លោក គួច ចំរើន ស្នើអភិបាលខេត្តសៀមរាបចាត់ការជនល្មើស១៤នាក់ ក្នុងនោះ៨នាក់វិជ្ជមានកូវីដ-១៩

លោក គួច ចំរើន អភិបាលខេត្តព្រះសីហនុបានស្នើឱ្យលោកអភិបាលខេត្តសៀមរាបចាត់វិធានការតាមផ្លូវច្បាប់ចំពោះជនល្មើសចំនួន១៤នាក់ ក្នុងនោះមានវិជ្ជមាន៨នាក់ដែលបានគេចវេះចេញពីតំបន់បិទខ្ទនៅខេត្តព្រះសីហនុធ្វើដំណើរទៅខេត្តសៀមរាប។

តាមរយៈលិខិតផ្ញើជូនលោកអភិបាលខេត្តសៀមរាបនៅថ្ងៃទី០១ ខែឧសភានេះ លោក គួច ចំរើន បានមានប្រសាសន៍ថា រដ្ឋបាលខេត្តព្រះសីហនុបានសម្រេចដាក់ជាតំបន់បិទខ្ទប់រយៈពេល១៤ថ្ងៃគិតចាប់ពីថ្ងៃទី២៣ ខែមេសា ឆ្នាំ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ក្នុងសហគមន៍ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត។

លោក​ គួច ចំរើន បានបន្តថា ប៉ុន្តែក្នុងកំឡុងពេលបិទខ្ទប់នេះរដ្ឋបាលខេត្តព្រះសីហនុបានទទួលព័ត៌មានថាមានបុគ្គលចំនួន១៤នាក់ ស្រីចំនួន៥នាក់ ក្នុងនោះមានវិជ្ជមានចំនួន៨នាក់បានលួចគេចវេះចេញពីតំបន់បិទខ្ទប់នៅខេត្តព្រះសីហនុធ្វើដំណើរទៅខេត្តសៀមរាបទៅវិញ។

លោកបានបន្តទៀតថា៖ “ទង្វើរបស់បុគ្គលទាំង១៤ នាក់ខាងលើនេះគឺជាអំពើដោយចេតនាមិនគោរពវិធានការរដ្ឋបាលដែលមានចែងក្នុងមាត្រា៤ និងមាត្រា១០ នៃច្បាប់ស្ដីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ អាស្រ័យដូចបានជម្រាបជូនខាងលើសូមឯកឧត្តមអភិបាលនៃគណៈអភិបាលខេត្តសៀមរាបមេត្តាចាត់វិធានការតាមច្បាប់ចំពោះបុគ្គលល្មើសខាងលើឱ្យបានតឹងរឹងបំផុត”។

លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍ថា រហូតមកដល់ពេលនេះអាជ្ញាធរខេត្តព្រះសីហនុបានធ្វើការឃាត់ខ្លួនអ្នកដែលល្មើសទៅនឹងបម្រាមរបស់រដ្ឋបាលខេត្តចំនួន៦២នាក់ ក្នុងនោះជនជាតិខ្មែរចំនួន៥៦នាក់ ជនជាតិចិន៤នាក់ និងជនជាតិវៀតណាមចំនួន២នាក់។

លោកបានបន្តទៀតថា អ្នកល្មើសនឹងបម្រាមទាំងនោះមានអ្នកខ្លះត្រូវរដ្ឋបាលខេត្តពិន័យអន្តរកាល ខ្លះទៀតកសាងសំណុំរឿងបញ្ចួនទៅតុលាការ និងអ្នកល្មើសមួយចំនួនទៀតត្រូវរៀបចំឯកសារស្នើសុំឱ្យបណ្តេញចេញពីប្រទេសកម្ពុជា៕

អត្ថបទ៖ សំអឿន