយអចេតនា។

•ជៀសវាងការឃ្លាំមើលដែលគ្មានសីលធម៌ ៖ ចូរអ្នក​ចៀសវាងការប្រើប្រាស់ AI ដើម្បីរំលោភលើឯកជនភាពរបស់មនុស្ស ឬតាមដានពួកគេដោយគ្មានការយល់ព្រមពីសាមីខ្លួន ដូចជា តាមរយៈការសម្គាល់មុខនៅកន្លែងសាធារណៈដោយគ្មានហេតុផលស្របច្បាប់។

៤.ចូរអ្នករចនាសម្រាប់បរិយាបន្នភាព(ភាពរួមបញ្ចូល)

•ចូរអ្នក​លើកកម្ពស់សមធម៌ ៖ AI គួរតែត្រូវបានប្រើប្រាស់ដើម្បីបង្កើនសមភាពនិងកុសលភាពសង្គម មិនមែនដើម្បីបន្តធ្វើឱ្យកើតមានវិសមភាព ឬអបរិយាបន្ននោះទេ។ វាមានសារៈសំខាន់ណាស់ក្នុងការធានាថា ឧបករណ៍ AI ផ្តល់អត្ថប្រយោជន៍ដល់មនុស្សគ្រប់គ្នា ហើយការរចនារបស់ AI ជៀសវាងការបង្កគ្រោះថ្នាក់ដល់ក្រុមជនងាយរងគ្រោះនានា។

•ចូរអ្នកពិចារណាពីផលប៉ះពាល់សង្គម ៖ ចូរអ្នក​គិតអំពីផលប៉ះពាល់សង្គមទាំងមូលដែលបង្កឡើងដោយAI។ ប្រសិនបើកម្មវិធីជាក់លាក់ណាមួយអាចនាំឱ្យមានគ្រោះថ្នាក់ដល់សង្គម (ឧ. ការបាត់បង់ការងារ, វិសមភាព) វាគួរតែត្រូវបានពិចារណានិងត្រួតពិនិត្យ និងតាមដានយ៉ាងប្រុងប្រយ័ត្ន។

៥.ចូរប្រកាន់ខ្ជាប់នូវស្តង់ដាច្បាប់ និងបទប្បញ្ញត្តិ

•ចូរអ្នក​អនុវត្តតាមក្របខណ្ឌច្បាប់និងគោលការណ៍ណែនាំដែលធានាថា AI ត្រូវបានប្រើសម្រាប់គោលបំណងដែលមានប្រយោជន៍។ ប្រទេសជាច្រើនបានកំណត់បទប្បញ្ញត្តិ និងក្របខណ្ឌសម្រាប់ការអភិវឌ្ឍនិងការដាក់ពង្រាយ AI ដើម្បីធានាការប្រើប្រាស់ប្រកប​ដោយការទទួលខុសត្រូវ។

•ចូរអ្នកតាមឱ្យទាន់នូវច្បាប់ឬគោលការណ៍ខាងសីលធម៌ថ្មីៗជុំវិញរឿង AI ដែលត្រូវបានបង្កើតឡើងដោយរដ្ឋាភិបាល អង្គការអន្តរជាតិ ឬស្ថាប័នសិក្សាស្រាវជ្រាវនានា។

៦.ចូរអភិវឌ្ឍ AI ដោយមានការត្រួតពិនិត្យរបស់មនុស្ស

•ចូរបង្កើតប្រព័ន្ធមួយដែលមនុស្សអាចផ្ដល់យោបល់បាន(Human-in-the-loop Systems) ៖ ត្រូវប្រាកដថាការសម្រេចចិត្តសំខាន់ៗដែលធ្វើឡើងដោយប្រព័ន្ធ AI ជាពិសេសបញ្ហាដែលប៉ះពាល់ដល់ជីវិតរបស់មនុស្ស គឺមនុស្សអាចត្រួតពិនិត្យបាន។

•ក្រុមប្រឹក្សាត្រួតពិនិត្យខាងសីលធម៌ ៖ ស្ថាប័នជាច្រើនកំពុងបង្កើតគណៈកម្មាធិការឬក្រុមប្រឹក្សាខាងក្រមសីលធម៌ ដើម្បីវាយតម្លៃហានិភ័យនិងអត្ថប្រយោជន៍ដែលអាចកើតឡើងពីបច្ចេកវិទ្យា AI មុនពេលពួកវាត្រូវបានដាក់ឱ្យប្រើប្រាស់។

៧.ចូរលើកកម្ពស់ការយល់ដឹង និងការអប់រំ

•ចូរអប់រំបុគ្គលម្នាក់ៗ​អំពីហានិភ័យដែលអាចកើតមានពី AI និងរបៀបប្រើប្រាស់វាប្រកបដោយការទទួលខុសត្រូវ។

•ត្រូវតែ​ធានាថា ទាំងអ្នកអភិវឌ្ឍ ទាំងអ្នកប្រើប្រាស់ AI យល់ពីដែនកំណត់របស់វា និងវិបាកអវិជ្ជមានដែលអាចកើតមានឡើង។

៨. ចូរគាំទ្រចំពោះកិច្ចសហប្រតិបត្តិការសកល

•ចូរលើកទឹកចិត្តឱ្យមានកិច្ចសហការអន្តរជាតិលើស្តង់ដាសុវត្ថិភាព AI ។ ដោយសារ AI មានឥទ្ធិពលលើសង្គមសាកល វាជារឿងសំខាន់ដែលប្រទេសនានាត្រូវធ្វើការរួមគ្នាដើម្បីធានាថាការប្រើប្រាស់របស់វាត្រូវបានគ្រប់គ្រងដោយគោលការណ៍សីលធម៌រួម។

តាមរយៈការប្រកាន់ខ្ជាប់នូវគោលការណ៍ណែនាំទាំងនេះ អ្នកអភិវឌ្ឍ ក្រុមហ៊ុន និងបុគ្គលនានាអាចជួយធានាថា AI ត្រូវបានប្រើប្រាស់សម្រាប់គោលបំណងវិជ្ជមាន ការស្ថាបនា ជាជាងសម្រាប់​ការបង្កគ្រោះថ្នាក់ឬគោលបំណងអវិជ្ជមាន៕

ដោយ៖ បណ្ឌិត ឈត ប៊ុនថង អនុប្រធានវិទ្យាស្ថានទំនាក់ទំនងអន្តរជាតិនៃកម្ពុជា