ដួង សុខគា៖ កុំក្លាយជាអ្នកនាំកូវីដចូលភូមិ កុំក្លាយជាអ្នកទទួលពានចង្រៃ

ភ្នំពេញ៖ តារាប្រុសពហុជំនាញលោក ដួង សុខគា ខណៈនេះមិនខុសពីអ្នកសិល្បៈឯទៀត និងមហាជនឡើយគឺ លោកបានធ្វើការអំពាវនាវឱ្យមានការប្រុងប្រយ័ត្នចំពោះជំងឺកូវីដ-១៩ និងអនុវត្ត ៣កុំ៣ការពារ។

លោក ដួង សុខគា បានលើកឡើងជាទស្សនៈដើម្បីបំផុសដល់អ្នកគាំទ្រ និងមហាជនថា៖ “សូមកុំខឹង ទ្រាំយូរហើយថ្ងៃនេះសូមនិយាយម្តង! សូមកុំក្លាយជាអ្នកនាំកូវីដចូលភូមិ កុំក្លាយជាអ្នកទទួលពានចង្រៃ។ ពេលនេះជាពេលដែលត្រូវតែយល់ដឹងហើយ!”។

តារាកំប្លែងលោក ដួង សុខគា បានបន្តនិយាយថា៖ “អ្នកមិនស្មោះត្រង់ជាមួយអ្នកភូមិបាន តែអ្នកមិនអាចក្បត់កូវីដបានឡើយ។ ចេញទៅជិតឆ្ងាយមួយភ្លែតក៏ដោយ សូមប្រយ័ត្នផង កុំចាំបូរបាច់រកលេសរកហេតុផលមកនិយាយច្រើន។ ពួកយើងស្តាប់ហើយគិតថា គួរជឿ ឬមិនជឿ? រីឯកូវីដវិញវាអត់មានពេលស្តាប់អ្នកបកស្រាយពន្យល់ទេ”។ 

លោកនិយាយបន្ថែមទៀតថា បើអ្នកអត់ប្រយ័ត្ន អត់ការពារវា គឺជាឱកាសរបស់វាហើយ វាតោងស៊ីសួត វាព្រួតឆ្លងតគ្នា យើងវេទនារួម។ ពេលយើងមិនចេះប្រយ័ត្ន គេដើរគេចកុំថាគេរើសអើង ព្រោះគេមិនចង់លំបាកស្លាប់ដោយសារកូវីដនោះទេ៕

អត្ថបទ៖ ចាន់រ៉ា