កូវីដ-១៩

ស្ត្រីមានជំងឺកូវីដ១៩ម្នាក់ ចូលព្យាបាលនៅមន្ទីរពេទ្យបង្អែកខេត្តកំពង់ឆ្នាំង មិនបាន១ថ្ងៃផង ក៏ស្លាប់

បានផុស

៤ years មុន

នៅ

ថ្ងៃចន្ទ ៣ ឧសភា ២០២១

ដោយ

ស្ដ្រីអាយុ៥៨ឆ្នាំម្នាក់ មានផ្ទុកជំងឺកូវីដ១៩ ដែលរស់នៅខេត្តកំពង់ឆ្នាំង បានស្លាប់ក្រោយចូលសម្រាកព្យាបាល មិនទាន់បានមួយថ្ងៃស្រួលបួលផង ហេតុការណ៍នេះបានកើតឡើង នៅម៉ោង២ទៀបភ្លឺព្រឹកថ្ងៃទី០៣ ខែឧសភា ឆ្នាំ២០២១នេះ។

ប្រធានមន្ទីរសុខាភិបាលខេត្តកំពង់ឆ្នាំង លោកវេជ្ជបណ្ឌិត ប្រាក់វ៉ុន បានឲ្យដឹងនៅព្រឹកថ្ងៃទី០៣ ចែឧសភានេះថា ស្ត្រីម្នាក់ឈ្មោះ សូហៀង អាយុ៥៨ឆ្នាំ រស់នៅភូមិអណ្តូរនុក ឃុំត្រងិល ស្រុកកំពង់លែង ខេត្តកំពង់ឆ្នាំង ត្រូវបានស្លាប់នៅម៉ោង២ទៀបភ្លឺ ឈានចូលថ្ងៃទី០៣ ខែឧសភានេះ នៅក្នុងមន្ទីរពេទ្យបង្អែកខេត្តកំពង់ឆ្នាំង បន្ទាប់ពីបានចូលសម្រាកនៅក្នុងមន្ទីរពេទ្យខេត្ត កាលពីថ្ងៃទី០២ ម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានមន្ទីរសុខាភិបាលខេត្តបានបញ្ជាក់ថា ស្ត្រីខាងលើនេះ បានជិះ PASS APPតាំងពីភ្នំពេញនៅថ្ងៃម្សិលមិញ ហើយចូលមកកាន់មន្ទីរពេទ្យខេត្តកំពង់ឆ្នាំងផ្ទាល់តែម្ដង ដោយមានអាការៈមិនស្រួលខ្លួន ដើម្បីឲ្យគ្រូពេទ្យជួយពិនិត្យព្យាបាល ហើយក្រុមគ្រូពេទ្យបានយកសំណាកទៅពិនិត្យបន្ទាន់ឃើញថា គាត់មានវិជ្ជមានកូវីដ១៩ លុះដល់ម៉ោងប្រមាណ២ទៀបភ្លឺយប់ ក៏បានស្លាប់។ សពស្ត្រីខាងលើ ត្រូវបានក្រុមការងារខេត្តបូជានៅក្នុងខេត្តកំពង់ឆ្នាំង តាមវិធានការរបស់ក្រសួងសុខាភិបាល ដោយមិនបានប្រគល់ឲ្យក្រុមគ្រួសារនោះឡើយ។

លោកប្រធានមន្ទីរសុខាភិបាលខេត្តកំពង់ឆ្នាំង បានបញ្ជាក់ទៀតថា ស្ត្រីខាងលើត្រូវបានក្រុមគ្រូពេទ្យយកសំណាកធ្វើតេស្តភ្លាមៗ ឃើញថាមានវិជ្ជមានកូវីដ១៩ តែខាងក្រសួងសុខាភិបាលមិនទាន់បានប្រកាសព័ត៌មាននៅឡើយទេ។ ចំណែកអ្នកពាក់ព័ន្ធជាមួយស្ត្រីខាងលើនេះ ក៏មិនមានដែរ ដោយគាត់បានជិះ PASS APPពីផ្សារតូចមកចូលក្នុងមន្ទីរពេទ្យខេត្តតែម្តង។ ទាក់ទងនឹងករណីនេះ ចំនួនអ្នកស្លាប់ដោយកូវីដ១៩ មាន២ករណីហើយក្នុងខេត្តកំពង់ឆ្នាំង៕

អត្ថបទ៖ ឈៀងថារិទ្ធ

សូមចុចអាន៖ ខេត្តសៀមរាបរកឃើញករណីស្លាប់លើកដំបូងដោយសារកូវីដ១៩