មើលវីដេអូនេះកាន់តែខ្លោចចិត្ត! ឡានពេទ្យឥណ្ឌា ដល់ថ្នាក់ដឹកសពធ្លាក់តាមផ្លូវ រីឯអ្នកស្លាប់ត្រូវអូសយកទៅដុត ព្រោះអស់ហ្វ្រង់ការដាក់

វីដេអូមួយដែលត្រូវបានចែកចាយតាមប្រព័ន្ធអ៊ីនធឺណេត បានបង្ហាញ សាកសពជនរងគ្រោះដោយសារជំងឺកូវីដ-១៩ បានធ្លាក់ពីឡានពេទ្យដ៏ចាស់មួយគ្រឿង ដែលត្រូវបានរៀបចំឡើងដើម្បីជួយដោះស្រាយវិបត្តិ ខណៈពេលសាកសពត្រូវបានគេដឹកទៅបូជានៅខណ្ឌ Vidisha នៃទីក្រុង Madhya Pradesh។

យោងតាមកាសែត The Times of India បានចុះផ្សាយថា ក្រុមគ្រួសារបានឃើញវីដេអូនេះ ហើយពួកគេ មានការភ្ញាក់ផ្អើលយ៉ាងខ្លាំង នៅពេលបានឃើញសាកសពរបស់សាច់ញាតិ បានធ្លាក់ចេញពីទ្វារចំហៀងនៃឡានពេទ្យ នៅផ្លូវកែង ក្រោយពេលឡានចាកចេញពីមហាវិទ្យាល័យវេជ្ជសាស្ត្រ Atal Bihari Vajphee។

គេនៅមិនទាន់ដឹងទេថាតើ មានសាកសពប៉ុន្មាននាក់ ដែលត្រូវបានដឹកនៅក្នុងឡានពេទ្យដ៏ចាស់នោះ នៅពេលហេតុការណ៍នេះ កើតឡើង។

ចំណែកនៅកន្លែងផ្សេង ទូរទស្សន៍ប៉ុស្តិ៍ NDTV បានផ្សាយវីដេអូ បុគ្គលិកសុខាភិបាល៣នាក់នៅរដ្ឋ Bihar អូសសាកសពលើដីយកទៅដុត ដោយសារតែខ្វះហ្វ្រង់ការដាក់។

បុគ្គលិកថែទាំសុខភាពទាំង៣នាក់ ត្រូវបានគេឃើញ តស៊ូលើកថង់ច្រកសាកសព នៅពេលពួកគេទាញចេញពីខាងក្រោយឡាន ហើយបន្ទាប់មកនាំយកទៅកន្លែងដុត។

រឿងរ៉ាវខ្លោចចិត្តជាច្រើនទៀតបានកើតឡើងនៅក្នុងប្រទេសឥណ្ឌា ដូចជាអ្នកជំងឺធ្ងន់ធ្ងរបំផុតត្រូវបានគេទុកចោលឲ្យស្លាប់ ដោយសារតែមិនមានអុកស៊ីសែនគ្រប់គ្រាន់ ខណៈអ្នកខ្លះទៀតសម្រេចចិត្តធ្វើអត្តឃាតបញ្ចប់ជីវិត ដោយលោតពីដំបូលមន្ទីរពេទ្យ ចំពេលមានកង្វះខាតឧបករណ៍ព្យាបាលជាដើម៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ មិនមើលនឹងភ្នែកឡើយ! សហគមន៍អន្តរជាតិបន្តផ្តល់ជំនួយបន្ថែមទៀតដល់ប្រទេស ឥណ្ឌា ដែលកំពុងដុនដាបដោយកូវីដ