ឃើញស្ថានភាពកូវីដកាន់តែយ៉ាប់យ៉ឺន អាមេរិក ប្រាប់ប្រជាជនខ្លួនឲ្យចាកចេញពី ឥណ្ឌា

សហរដ្ឋអាមេរិក បានទទូចដល់ប្រជាជនខ្លួន មិនឲ្យទៅប្រទេសឥណ្ឌា ឬក៏ចាកចេញពីប្រទេសនេះភ្លាមៗ នៅពេលដែលមានសុវត្ថិភាព ខណៈប្រទេសនេះកំពុងប្រឈមវិបត្តិជំងឺកូវីដ ១៩ កាន់តែធ្ងន់ធ្ងរ ។

ទន្ទឹមនោះ ស្ថានទូត និងស្ថានកុងស៊ុលអាមេរិ កប្រចាំនៅប្រទេសឥណ្ឌា បាននិយាយនៅក្នុងសេចក្តីថ្លែងការណ៍មួយថា “ករណីឆ្លង និងស្លាប់ថ្មី ពីជំងឺកូវីដ ១៩ បានកើនឡើងយ៉ាងខ្លាំង នៅទូទាំងប្រទេសឥណ្ឌា ហើយឈានដល់កម្រិតកំណត់ត្រា មិនធ្លាប់មានពីមុនមក” ។

សេចក្តីថ្លែងការណ៍បន្តថា “មន្ទីរពេទ្យ កំពុងរាយការណ៍អំពី កង្វះខាតការផ្គត់ផ្គង់អុកស៊ីសែន និងគ្រែសម្រាប់អ្នកជំងឺកូវីដ ១៩ និងទាំងអ្នកជំងឺធម្មតា” ។

បន្ថែមពីនេះ ការប្រឹក្សាការធ្វើដំណើរកម្រិត ៤ ដែលជាកម្រិតខ្ពស់បំផុត ត្រូវបានដាក់ចេញកាលពីថ្ងៃព្រហស្បតិ៍ ដោយក្រសួងការបរទេស និងមជ្ឈមណ្ឌលត្រួតពិនិត្យ និងបង្ការជំងឺ (CDC) ។

ទីភ្នាក់ងារនេះ ក៏បានទទូចដល់ជនជាតិអាមេរិក ដែលចង់ចាកចេញពីប្រទេសឥណ្ឌា ទាញយកអត្ថប្រយោជន៍ ពីជម្រើសដឹកជញ្ជូនពាណិជ្ជកម្ម ។

ឥណ្ឌា មានចំនួនអ្នកឆ្លងខ្ពស់ជាងគេលំដាប់ទី ២ នៅលើពិភពលោក បន្ទាប់ពីសហរដ្ឋអាមេរិក ដែលមានចំនួនជាង ១៨.៣ លានករណី ហើយមានអ្នកស្លាប់ខ្ពស់ជាងគេទី ៤ លើលោក ដោយមានជាង ២០៨,០០០ នាក់ ។ នេះបើយោងតាមទិន្នន័យរបស់សាកលវិទ្យាល័យ Johns Hopkins នៅសហរដ្ឋអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ គិតត្រឹមពេលនេះ ប្រទេសជាង ៤០ ហើយផ្ដល់ជំនួយដល់ ឥណ្ឌា ដែលកំពុងដុនដាបដោយកូវីដ

ចុចអាន ៖ ឥណ្ឌា ក្លាយជាប្រទេសទី ៤ មានអ្នកស្លាប់ដោយកូវីដច្រើនជាងគេលើលោក