ស្ងាត់ៗ មីយ៉ាន់ម៉ា ទទួលវ៉ាក់សាំងការពារ ជំងឺកូវីដ ១៩ ពីចិន កន្លះលានដូស

ប្រទេសចិន បានបរិច្ចាគវ៉ាក់សាំង ការពារជំងឺកូវីដ ១៩ ចំនួន ៥០០,០០០ ដូសដល់ ប្រទេសមីយ៉ាន់ម៉ា ។

ទូរទស្សន៍រដ្ឋរបស់ប្រទេសមីយ៉ាន់ម៉ា បាននិយាយថា ការដឹកជញ្ជូនវ៉ាក់សាំង បានមកដល់កាលពីថ្ងៃអាទិត្យ នៅអាកាសយានដ្ឋានអន្តរជាតិ ក្នុងទីក្រុងយ៉ាំងហ្គោន ដែលជាទីក្រុងធំបំផុតរបស់មីយ៉ាន់ម៉ា ។

ការដឹកជញ្ជូននេះ មានទំហំធំជាងចំនួន ៣០០,០០០ ដូស ដែលបានសន្យាដោយរដ្ឋមន្ត្រីការបរទេសចិនលោក Wang Yi នៅពេលដែលលោកបានបំពេញទស្សនកិច្ច នៅប្រទេសមីយ៉ាន់ម៉ាកាលពីខែមករា ។

ទន្ទឹមនោះ ស្ថានទូតចិនប្រចាំនៅមីយ៉ាន់ម៉ា បាននិយាយថា វ៉ាក់សាំងទាំងនេះបង្ហាញពី មិត្តភាពរវាងប្រទេសទាំងពីរ ។

ការដឹកជញ្ជូនធំជាងការសន្យានេះ ជាក់ស្តែងគឺមានគោលបំណង បន្ធូរបន្ថយជំងឺកូវីដ ១៩ នៅក្នុងប្រទេសមីយ៉ាន់ម៉ា ខណៈវាក៏អាចជួយមេដឹកនាំយោធា បង្ហាញពីការខិតខំរបស់ពួកគេ ក្នុងការប្រយុទ្ធប្រឆាំងនឹងរោគរាតត្បាតមួយនេះ ។

ទោះយ៉ាងណា អ្នកសង្កេតការណ៍ខ្លះជឿជាក់ថា វ៉ាក់សាំងចិនអាចធ្វើឲ្យកាន់តែធ្ងន់ធ្ងរ ដល់ការធ្វើពហិការចាក់វ៉ាក់សាំង ក្នុងចំណោមពលរដ្ឋដែលបដិសេធ ការគ្រប់គ្រងរបស់យោធា ។

គួរបញ្ជាក់ថា គិតត្រឹមពេលនេះ ប្រទេសមីយ៉ាន់ម៉ា មានករណីឆ្លងជំងឺកូវីដ ១៩ សរុប ១៤២,៨៣៨ ករណី និងមានអ្នកស្លាប់ចំនួន ៣,២០៩ នាក់ ខណៈមានអ្នកជាសះស្បើយចំនួន ១៣១,៩៨១ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ តំបន់មួយក្នុងប្រទេសចិនត្រៀមចាក់វ៉ាក់សាំង កូវីដ យកលុយពីពលរដ្ឋ

ចុចអាន ៖ វីរុសបំប្លែងខ្លួនឥណ្ឌា ចូលដល់ប្រទេសអាស៊ីអាគ្នេយ៍មួយទៀតហើយ!