គួរឱ្យអាសូរ ក្រុមយុវជនសកម្មការងារ៤នាក់នៅសាលាសង្កាត់ស្ទឹងមានជ័យឆ្លងជំងឺកូវីដ-១៩

ភ្នំពេញ៖ ពិតជាគួរឱ្យអាសូរដល់យុវជន និងយុវនារីចំនួន៤នាក់ដែលបម្រើការងារក្នុងសាលាសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ បានឆ្លងជំងឺកូវីដ-១៩។

តាមសេចក្តីរាយការណ៍ពីលោក អ៊ុម ហឿង ចៅសង្កាត់ស្ទឹងមានជ័យទី៣ បានឱ្យ កម្ពុជាថ្មី ដឹងនៅរសៀលថ្ងៃទី២៩ ខែមេសា នេះថា ក្រុមយុវជន និងនារីចំនួន៤នាក់ ក្នុងនោះមាននារី២នាក់ បានឆ្លងជំងឺកូវីដ-១៩ នាពេលថ្មីៗនេះ។

លោកចៅសង្កាត់បានបន្តថា ក្រុមយុវជនទាំង៤នាក់ដែលឆ្លងជំងឺកូវីដ-១៩ នេះគឺជាក្រុមការងារដ៏សកម្មទាំងការងាររដ្ឋបាល និងការងារសង្គម។ ហើយក្នុងកំឡុងពេលដែលមូលដ្ឋានសង្កាត់ស្ទឹងមានជ័យទី៣ កំពុងកើតជំងឺឆ្លងជំងឺកូវីដ-១៩ ពួកគាត់បានចូលរួមធ្វើការងារមនុស្សធម៌ ដោយនាំយកអំណោយរបស់សម្តេចតេជោ ផ្តល់ដល់ប្រជាពលរដ្ឋតាមខ្នងផ្ទះ។

ឥឡូវបែរឆ្លងជំងឺកូវីដ-១៩ ថែមទៀត ហើយបច្ចុប្បន្នកំពុងសម្រាកព្យាបាលនៅមន្ទីរពេទ្យ។

គួរបញ្ជាក់ថាក្នុងមូលដ្ឋានសង្កាត់ស្ទឹងមានជ័យទី៣ កំពុងស្ថិតក្នុងតំបន់ក្រហមជាមួយនឹងសង្កាត់ស្ទឹងមានជ័យទី១ ស្ទឹងមានជ័យទី២ និងសង្កាត់បឹងទំពន់ ក្នុងខណ្ឌមានជ័យរាជធានីភ្នំពេញ៕

អត្ថបទ៖ នរា