រវល់តែគិតពីឥណ្ឌា ងាកទៅប្រេស៊ីលឯណោះវិញ អ្នកស្លាប់ដោយសារកូវីដកើនលើស ៤០០,០០០នាក់បាត់ទៅហើយ

ចំនួនអ្នកស្លាប់ដោយសារជំងឺកូវីដ-១៩ បានកើនលើស ៤០ម៉ឺននាក់ហើយនៅក្នុងប្រទេសប្រេស៊ីល ដែលនេះជាចំនួនខ្ពស់បំផុតលំដាប់ទី២នៅលើពិភពលោក។

មានអ្នកស្លាប់ចំនួន ៣,០០១នាក់ក្នុងរយៈពេល២៤ម៉ោងចុងក្រោយ បន្ទាប់ពីកម្រិតខ្ពស់បំផុតឈានដល់ទៅជាង ៤,០០០នាក់កាលពីដើមខែមេសា។

ទោះបីជាយ៉ាងណាក៏ដោយ ការស្លាប់និងករណីឆ្លងជាមធ្យមរយៈពេល១៤ថ្ងៃ នៅតែមានកម្រិតខ្ពស់ ប៉ុន្តែត្រូវបានគេមើលឃើញថាមានការធ្លាក់ចុះបន្តិច។

អត្រានៃអ្នកជំងឺនៅក្នុងបន្ទប់សង្គ្រោះបន្ទាន់គឺនៅតែមាន ឬលើស៩០ភាគរយនៅក្នុងរដ្ឋជាងមួយភាគបី។ នេះបើយោងតាមវិទ្យាស្ថានសុខភាព Fiocruz។

ប្រទេសប្រេស៊ីលបានកត់ត្រាការស្លាប់ចំនួន១០០,០០០នាក់ ក្នុងរយៈពេលត្រឹមតែ៣៧ថ្ងៃចន្លោះខែមីនាដល់ខែមេសា ដែលជាខែដ៏អាក្រក់បំផុតនៅក្នុងប្រទេសនេះ។ មានតែសហរដ្ឋអាមេរិកប៉ុណ្ណោះ ដែលមានចំនួនអ្នកស្លាប់ខ្ពស់ជាងនេះ។

ចាប់តាំងពីការចាប់ផ្តើមនៃជំងឺរាតត្បាតមក ប្រទេសប្រេស៊ីលបានកត់ត្រាករណីឆ្លងជាង១៤.៥លានករណីហើយ៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ អ្នកស្លាប់ដោយសារ កូវីដ នៅ ប្រេស៊ីល កើនឡើងជិត ៤០ ម៉ឺននាក់ ក្រោយរកឃើញថ្មីជាង ៣ ពាន់នាក់ក្នុងរយៈពេល ២៤ ម៉ោងចុងក្រោយ