អ្នកជំងឺ​កូវីដ​នៅ​មណ្ឌលកោះពេជ្រ ១២១ នាក់ទៀត បានជាសះស្បើយ

តាមការ​បញ្ជាក់ពី​ក្រុមគ្រូពេទ្យ​ស្ម័គ្រ​ចិត្ត​យុវជន​សម្តេច​តេជោ បាន​ឲ្យ​ដឹង​ថានៅព្រឹកនេះ​មានអ្នកជំងឺកូវីដ ១២១ នាក់ទៀត​ បានជាសះស្បើយ​។

បើ​តាម​ប្រភព​ពី​គ្រូពេទ្យ​ អ្នកជំងឺទាំង ១២១ នាក់នេះ​ បាន​សម្រាកព្យាបាល​នៅ​មណ្ឌលព្យាបាលជំងឺកូវីដ-១៩ កម្រិតស្រាល (កោះពេជ្រ)។ ក្រុមគ្រូពេទ្យបានអនុញ្ញាតិ​ឲ្យ​ត្រឡប់ទៅផ្ទះ និងត្រូវធ្វើចត្តាឡីស័កខ្លួនឯងដាច់ដោយឡែករយៈពេល១៤ថ្ងៃបន្តទៀត ដើម្បីតាមដានសុខភាព។

ក្រសួង​សុខាភិបាល​បានចេញផ្សាយ​របាយការណ៍​​កាលពីម្សិលមិញនេះ មានអ្នកជំងឺ​កូវីដ ៩៩៤ នាក់ បាន​ជាសះស្បើយ​ខណៈនៅ​មណ្ឌលព្យាបាលកោះពេជ្រ​មាន​អ្នក​ជំងឺ​ជាង ៨០០ នាក់​ត្រូវបាន​អនុញ្ញាត​ឲ្យ​ត្រឡប់​ទៅ​ផ្ទះវិញ។

រដ្ឋាភិបាល​បាន​រៀបចំ​មណ្ឌលព្យាបាល​កោះពេជ្រ ជាទីតាំង​សម្រាប់ព្យាបាល​អ្នកមានកូវីដ​​កម្រិត​​ស្រាល ខណៈ​ទីតាំង​នេះ​អាច​ដាក់​គ្រែចំនួន ១៨០០ ដែលអាចព្យាបាលអ្នកជំងឺកូវីដ-១៩ក្នុងកម្រិតស្រាលបាន១៨០០នាក់។ 

កន្លងមករាជរដ្ឋាភិបាលក៏បានរៀបចំទីតាំង​ឯកជនមួយ​ចំនួន​សម្រាប់ព្យាបាលអ្នក​ឆ្លងកូវីដ​ដូចជា សណ្ឋាគារក្រេតឌុក សាលារៀនជាស៊ីមសាមគ្គិ ខណៈ​មន្ទីរពេទ្យ​កកកុញដោយអ្នកជំងឺ៕