មិនខ្វល់រឿងផ្ទុះខ្លាំង! ប្ដីប្រពន្ធ ឥណ្ឌា មួយគូរៀបការទាំងស្លៀកឈុតការពារ ក្រោយកូនកំលោះផ្ទុកកូវីដ (មានវីដេអូ)

ប្ដីប្រពន្ធមួយគូ នៅស្រុក Ratlam នៃរដ្ឋ Madhya Pradesh ប្រទេសឥណ្ឌា បានស្លៀកឈុតការពារឆ្លងជំងឺកូវីដ ១៩ (PPE) បន្ទាប់ពីកូនកំលោះ បានធ្វើតេស្តរកឃើញវីរុសមួយនេះ ។

យោងតាម អាជ្ញាធរស្រុក បានឲ្យដឹងថា កូនកំលោះអាយុ ២៨ ឆ្នាំ បច្ចុប្បន្នអាចប្រឈមនឹងការចោទប្រកាន់ ពីបទរំលោភលើបទបញ្ជារបស់រដ្ឋាភិបាល បន្ទាប់ពីបានចាកចេញពីតំបន់បិទខ្ទប់ ។

វីដេអូរបស់គូស្វាមីភរិយា ដែលចូលរួមក្នុងពិធីរៀបអាពាហ៍ពិពាហ៍ ស្លៀកឈុតការពារ PPE កំពុងផ្ទុះការល្បីល្បាញយ៉ាងខ្លាំង នៅលើបណ្តាញសង្គម ។ វាកើតឡើងនៅពេលដែលរលកទី ២ នៃរោគរាតត្បាតកូវីដ ១៩ កំពុងតែរាលដាលពាសពេញប្រទេសឥណ្ឌា ។

មន្ត្រីម្នាក់ឈ្មោះ Naib Naveen Garg បាននិយាយថា អាពាហ៍ពិពាហ៍នេះ ត្រូវបានធ្វើឡើងយ៉ាងសាមញ្ញនៅសាលមួយ មុខមនុស្ស ៨ នាក់នៅឯតំបន់ Indira Nagar នៃស្រុក Ratlam ។

លោកបាននិយាយថា រដ្ឋបាលទទួលបានព័ត៌មាន អំពីពិធីរៀបអាពាហ៍ពិពាហ៍ របស់អ្នកឆ្លងជំងឺកូវីដ ១៩ កាលពីថ្ងៃចន្ទ ។ នៅពេលក្រុមរដ្ឋបាលរបស់យើង ទៅដល់កន្លែងនោះ ពួកគេបានប្រាប់ថា សមាជិកវ័យចំណាស់ម្នាក់ នៃគ្រួសារនេះ កំពុងតែមានជំងឺ ហើយចង់ឃើញកូនកំលោះរៀបការ ។

មន្ត្រីរូបនោះបាននិយាយថា បន្ទាប់ពីពិគ្រោះយោបល់ ជាមួយមន្រ្តីជាន់ខ្ពស់ ពិធីនេះត្រូវបានអនុញ្ញាតឲ្យ តែត្រូវស្លៀកឈុតការពារ PPE និងដើម្បីស្របតាមពិធីសារនៃជំងឺកូវីដ ១៩ ។

គួរបញ្ជាក់ថា គិតត្រឹមពេលនេះ ប្រទេសឥណ្ឌា មានករណីឆ្លងជំងឺកូវីដ ១៩ ជាង ១៨.៣ លានករណី និងមានអ្នកស្លាប់ជា ២០៨,០០០ នាក់ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Daily Star

ចុចអាន ៖ គិតត្រឹមពេលនេះ ប្រទេសជាង ៤០ ហើយផ្ដល់ជំនួយដល់ ឥណ្ឌា ដែលកំពុងដុនដាបដោយកូវីដ

ចុចអាន ៖ ឥណ្ឌា ក្លាយជាប្រទេសទី ៤ មានអ្នកស្លាប់ដោយកូវីដច្រើនជាងគេលើលោក