កូវីដ-១៩

ភ្នំពេញមានអ្នកឆ្លងកូវីដជាង ១ ០០០ នាក់ ត្រឹមតែពីរថ្ងៃប៉ុណ្ណោះ

បានផុស

៤ years មុន

នៅ

ថ្ងៃព្រហស្បតិ៍ ២៩ មេសា ២០២១

ដោយ

ទីក្រុងភ្នំពេញ នៅតែបន្តរកឃើញតួលេខអ្នកឆ្លងប្រចាំថ្ងៃខ្ពស់គួរឲ្យព្រួយបារម្ភ។ សរុបអ្នកឆ្លងពីរថ្ងៃជាប់គ្នាឡើងជាង ១០០០ នាក់ ខណៈម្សិលមិញនេះមានអ្នកឆ្លង ៥៥៨ នាក់ ដោយឡែកថ្ងៃនេះបន្តរកឃើញអ្នកឆ្លងថ្មីបន្ថែម ៥១៨ នាក់ទៀត។

សញ្ញាណមិនថមថយនេះ បង្កក្តីព្រួយបារម្ភចំពោះពលរដ្ឋជិត ២ លាននាក់ នៅទីក្រុងភ្នំពេញដែលត្រូវបន្តអូសបន្លាយនៃការបិទខ្ទប់ ខណៈអ្នកខ្លះកំពុងប្រឈមមុខបញ្ហាជីវភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងកាលពីថ្ងៃទី១៤ ខែមេសា ឆ្នាំ២០២១ ថាកម្ពុជាកំពុងស្ថិតនៅមាត់ជ្រោះមរណៈ។ ប្រសិនបើប្រជាពលរដ្ឋមិនរួបរួមគ្នាទេនោះ នឹងឈានទៅរកមរណៈពិតប្រាកដ ដូច្នេះ វិធីតែមួយគត់គឺរួមដៃគ្នាទាំងរដ្ឋ និងប្រជាជន ដើម្បីប្រយុទ្ធប្រឆាំងជំងឺកូវីដ-១៩។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល នៅល្ងាចថ្ងៃទី២៨ ខែមេសា ឆ្នាំ២០២១នេះ ក៏បានចេញសារក្រើនរំលឹកដល់ប្រជាពលរដ្ឋខ្មែរ ពីវិបត្តិជំងឺកូវីដដែលអូសបន្លាយ។

លោកជំទាវបានថ្លែងថា វិធានការ៣ការពារ + ៣កុំ + ចាក់វ៉ាក់សាំងកូវីដ-១៩ + នៅផ្ទះ ជាអាវុធដ៏ស័ក្ដិសិទ្ធិសម្រាប់យកឈ្នះសត្រូវអត់ស្រមោលកូវីដ-១៩៕

Related Topics: