មិននឹកស្មាន! គ្រួសារតារាកំប្លែង យ៉េយ៉េ ១៨នាក់ផ្សេងទៀតក៏ឆ្លងកូវីដ-១៩

ភ្នំពេញ៖ ជារឿងស្ទើរនឹកស្មានមិនដល់ ខណៈសមាជិកគ្រួសាររបស់តារាកំប្លែងភេទទី ៣ យ៉េយ៉េ ចំនួន១៨នាក់ផ្សេងទៀតក៏បានឆ្លងជំងឺកូវីដ-១៩។

បើតាមការបញ្ជាក់ឱ្យដឹងពីតារាកំប្លែង យ៉េយ៉េ បានលើក ឡើងថា បងប្អូនរបស់នាងចំនួន៣គ្រួសារដែលមានសមាជិកសរុប១៨នាក់សុទ្ធតែឆ្លងកូវីដ-១៩ ហើយបច្ចុប្បន្នកំពុងសម្រាកព្យាបាលនៅកន្លែងផ្សេងៗគ្នា ។ ចំណែកឯខ្លួននាងក៏កំពុងព្យាបាលកូវីដផងនោះ។

តារាភេទទី៣ យ៉េយ៉េ បានថ្លែងទាំងហួសចិត្តថា៖ “វាជារឿងមួយនឹកស្មានមិនដល់សម្រាប់ក្រុមគ្រួសារខ្ញុំ មនុស្សខ្ញុំចូលចិត្តធ្វើបុណ្យ ជួយគេទាំងខ្លួនជាមនុស្សក្រ ចុះហេតុអី្វបុណ្យដែលខ្ញុំធ្វើមិនជួយដល់ខ្ញុំមកវិញខ្លះ?”។

យ៉េយ៉េ បានបន្ថែមទៀតថា បងនាងចំនួន២គ្រួសារ ៦នាក់ត្រូវសម្រាកព្យាបាលនៅកោះពេជ្រ មួយគ្រួសារទៀត ៤នាក់សម្រាក់ព្យាបាលនៅសាលាជម្ពូវ័ន មួយគ្រួសារទៀត ៤នាក់នៅបូរីពិភពថ្មីសែនសុខ និងឣ្នកផ្ទះនាង៤នាក់ទៀត។ ស៊ូៗទាំងឣស់គ្នាឆាប់បានត្រលប់មកផ្ទះយើងរៀងៗខ្លួនវិញណា។

យ៉េយ៉េបានបញ្ជាក់ថា នាងមិនដែលបានទៅជួបសមាជិកគ្រួសារទាំងនោះទេ គឺពួកគាត់ឆ្លងជំងឺមកពីឣ្នកក្នុងភូមិ៕

អត្ថបទ៖ ចាន់រ៉ា